މި ސަރުކާރުން އަންނަނީ ޤާނޫނީ ވަކީލުން ގެ ޙައްޤުތަކަށް އަރައިގަނެ، އެފަރާތްތަކުގެ މަސައްކަތަށް ހުރަސް އަޅާ ހައްޔަރުކޮށް ބިޑި އަޅުވަމުން ކަމަށް އިދިކޮޅު ކޯލިޝަނުން ބުނެފި އެވެ. 

އިދިކޮޅުގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ޖަލަށް ލާން ހުކުމް ކުރުމާއި ގުޅިގެން އިދިކޮޅުން ސިލްސިލާކޮށް ކޮންމެ ރެއަކު ކުރިއަށް ގެންދާ މުޒާހަރާގެ ތެރެއިން ޕީޕީއެމްގެ އިސްތިޢުނާފް ކޮމިޓީގެ މުޤައްރިރު އަދި ޤާނޫނީ ވަކީލު މުޙައްމަދު ރާޤިބު ހައްޔަރު ކުރުމާއި ގުޅިގެން އެކަން ކުށްވެރިކޮށް ނެރުނު ބަޔާނެއްގައި ބުނީ، ދިވެހިރާއްޖެގެ ޖުމްހުރިއްޔާގެ ޤާނޫނުއަސާސީ އާއި ޤާނޫނޫ ތަކުން ލިބިދީފައިވާ ޚިޔާލު ފާޅު ކުރުމާއި ސުލްޙަވެރިކަމާއެކު އިޙުތިޖާޖު ކުރުމުގެ ޙައްޤުގެ ބޭނުންކޮށް ޕީ.ޕީ.އެމް އިން މަގުމަތީ ހިންގާ ހަރަކާތްތަކަށް ފުލުހުން މެދުވެރިކޮށް ސަރުކާރުން ހުރަސް އަޅަމުންގެންދާ ކަމަށެވެ. 

އަދި ހާލަތާއި ނުބައްދަލު ބާރުގެ ބޭނުންކޮށް ދިވެހި ރައްޔިތުންނަށް އަނިޔާކޮށް، އިޙުތިޖާޖުގެ ބައިވެރިން ސުލްޙަވެރިކަމާއެކު ތިއްބާ، އެއްވެސް ކަމަކާ ނުލާ ހިފާ ހައްޔަރުކޮށް އެތައް އިރެއް ވަންދެން ކޮންމެ ރެއަކު ބަންދުކޮށްފައި ބޭތިއްބުމަކީ ޑިމަކްރަސީއާއި ވަރަށްވެސް ބީރައްޓެހި ކަންކަން ކަމަށާއި އެއީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއާއި ވެސް ޚިލާފު ކަމެއް ކަމަށް އިދިކޮޅުން ބުނެފައިވެއެވެ. 

Advertisement

މީގެ އިތުރުން އިދިކޮޅުން ބުނީ، އެ ޕާޓީން ހިންގާ ޙަރަކާތްތަކުގައި ޤާނޫނީ އެހީތެރިކަން ފޯރުކޮށްދިނުމުގައި މަސައްކަތް ކުރައްވަމުން ގެންދަވާ ޤާނޫނީ ވަކީލުންގެ މަސައްކަތަށް ހުރަސް އަޅާ އެމީހުންގެ ޙައްޤުތައް ގެއްލޭ ގޮތަށް ޢަމަލު ކުރަމުން ގެންދިއުމަކީ އެއްގޮތަކަށްވެސް ބަލައިގަނެވޭނޭ ކަމެއް ނޫން ކަމަށެވެ.

"އިޙުތިޖާޖުގެ ކަންކަން މޮނިޓަރކޮށް ކަން ހިނގާ ނުހިނގާ ގޮތް ބައްލަވަން އިސްކޮށް ތިއްބަވާ ޤާނުނީ ވަކީލުންގެ ޙައްޤުތަކަށް އަރައިގަނެ، އެފަރާތްތައް ހައްޔަރުކޮށް ބިޑިއެޅުވުން ފަދަ ޢަމަލުތައްވެސް މިހާރުވަނީ ކުރަން ފަށާފައެވެ. އެގޮތުން މިޕާޓީގެ އިސްތިޢުނާފް ކޮމިޓީގެ މުޤައްރިރު އަދި ޤާނޫނީ ވަކީލު މުޙައްމަދު ރާޤިބު ހައްޔަރުކުރުން އެންމެ ހަރުކަށި އިބާރާތުން ކުށްވެރިކޮށް ރާޤިބު މިހާރުން މިހާރަށް ދޫކޮށްލުމަށް ގޮވާލަމެވެ." އިދިކޮޅުން ބުނެފައިވެއެވެ. 

މީގެ އިތުރުންވެސް އިިދިކޮޅުން ވަނީ ސަރުކާރުގެ ޣައިރު ޤާނޫނީ ޢަމުރު ތަންފީޒުކޮށް އިޙުތިޖާޖުތަކުގައި ހާލަތާއި ނުބައްދަލު ބާރުގެ ބޭނުންކޮށް ޤާނޫނާއި ޚިލާފަށް ދިވެހި ރައްޔިތުން ހިފާ ހައްޔަރު ކުރަމުން ގެންދާ މައްސަލަ ބައްލަވައިދެއްވުމަށް ދައުލަތުގެ ކަމާއިބެހޭ މުއައްސަސާތަކަށްވެސް ގޮވާލާފައެވެ.