ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ޖަލަށް ލުމަށް ކުރި ހުކުމުގެ އިސްތިއުނާފް ބަލައިގަތުމާއިމެދު ހައިކޯޓުން ގޮތެއް ނިންމަންދެން އެ ކޯޓަށް ދާނެ ކަމަށް އިދިކޮޅު ޕީޕީއެމް/ ޕީއެންސީ ކޯލިޝަނުން ބުނެފިއެވެ.
ރައީސް ޔާމީންގެ މައްޗަށް ކްރިމިނަލް ކޯޓުން އިއްވި ޖަލު ހުކުމުގެ އިސްތިއުނާފު ހައިކޯޓަށް ހުށަހެޅުމުން އެކޯޓުން އެމައްސަލަ ބަލައި ގަތުމާއިމެދު އަދިވެސް ގޮތެއް ނިންމާފައި ނުވާތީ ޕީޕީއެމްގެ ލީޑާޝިޕްގެ ބޭފުޅުން ވަނީ މިއަދު ހައިކޯޓަށް ވަޑައިގެންފައެވެ.
ހައިކޯޓަށް ވަޑައިގަތުމަށްފަހު، ނިކުމެވަޑައިގެން ނޫސްވެރިންނާއި ބައްދަލުކުރައްވާ އިދިކޮޅު ކޯލިޝަން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله (އަދުރޭ) ވިދާޅުވީ ރައީސް ޔާމީން އަކީ އިދިކޮޅު ކޯލިޝަންގެ ރިޔާސީ ކެންޑިޑޭޓަށް ވާއިރު، އެމަނިކުފާނު 11 އަހަރަށް ޖަލަށް ލުމަށް ކޮށްފައިވާ ހުކުމް ހައިކޯޓުގައި އިސްތިއުނާފު ކުރި މައްސަލަ ބަލައި ގަތުމާއި މެދު އެ ކޯޓުން ގޮތެއް ނުނިންމާ ލަސްކުރާ ކޮންމެ ދުވަހަކީ ދިވެހި ރައްޔިތުންގެ ކަންބޮޑުވުންތައް އިތުރުވާ ދުވަހެއް ކަމަށެވެ.
އެހެން ނަމަވެސް ހައިކޯޓުގެ ރެޖިސްޓްރާރ އިދިކޮޅުގެ ކޯލިޝަނާއި ބައްދަލު ނުކުރައްވާ ކަމަށްވެސް އަދުރޭ ވިދާޅުވިއެވެ.
އަދުރޭ އިތުރަށް ވިދާޅުވީ، އިދިކޮޅުގެ ލީޑާޝިޕުން މާދަމާވެސް ހައިކޯޓަށް ދާނެ ކަމަށާ، ހައިކޯޓުން މައްސަލަ އާއި މެދު ގޮތެއް ނިންމަންދެން އިދިކޮޅުގެ މަސައްކަތް ހުއްޓާ ނުލައްވާނެކަމަށެވެ.
"14 ދުވަސް ތެރޭގައި ޖަވާބު ދޭން ގާނޫނުގައި އޮންނާތީ، ކޮންމެހެން 14 ދުވަސް ހަމަކުރަން ޖެހޭނެ ކަމަކަށް އަޅުގަނޑުމެން ގަބޫލެއް ނުކުރަން. މައްސަލައިގެ ބާވަތުން އިސްކަންދޭންޖެހޭ މައްސަލަތައް ހުންނާނެ ކަމަށް އަޅުގަނޑު ގަބޫލު ކުރަނީ. މިވަގުތު ހައިކޯޓަށް ހުށަހެޅިފައިވާ އެންމެ މުހިންމު އެންމެ ހައްސާސް މައްސަލައަކަށްވާނީ ރައީސް ޔާމީންގެ ފަރާތުން އިސްތިއުނާފް ކޮށްފައި އޮތް މައްސަލަ. އެއީ ސަބަބަކީ އެމަނިކުފާނަކީ ފަސް އަހަރު ވަންދެން ދިވެހިރާއްޖޭގެ ރައީސުލްޖުމްހޫރިއްޔާ ކަމުގެ މަގާމުގައި ހުންނެވި ބޭފުޅެއް. އަދި މިވަގުތު ދިވެހިރާއްޖޭގެ އިދިކޮޅު ލީޑަރު. އަދި އޭގެ އިތުރުން ޕީޕީއެމް ޕީއެންސީގެ ރިޔާސީ ކެންޑިޑޭޓް. މި ހުރިހާ ގޮތަކަށް ވިސްނާއިރުވެސް އެ މައްސަލަ އަށް އިސްކަންދޭންޖެހޭ." އަދުރޭ ވިދާޅުވިއެވެ.
އަދުރޭ އިތުރަށް ވިދާޅުވީ އިދިކޮޅުން ކުރަމުން ދަނީ ހަމައެކަނި ޕީޕީއެމް، ޕީއެންސީގެ މަސައްކަތެއް ނޫން ކަމަށާ، އެއީ ދިވެހި ރައްޔިތުންގެ މަސައްކަތެއް ކަމަށެވެ.
އަދި މީގެ ކުރިންވެސް ރައީސް ޔާމީން ޖަލަށް ލުމަށް ކުރި ހުކުމް އިސްތިއުނާފް ކޮށްގެން އެ މައްސަލައަށް ހައިކޯޓުގައި އަހަރެއްވެގެން ދިޔަ ކަމަށާ، އެއަށްފަހު ސްޕްރީމްކޯޓަށް މައްސަލަ ލައި، އެ ކޯޓުން އެމަނިކުފާނުގެ ކުށެއް ނެތް ކަން ސާބިތުވެފައިވާކަން އަދުރޭ ފާހަގަކުރެއްވިއެވެ. އޭގެ ސަބަބުން އެމަނިކުފާނުގެ އާއިލާއަށްވެސް ބޮޑެތި ގެއްލުންތަކެއް ލިބިގެންދިޔަކަނޑ ފާހަގަކުރައްވައި އަދުރޭ ވިދާޅުވީ މިފަހަރު ވެސް ކަންކަން ހިނގަމުންދަނީ އެފަދައިން ކަމަށެވެ.
ވުމާއެކު އިދިކޮޅުން ހައިކޯޓަށް އައީ އެ ކަންބޮޑުވުން އޮތުމުން ކަމަށާ، އެ މައްސަލަ އާއި މެދު ގޮތެއް ނިމެންދެން ކޯޓަށް ވަޑައިގަންނަވާނެ ކަމަށް އަދުރޭ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
