ޑިފެންސް މިނިސްޓަރު މާރިޔާ ދީދީ އާއި އޭނާގެ ޓީމު ޤައްދާރުންގެ ގޮތުގައި ޖަވާބުދާރީ ކުރުވާނެކަމަށް މަޖިލީހުގެ މާވަށު ދާއިރާގެ މެމްބަރު އަދި އިދިކޮޅު އިއްތިހާދުގައި ހިމެނޭ ޕީއެންސީގެ ނައިބުރައީސް މުހައްމަދު ސައީދު ވިދާޅުވެއްޖެ އެވެ. 

ޕީޕީއެމް ޖަގަހަ ޖަލްސާގައި ވާހަކަދައްކަވަމުން ސައީދު ވިދާޅުވީ ދިވެހިރައްޔިތުންނަށް ސަރުކާރުން ވަމުންދާ އިހުމާލު ބެލޭނެ ދުވަސް އޮތީ ކައިރީގައި ކަމަށެވެ. 

ޕީޕީއެމްގެ ސެނެޓަރު އަދި ސިފައިންގެއަސް ގިނަ ދުވަސްތަކެއްވަންދެން ޚިދުމަތްކޮށްދެއްވާ ޝަރަފުވެރިކަމާއެކު ރިޔަޓާކުރައްވާފައިވާ ބޭކަލެއްކަމަށްވާ އަބްދުއް ސަމަދަށް ކުޑައިމީސް ބަސްތައް މާރިޔާ ރައްދުކުރި މައްސަލަ އިދިކޮޅުން ހަނދާން ނައްތާނުލާކަމަށް ސައީދު ވިދާޅުވި އެވެ. 

Advertisement

މާރިޔާގެ އެ ވާހަކަތަކަށް ޖަވާބުދާރީ ކުރުވުމަށް މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު، މާރިޔާ މަޖިލީހަށް ހާޒިރުކުރުމަށް މިހާރުވެސް ސިޓީ ފޮނުވާފައިވާކަމަށާއި، އޭނާ މަޖިލީހަށް ހާޒިރުކުރާނެ ކަމަށް ސައީދު ވިދާޅުވި އެވެ.

އަދި އެނޫންވެސް މައްސަލަތަކުގައި ޑިފެންސް މިނިސްޓަރާއި އޭނާގެ ޓީމުން ހަދާފައިވާ ގޯސްތައް ބަލާ، ގައްދާރެއްގެ ގޮތުގައި ޖަވާބުދާރީ ކުރުވާނެކަމަށް ސައީދު ވިދާޅުވި އެވެ. 

މާރިޔާގެ މިނިސްޓަރުކަމުގެ ދަށުން ގަވައިދާއި ޚިލާފަށް ރާއްޖޭގެ އެކި ކަންކޮޅުތަކުގައި އިންޑިއާގެ އަސްކަރީ ސިފައިން ގާއިމުވުމަށް ފުރުސަތުދީ ހެދި އެއްބަސްވުންތައް ބަލައި، ޕީޕީއެމްގެ ވެރިކަމުގައި އެ އެއްބަސްވުންތައްވެސް ބާތިލު ކުރާނެކަމަށް އިދިކޮޅުން ވަނީ މީގެ ކުރިންވެސް ބުނެފަ އެވެ. 

އެ އެއްބަސްވުންތައް ބާތިލު ކުރުމުގެ އިތުރުން އިންޑިއާ ސިފައިން މި ގައުމުން ބާލާ، އެއްބަސްވުންތައް ހެދުމުގެ ފަހަތުގައި ތިބި އެންމެން ޖަވާބުދާރީ ކުރުވާނެކަމުގެ ޔަގީންކަން ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމުވެސް ވަނީ ދެއްވާފަ އެވެ.