ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީން) ސަރުކާރަށް ވިއްކި 5 ލައްކަ އަކަފޫޓަށްވުރެ ބޮޑު ބިމަކީ އިޖްތިމާއީ ބޯހިޔާވަހިކަމުގެ މަޝްރޫއުތައް ހިންގުމަށް ވިއްކި ބިންތަކެއްކަމަށް އެ ކުންފުނިން ބުނެފި އެވެ. 

އެޗްޑީސީން ވަނީ ސަރުކާރަށް 17 ބިމެއް ވިއްކާފަ އެވެ. އެއީ 15،000 އަކަފޫޓާއި 66،000 އަކަފޫޓާ ދެމެދުގެ ބިންތަކެކެވެ. އެ ބިންތައް އެ ކުންފުނިން ވިއްކާފައިވަނީ 878 މިލިއަން ރުފިޔާއަށެވެ. 

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ދަށުގައި އޮންނަ ހުޅުމާލެއިން ސަރުކާރުން 17 ބިމެއް ވިއްކުމަށްފަހު ސިވިލް ކޯޓުގައި ވަނީ މިދިޔަ ހަފްތާގައި އެ މުއާމަލާތް ސައްހަކަމަށް ކަނޑައަޅާފައެވެ.

އެކަމާއި ގުޅޭގޮތުން ބޮޑެތި ފާޑުކިޔުންތަކެއް އަމާޒުވުމާއި ގުޅިގެން އެޗްޑީސީން ބުނީ އެ ބިންތައް ވިއްކާފައިވަނީ އިޖްތިމާއީ ބޯހިޔާވަހިކަމަށް ސަރުކާރުން ކުރިއަށްގެންދާ 4،000 ހައުސިން ޔުނިޓުގެ މަޝްރޫއުއާ ގުޅިގެން ވެފައިވާ އެއްބަސްވުމެއްގެ ދަށުން ކަމަށެވެ. 

އެޗްޑީސީން އިތުރަށް ބުނީ ހުޅުމާލޭގެ ދެ ވަނަ ފިޔަވަހި ހިއްކުމަށާއި އެހެނިހެން އުމްރާނީ ހަރަދުތައް ކޮށްފައިވަނީ އެ ކުންފުނިން ލޯނު ނަގައިގެން ކަމަށް ވުމާއެކު، އެކި ބޭނުމަށް ވިއްކާ ބިމަށް އަގު ކަނޑައެޅިފައިވާކަމަށެވެ.

ސަރުކާރަށް ވިއްކި ބިންތަކަކީ ސޯޝަލް ހައުސިން އަށް ދޫކުރި ބިންތަކެއްކަމުން، ބިމުގެ އަގު ކަނޑައަޅާފައިވާނީ އާންމުންނަށް ހައުސިން ޔުނިޓުތައް ދޫކުރުމުގައި ލުއި އަގުތަކެއް ހަމަޖެއްސޭނެ ގޮތަށް ބަލައިގެންކަމަށް ވެސް އެޗްޑީސީން ބުނެއެވެ.

ސަރުކާރުން ގަނެފައިވާ ބިންތަކަށް ފައިސާ ދައްކާފައިވާތި ސިވިލް ކޯޓުން ވަނީ މި ހަފްތާގެ ތެރޭގައި އެ މުއާމަލާތް ސައްހަ ކަމަށް ނިންމައި، އެ ބިންތަކުގެ މިލްކުވެރިކަން ސަރުކާރަށް ބަދަލުކޮށްފައިވާކަމަށް ކަނޑައަޅާފަ އެވެ.