ބަންގްލަދޭޝްގައި ދިރިއުޅޭ ރޮހިންޔާ މުސްލިމުންނަށް ބަނޑުފުރާނަ މުއްތިކުރެވޭނެ ވަރަށް ކާބޯތަކެތީގެ އެހީ ފޯރުކޮށްދެވޭނެ ވަރަށް ބަޖެޓު ލިބިފައި ނުވާ ކަމަށް އ.ދ.ގެ އިދާރާ ދުނިޔޭގެ ކާބޯތަކެއްޗާ ބެހޭ ޕުރޮގުރާމު (ޑަބްލިޔު.އެފް.ޕީ)އިން ބުނެފިއެވެ.
ރޮހިންޔާ ރެފިއުޖީންނަށް ކާބޯތަކެތި ފޯރުކޮށްދޭނެ ބަޖެޓު ނެތި، އެކަމަށް އެހީވަމުންދިޔަ ގައުމުތަކުގެ އެހީވެސް ލިބެމުންނުދާތީ ކަންބޮޑުވުން ޑަބްލިޔު.އެފް.ޕީ ނެރުނު ނޫސް ބަޔާނެއްގައި ބުނީ، ރޮހިންޔާ މުސްލިމުންނަށް އިންސާނީ އެހީތެރިކަން ފޯރުކޮށްދިނުމަށް އެހީދޭ ޤައުމުތަކުން ދިނުމަށް ވަޢުދުވެފައިވާ 125 މިލިޔަން ޑޮލަރުގެ އެހީ ލިބިފައި ނުވާ ކަމަށާއި، އެ ސަބަބަށް ޓަކައި، ރޮހިންޔާ މުސްލިމުންނަށް ކާބޯތަކެތި ފޯރުކޮށްދިނުމަށް ހުރަސްތަކެއް ކުރިމަތިވެފައިވާ ކަމަށެވެ.
އަދި، މީހެ ކުރިން ރޮހިންޔާ ރެފިއުޖީންނަށް ފޯރުކޮށްދެމުންއައި "ފުޑް ވައުޗަރ" ދެމުންއައީ މަހެއްގެ މައްޗަށް ބޮލަކަށް 12 ޑޮލަރުގެ މަގުން ކަމަށާ އެހެން ނަމަވެސް އެ ވައުޗަރ ގެ އަގު 10 ޑޮލަރަށް މިހާރު ދަށްކުރަން ޖެހިފައިވާއިރު ކުރިއަށް އޮތް ތަނުގައި އިތުރު އެހީ ނުލިބިއްޖެ ނަމަ، ކާބޯތަކެތީގެ އެހީ ފޯރުކޮށްދިނުމުގެ މަސައްކަތަށް ހުރަސްއެޅި ރޮހިންޔާ މުސްލިމުން ބަނޑަށް ޖެހުމުގެ ބިރު ބޮޑުވެފައިވާ ކަމުގައި ވެސް އިދާރާއިންވަނީ އިންޒާރު ދީފައެވެ.
ބަންގްލަދޭޝް ގައި ހުންނަ ރޮހިންޔާ ކޭންޕުތަކުގައި މިލިއަނަކަށްވުރެ ގިނަ މުސްލިމުން އަންނަނީ ދިރިއުޅެމުންނެވެ. އެ މީހުންނަށް އިންސާނީ އެހީތެރިކަން ފޯރުކޮށްދިނުމަށް ބަންގްލަދޭޝްގެ ސަރުކާރުން ނުކުޅެދިފައިވާއިރު، އެ މީހުންގެ އަމިއްލަ ވަޒަނަށް އެނބުރި ދެވޭނެ ކަމުގެ އުންމީދު ވަނީ ފަނޑުވެފައެވެ.
އެކަމާއި ގުޅިގެން ރޮހިންޔާ މުސްލިމުންގެ ހައްޤުތަކުގެ ދިފާޢުގައި ވަކާލާތުކުރާ މަދަނީ ޖަމުޢިއްޔާއެއް ކަމުގައިވާ އަރަކަން ރޮހިންޔާ ނޭޝަނަލް ޔޫނިއަންއިން ވެސް ވަނީ ކަންބޮޑުވުން ފާޅުކޮށްފަ އެވެ. އަދި ބަންގްލަދޭޝްގައި ހާލުގައި ޖެހިފައިވާ ރޮހިންޔާ މުސްލިމުންނަށް ބޭނުންވާ މިންވަރަށް ކާބޯތަކެތީ ފޯރުކޮށްނުދެވުމަކީ އ.ދ.ގެ ވަރަށް ބޮޑު ފޭލުވުމެއް ކަމަށްވެސް އެ ޔޫނިއަނުން ވަނީ ބުނެފައެވެ.
އަދި، މި ކަމުގެ ސަބަބުން ރޮހިންޔާ މުސްލިމުންގެ ހާލަތު ދެރަވެ، ކުޑަކުދިން ލައްވާ މަސައްކަތްކުރުވުމާއި، އިންސާނީ ވަގުފާރިއާއި، ހަށިވިއްކުމާއި މަސްތުވާތަކެތީގެ ވިޔަފާރި ފަދަ ނުރައްކާތެރި ކުށްތަކަށް މަގުފަހިވުމުގެ ފުރުޞަތު ބޮޑުވެފައިވާ ކަމުގައި ވެސް އެ ޖަމުޢިއްޔާއިން ބުންޏެވެ.
Advertisement
This content is created and paid for by advertisers and does not involve Voice Journalists
