މިއަހަރުވެސް ދިވެހިރާއްޖެއަށް 50 ޓަނުގެ ކަދުރު ލިބޭނެކަމަށް ސައޫދީ ސަރުކާރުން އަންގާފައިވާ ކަމަށް އިސްލާމިކު މިނިސްޓްރީން ބުނެފިއެވެ.
އިސްލާމިކް މިނިސްޓްރީން މިއަދު ބުނީ، މިނިސްޓްރީއަށް ކަދުރު ލިބުމުން ކަދުރު ބެހުމުގެ މަސައްކަތް ކުރިއަށް ގެންދިޔުމަށް ހަމަޖެހިފައިވާ ކަމަށެވެ. އެހެންނަމަވެސް ލިބޭނެ އިރެއް ހާމަކޮށްފައެއް ނުވެއެވެ.
ސައުދީ ސަރުކާރުން މިދިޔަ އަހަރު ވެސް 50 ޓަނު ކަދުރު ރާއްޖެއަށް ހަދިޔާ ކުރިއެވެ. އެހެންނަމަވެސް މިދިޔަ އަހަރު ކަދުރު ލިބިފައިވަނީ ވަނީ ރޯދަ މަސް ނިމުނު ފަހުންނެވެ.
ކޮންމެ އަހަރަކުވެސް ރޯދަ މަހާއި ދިމާކޮށް ސައުދީ ސަރުކާރުން ރާއްޖެއަށް ކަދުރު ހަދިޔާ ކުރެއެވެ. މި ކަދުރު ބެހުމުގެ ކަންކަން ކުރަމުންދަނީ އިސްލާމިކް މިނިސްޓްރީގެ ބެލުމުގެ ދަށުން ވަކި ޚާއްސަ އުސޫލުތަކެއްގެ ތެރެއިންނެވެ.
މާލެއާއި ހުޅުމާލެ އަދި ވިލިމާލޭގައި ދިރިއުޅޭ ރައްޔިތުންނަށް މިދިޔަ އަހަރު ކަދުރު ބަހާފައި ވަނީ، މިނިސްޓްރީ އޮފް އިސްލާމިކް އެފެއާޒު މެދުވެރިކޮށް އިސްލާމީ މަރުކަޒުގައެވެ. އަދި ރަށްރަށަށް އެ ރަށު ކައުންސިލްތަކާއި ސިޓީ ކައުންސިލްތައް މެދުވެރިކޮށެވެ.
Advertisement
This content is created and paid for by advertisers and does not involve Voice Journalists
