ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ވެރިކަމުގެ 5 އަހަރަކީ ހުރިހާ ގޮތަކުންވެސް ރައްޔިތުންނަށް ތަކުލީފުދިން ފަސް އަހަރުކަމަށް ކުރީގެ ނައިބުރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެ އެވެ. 

ޑރ ޖަމީލު މިފަދައިން ވިދާޅުވެފައިވަނީ ރައީސް ޞާލިހާއި، މި ވެރިކަމަށް ގިނަ ފާޑުކިޔުންތަކެއް އަމާޒުކުރައްވާ ކުރެއްވި ޓްވީޓެއްގަ އެވެ. 

އެ ޓްވީޓުގައި ޑރ ޖަމީލު ވިދާޅުވީ ރައީސް ޞާލިހަކީ ސިޔާސީ މައިދާނުގައި ތިބި ހުރިހާ ލީޑަރުންގެ ތެރެއިންވެސް އެންމެ ފެންވަރުދަށް ބޭފުޅާ ކަމަށެވެ. 

Advertisement

އެމަނިކުފާނު ވެރިކަމަށް އައުމަށް ރައްޔިތުންނަށް ވީ ގިނަ ވައުދުތަކެއް ފުއްދާދެވިފައި ނުވާކަން ޑރ ޖަމީލު ފާހަގަކުރެއްވި އެވެ. އަދި މި ވެރިކަމުގައި ރައްޔިތުންނަށް ބޮޑެތި ތަކުލީފުތަކެއް އުފުލަން ޖެހިފައިވާކަންވެސް ފާހަގަކުރެއްވި އެވެ. 

އެއާއެކު ޑރ ޖަމީލު ވިދާޅުވީ ރައީސް ޞާލިހަށް ދެވަނަ ދައުރެއް ދޭން ރައްޔިތުން ބޭނުން ނުވާކަމަށެވެ. އެމަނިކުފާނު ރިޔާސީ އިންތިޚިބާގުގައި ނާށިގަނޑު ހިއްޕަވައިގެން ނިކުމެވަޑައިގެން ސަލާން ޖެހި ނަމަވެސް، ބަޔަކު އެމަނިކުފާނަށް ވޯޓު ނުދޭނެކަމަށް ޑރ ޖަމީލު ވިދާޅުވި އެވެ. 

ޑރ ޖަމީލު އިތުރަށް ވިދާޅުވީ ރައްޔިތުން ބޭނުންވަނީ ރައީސް ޞާލިހުގެ ސިޔާސީ ކެރިއަރު ކުރިއަރުވަން ނޫން ކަމަށެވެ. 

ކުރިއަށް އޮތް ރިޔާސީ އިންތިޚާބަށް ރައްޔިތުން ނިކުންނަނީ ގައުމަށް ހެޔޮ ގޮތް ހޯދައިދީ ގައުމު މިހާރު މި އޮތް ހާލަތުން ނެގުމަށްކަމަށް ޑރ ޖަމީލު ވިދާޅުވި އެވެ.

އެމަނިކުފާނު މިފަދައިން ވިދާޅުވެފައިވާއިރު، ގައުމު މިހާރު މި އޮތް ހާލަތުން ނަގައި ކޮޅަށް ޖެހުމަށް ވަރުގަދަ އިގްތިސާދީ ލީޑަރެއް ބޭނުންވާކަމަށް އިދިކޮޅު އިއްތިހާދުން ދަނީ ބުނަމުންނެވެ. އަދި އެކަން ކޮށްދެވޭނެ ހަމައެކަނި ލީޑަރަކީ ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމު ކަމަށް އެ ފަރާތްތައް ދަނީ ތަކުރާރުކޮށް ބުނަމުން ނެވެ.