ފަލަސްޠީނުގެ ހުވާރާ ވިލެޖް ފުހެލުމަށް އިޒްރާއިލުން ކުރާ މަސައްކަތް ސަޢުދީޢަރަބިއްޔާއިން ކުށްވެރިކޮށްފިއެވެ.
ހުކުރުދުވަހު ސަޢުދީޢަރަބިއްޔާގެ މިނިސްޓްރީ އޮފް ފޮރިންގ އެފެއާޒް އިން އިޒްރާއިލްގެ ޢަމަލުތައް ކުށްވެރިކޮށް ބުނެފައިވަނީ ބައިނަލްއަޤްވާމީ ފަރާތްތަކުން ޒިންމާއަދާކުރަން ޖެހޭ ކަމަށާއި، މިފަދަ ނުބައި ޢަމަލުތަކުން ފަލަސްޠީނުގެ ރައްޔިތުން ރައްކާތެރި ކޮށްދޭން ޖެހޭ ކަމަށެވެ.
ސަޢުދީޢަރަބިއްޔާގެ ފޮރިން މިނިސްޓްރީ އިން ވަނީ އިޒްރާއިލްގެ އިސް ފަރާތަކުން ހުވާރާ ފުހެލުމަށް ގޮވާލި ޒިންމާދާރުކަން ކުޑަ ޢަމަލު ކުށްވެރިކޮށްފައެވެ. އަދި އެގޮވާލުމުގެ ސަބަބުން ކުރިއަށްދިޔަ އިންސާނިއްޔަތާއި ޚިލާފުޢަމަލުތައް ހަރުކަށި އިބާރާތުން ވަނީ ކުށްވެރިކޮށްފައެވެ.
އިޒްރާއިލްގެ ސީނިއާ މިނިސްޓަރެއް ކަމަށްވާ ބެޒޭލް ސްމޮޓްރިޗް އިޒްރާއިލް ޓީވީގައި ވާހަކަ ދައްކަމުން ފަލަސްޠީނުގެ ހުވާރާ ވިލެޖް ވީ ފުހެލަން ކަމަށް ވަނީ ބުނެފައެވެ. ދާދި ފަހުން ހުވާރާ ވިލެޖްގައި ބޮޑު ހަމަނުޖެހުމެއް ވަނީ ހިނގައިފައެވެ. އިޒްރާއިލުގެ މީހުން ގަދަކަމުން ހުވާރާ ތެރެއަށް ވަދެގަނެ އުނދަގޫތަކެއް ކުރުމުން ހުވާރާގެ ރައްޔިތުން ދިން ރައްދުގައި އިޒްރާއިލްގެ ދެ މީހަކު ވަނީ މަރުވެފައެވެ.
ހަމަ މިފަދަ ވާހަކަތަކެއް ދާދި ފަހަކުން ނަތަންޔާހޫ ލީޑް ކުރާ ފާ ރައިޓް ކޯލިޝަންގެ މެމްބަރެއް ކަމަށްވާ ޒިވިކާ ފޮގެލް ވެސް ވަނީ ދައްކާފައެވެ. އަދި އޭނާއަކީ އިޒްރާއިލްގެ ޕާލިމެންޓުގެ މެމްބަރެއްވެސް މެއެވެ.
"ހުވާރާއިން ޓެރަރިސްޓަކު އައީ، ދެން އެވީ ހުވާރާ ބަންދުކޮށް ރޯކޮށްލައި އަންދާލަން، މިއީ އަހަރެން ދެކެން ބޭނުންވާ މަންޒަރަކީ، އަހަރެމެނަށް އެމީހުން ބިރުގަންނަވައިލެވޭނީ އޭރުން، އާދީއްދަ ދުވަހުގެ މަރަށް ފަހު ވިލެޖްތައް ވީ އަންދާލަން، އިޒްރާއިލް ސިފައިން ފިޔަވަޅެއް ނާޅަންޏާ" ޒިވިކާ ފޮގެލް ބުނެފައިވެއެވެ.
މިފަހަކަށް އައިސް އިޒްރާއިލްގެ އަނިޔާވެރިކަން ވަނީ ވަރަށް ބޮޑަށް އިތުރުވެފައެވެ. އިޒްރާއިލްގެ ސިފައިންގެ އިތުރުން އިޒްރާއިލްގެ އާންމުން ނުކުމެ ފަލަސްޠީިނުގެ އާންމުންނަށް ހަމަލާދީފައިވެއެވެ.
Advertisement
This content is created and paid for by advertisers and does not involve Voice Journalists
