މި ސަރުކާރުން މަޝްރޫއުތައް ރާވާ، ކުރިއަށް ގެންދަނީ ކުރިއަށް އޮތް އިންތިހާބުތަކަކީ އެއީ އެންމެ މުހިންމު ކަމެއްގެ ގޮތުގައި ދެކިގެނެއް ނޫން ކަމަށް ރައީސް އިބްެރާހިމް މުހައްމަދު ސޯލިހް ވިދާޅުވެއްޖެއެވެ.
ހިރިލަންދުއަށް ކުރައްވަމުންގެންދަވާ ރަސްމީ ދަތުރުފުޅުގެ ތެރެއިން ހިރިލަންދޫ ފެނަކަ އޮފީސް ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ، މިސަރުކާރު އައިއިރު ރާއްޖޭގެ ގިނަ ރަށްރަށުގައި ފެނާ ނަރުދަމާ އާއި ކަރަންޓް ފަދަ އެންމެ އަސާސީކަންކަންވެސް ހުރީ ނުކުރެވި ފުނި ޖެހިފައި ކަމަށެވެ.
އަދި 2018 ވަނަ އަހަރު ރަށްރަށަށް ކުރެއްވި ޒިޔާރަތުގައި އެކަން ފެނި ތަރައްގީ ގެނައުމަކީ ކޮންމެހެން ކުރަންޖެހޭ ކަމެއްގެ ގޮތުގައި ފެނިވަޑައިގެންނެވި ކަމަށާ މީގެ ކުރިން ސަރުކާރުތަކުން ކުރަން ފަށާފައި ހުރި ކަންތައްތަކުން ފެނިގެން ދަނީ ކޮންމެ ފަސް އަހަރަކުން އަންނަ އިންތިހާބަށް ތައްޔާރުވާ ތަން ކަމަށްވެސް ވިދާޅުވި އެވެ.
"މީގެ ކުރިން ސަރުކާރު ތަކުން ކަންކަން ކުރަމުން އައި ގޮތުގެ ތަފްސީލަަށް ނުދިޔަ ނަމަވެސް، ކުރަން ފަށާފައި ހުރި މަސައްކަތްތަކުން ފެންނަނީ، ކޮންމެ ފަސް އަހަރަކުން އެ އަންނަ އިންތިހާބަަކަށް ތައްޔާރުވާތަން، ކުރިއަށް އޮތް އިންތިހާބު، އެއީ ރިޔާސީ އިންތިހާބު ކަމުގައިވިޔަސް، އެ އިންތިހާބު ކާމިޔާބު ކުރުމަށްޓަކައި ބޭނުންވާ ދިމަދިމާލަށް ކުރަން ޖެހޭ ކަންތައްތައް ކުރުން، އެއީ މި ވޭތުވެދިޔަ ތަނުގައި ސަރުކާރުތަކުން ކަން ކުރަމުން އައިސްފައި ގޮތް"
ރައީސް އިބްރާހިމް މުހައްމަދު ޞާލިހު
އެފަދައިން ކަންކަން ކުރުމުގެ ނަތީޖާއެއްގެ ގޮތުން ރާއްޖެއަށް ލިބެމުން އައި އާމްދަނީއާ އަޅާބަލާއިރު މީގެކުރިން ރާއްޖެ އޮތީ ތަރައްޤީވާންވީ މިންވަރަށް ތަރައްޤީ ނުވާ ކަން ރައީސް ފާހަގަކުރެއްވިއެވެ.
މިއާއެކު ރައީސް ޞާލިހު ވިދާޅުވީ، މި ސަރުކާރުން މަސައްކަތް ރާވާ، ކުރިއަށް ގެންދަނީ ރިޔާސީ އިންތިހާބު ނޫނީ މަޖިލީސް އިންތިހާބު އެއީ އެންމެ މުހިންމު ކަމެއްގެ ގޮތުގައި ދެކިގެނެއް ނޫން ކަމަށެވެ. އަދި މި ސަރުކާރުގެ ވިސްނުން ހުރީ ރާއްޖެ ތަރައްގީ ކޮށް ރައްޔިތުންނަށް ބޭނުންވާ ހިދުމަތްތައް ފޯރުކޮށްދިނުމަށް ކަަމަށްވެސް ވިދާޅުވިއެވެ.
އަޅުގަނޑުމެން ވިސްނުން ތަފާތު ކުރިން. އަޅުގަނޑުމެން މަސައްކަތް ރާވައި، ކުރިއަށް މިގެންދަނީ، ކޮންމެހެން ކުރިއަށްއޮތް ރިޔާސީ އިންތިޚާބު، ނުވަތަ މަޖިލީހުގެ އިންތިޚާބު އެއީ އެންމެ މުހިންމު ކަމެއްގެ ގޮތުގައި ދެކިގެނެއް ނޫން. ރާއްޖެ ތަރައްގީ ކުރުން. ތިބޭފުޅުންނަށް ބޭނުންވާ ޚިދުމަތްތައް ފޯރުކޮށްދިނުން. އެއީ އަޅުގަނޑުމެންގެ ވިސްނުން، އަޅުގަނޑުމެންގެ ޕްލޭނަކީ އެއީ".
ރައީސް އިބްރާހިމް މުހައްމަދު ޞާލިހު
ރައީސް ވިދާޅުވީ ތަރައްގީއާއެކު ކުރިއަށްދާނީތޯ ނުވަތަ މަޑުޖެހިގެން ތިބޭނީތޯ ނިންމާނީ ދިވެހި ރައްޔިތުން ކަމަށެވެ.
Advertisement
This content is created and paid for by advertisers and does not involve Voice Journalists
