ކުވެއިތު ފަންޑުގެ އެހީގައި ހަތް ރަށެއްގައި އަލަށް އިމާރާތްކުރާ ހޮސްޕިޓަލްތަކުގެ މަސައްކަތް މި ހަފުތާގައި ހަވާލުކުރާނެ ކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެ އެވެ.

ފިނޭންސް މިނިސްޓަރު އަމީރު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި މިލަންދޫ ދާއިރާގެ މެމްބަރު އަލީ ރިޒާ ކުރެއްވި ސުވާލަށް ޖަވާބުދެއްވަމުން ނެވެ. 

އަލީ ރިޒާ ވަނީ ހޮސްޕިޓަލުތައް އެޅުމަށް ކުވެއިތު ފަންޑުން ފައިސާ ހަމަޖެހޭނެކަމަށް މީގެ ކުރިން މިނިސްޓަރު ވިދާޅުވެފައިވާއިރު، އެ ފަންޑު ހަމަޖެހިފައި ވޭތޯ އައްސަވާފަ އެވެ. އަދި ހޮސްޕިޓަލު އަޅަން ފެށޭނެ މުވައްދަތެއް ސާފުކޮށްދިނުމަށް މިނިސްޓަރު އަރިހުން އެދިލައްވާފަ އެވެ. 

މެމްބަރު ރިޒާގެ ސުވާލަށް ޖަވާބުދެއްވަމުން އަމީރު ވިދާޅުވީ ހޮސްޕިޓަލުތައް އެޅުމަށް ކުވެއިތު ފަންޑު ހަމަޖެހިފައިވާ ކަމަށެވެ. އަދި މި ހަފްތާގެ ތެރޭގައި ހޮސްޕިޓަލުތައް އެޅުމަށް ހަވާލުކުރެވޭނެކަމަށް މިނިސްޓަރު ވިދާޅިވިއެވެ. 

ކުވެއިތު ފަންޑުން 7 ސަރަހައްދެއްގައި ހޮސްޕިޓަލު އެޅުމަށް ނިންމާފައިވާކަމަށް ފިނޭންސް މިނިސްޓަރު އަމީރު ވަނީ ވިދާޅުވެފަ އެވެ. އޭގެ ތެރޭގައި ހިމެނެނީ ހދ ހަނިމާދޫ، ށ. މިލަންދޫ، ނ.ވެލިދޫ، ކ.ތުލުސްދޫ، އދ. މާމިނގިލީގެ އިތުރުން ވ.ފެލިދޫ އަދި ތ.ވިލުފުއްޓެވެ. 

މިއިން ކޮންމެ ރަށެއްގައި 30 އެނދުގެ ހޮސްޕިޓަލެއް އެޅުމަށް ވަނީ ހަމަޖެހިފަ އެވެ. 

ކުވޭތު ފަންޑުގެ އެހީގައި ހޮސްޕިޓަލް އެޅުމަށް އިއުލާނުކުރުމުން ހުށަހެޅި ބީލަންތަކުގެ އަގު ބޮޑުވުމުގެ ސަބަބުން އެ މަޝްރޫއަށް އަލުން އިއުލާނު ކުރަން ޖެހުނުކަން ފާހަގަކޮށްލެވެ އެވެ.