ދިވެހި ރައްޔިތެއްކަން އަންގައިދޭ ކާޑުގެ މައުލޫމާތު ބަދަލުވެގެން އާ ކާޑެއް ހައްދައިދޭ އަގު ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރް)އިން ބޮޑު ކޮށްފިއެވެ.

މީގެ ކުރިން އައިޑީކާޑް ގައިވާ މައުލޫމާތު ބަދަލުކުރުމަށް ނަގަނީ 50 ރުފިޔާއެވެ.

ނަމަވެސް ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރު) އިން މިއަދު ގެޒެޓް ކުރި އިއުލާނުގައިވާގޮތުން އިއްޔެއިން ފެށިގެން އެ އަގުވަނީ 150 ރުފިޔާއަށް ބޮޑުކޮށްފައެވެ.

Advertisement

އަލަށް: ހިލޭ

ކާޑުގެ މުއްދަތު ހަމަވުމުގެ ކުރިން ފޮޓޯ ނުވަތަ ސޮއިބަދަލުކުރާ ނަމަ: 150 ރުފިޔާ

އާ ކާޑެއް ހައްދާނަމަ: 150 ރުފިޔާ

މައުލޫމާތު އާކުރަން: 150 ރުފިޔާ

ކާޑު ގެއްލިގެން: 250 ރުފިޔާ

ދިރިއުޅޭ އެޑްރެހާއި އަމިއްލަ ނަން ފަދަ މައުލޫމާތު ބަދަލުވެގެން އައިޑީކާޑް ހެއްދުމަކީ އާއްމުކޮށް މީހުން ހޯދާ ހިދުމަތެކެވެ. ޚާއްސަކޮށް ރިޔާސީ އިންތިޚާބު ގާތްވާ ވަރަކަށް ވެސް މައުލޫމާތު ބަދަލުވެގެން އާ ކާޑު ހައްދަން ހުށަހަޅާ މީހުން އިތުރު ވެއެވެ. 

އެކަމަކު ވޯޓާސް ލިސްޓުގައި އޮންނަ ގޮތާ ހިލާފަށް އައިޑީކާޑުގައި މައުލޫމާތެއް އޮވެއްޖެ ނަމަ ވޯޓުލުމުގެ ހައްގު ގެއްލޭނެތީ، ވޯޓުލާ މީހުންގެ ދަފުތަރު އެކުލަވާލާއިރު، އައިޑީކާޑުގެ މައުލޫމާތު ބަދަލުވެގެން އާކުރުމުގެ ހިދުމަތް މެދުކަނޑާލަ އެވެ.

އައިޑީކާޑް ހެއްދުމަށް މިހާރު ހުށަހަޅަން ޖެހެނީ އޮންލައިން ކޮށެވެ.