އިޒްރާއިލްގެ ސީނިއާ މިނިސްޓަރެއް ކަމަށްވާ ބެޒޭލް ސްމޮޓްރިޗް އިޒްރާއިލް ޓީވީގައި ވާހަކަ ދައްކަމުން ބުނެފައިވަނީ ފަލަސްޠީނުގެ ހުވާރާ ވިލެޖް ވީ ފުހެލަން ކަމަށެވެ.

"އަހަންނަށް ފެންނަނީ ފަލަސްޠީނުގެ ހުވާރާ ވިލެޖް ފޮހެލަން، އިޒްރާއިލްގެ ސިފައިން އެކަން ކުރަން އަހަންނަށް ފެނޭ" އިޒްރާއިލްގެ ފައިނޭންސް މިނިސްޓަރު އަދި އިޒްރާއިލުން ވެރިވެގަނެގެން ތިބި ފަލަސްޠީނުގެ ހުޅަނގު އައްސޭރީގެ ސިވިލް އެޑްމިނިސްޓްރޭޝަނާއި ގުޅުންހުރި ކަންކަން ބަލަހައްޓާ ބެޒޭލް ސްމޮޓްރިޗް ބުނެފައިވެއެވެ.

އިޒްރާއިލުގެ އިސްވެރިއަކު މިގޮތަށް ވާހަކަ ދައްކައިފައި މިވަނީ ދާދި އާދީއްތަ ދުވަހު ހުވާރާ ވިލެޖްގައި ބޮޑު ހަމަނުޖެހުމެއް ހިނގައިފައިވަނިކޮށެވެ. އިޒްރާއިލުގެ މީހުން ގަދަކަމުން ހުވާރާ ތެރެއަށް ވަދެގަނެ އުނދަގޫތަކެއް ކުރުމުން ހުވާރާގެ ރައްޔިތުން ދިން ރައްދުގައި އިޒްރާއިލްގެ ދެ މީހަކު ވަނީ މަރުވެފައެވެ.

Advertisement

ހުވާރާގައި އިޒްރާއިލުން ހިންގި ކަންތައްގަނޑުގެ ތެރޭގައި ފަލަސްޠީނުގެ 37 އަހަރުގެ ފިރިހެނަކު ވަނީ ޝަހީދުވެފައެވެ. އިޒްރާއިލް ސިފައިން ބުދަ ދުވަހު ވަނީ ވިލެޖްގެ މީހުންނަށް ހަމަލާދިން ކަމަށް ޝައްކު ކުރެވޭ ކަމަށްބުން 6 މީހަކު ހައްޔަރުކޮށްފައެވެ.

"އެހާ މަތީ މަގާމެއްގައި ހުރި މީހަކު ފަލަސްޠީނުގެ ވިލެޖެއް ނައްތާލުން ފަދަ ވާހަކަދެއްކުމަކީ ވަރަށް ބޮޑަށް ނަފުރަތުއުފެދޭނެ ކަމެއް" ޖާރުއްސަލަމްގައި ހުރެ ވާހަކަ ދައްކަމުން އަލްޖަޒީރާގެ ރިޕޯޓަރު ޢިމްރާން ޚާން ބުނެފައިވެއެވެ.

ހަމަ މިފަދަ ވާހަކަތަކެއް ދާދި ފަހަކުން ނަތަންޔާހޫ ލީޑް ކުރާ ފާ ރައިޓް ކޯލިޝަންގެ މެމްބަރެއް ކަމަށްވާ ޒިވިކާ ފޮގެލް ވެސް ވަނީ ދައްކާފައެވެ. އަދި އޭނާއަކީ އިޒްރާއިލްގެ ޕާލިމެންޓުގެ މެމްބަރެއްވެސް މެއެވެ.

"ހުވާރާއިން ޓެރަރިސްޓަކު އައީ، ދެން އެވީ ހުވާރާ ބަންދުކޮށް ރޯކޮށްލައި އަންދާލަން، މިއީ އަހަރެން ދެކެން ބޭނުންވާ މަންޒަރަކީ، އަހަރެމެނަށް އެމީހުން ބިރުގަންނަވައިލެވޭނީ އޭރުން، އާދީއްދަ ދުވަހުގެ މަރަށް ފަހު ވިލެޖްތައް ވީ އަންދާލަން، އިޒްރާއިލް ސިފައިން ފިޔަވަޅެއް ނާޅަންޏާ" ޒިވިކާ ފޮގެލް ބުނެފައިވެއެވެ.