ޕީޕީއެމްގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ޖަލު ހުކުން ކުރާ ކޮންމެ ފަނޑިޔާރަކަށް ޕްރޮމޯޝަންދެމުންދާތީ އެ މައްސަލަ މަޖިލީހުގެ ޖުޑިޝަރީ ކޮމެޓީއަށް ހުށައަޅައިފި އެވެ. 

އެ މައްސަލަ ހުށައަޅުއްވާފައިވަނީ އިދިކޮޅު އިއްތިހާދުގައި ހިމެނޭ ޕީއެންސީގެ ނައިބުރައީސް އަދި މަޖިލީހުގެ ޕީއެންސީގެ ޕީޖީ ލީޑަރު އާދަމް ޝަރީފު އުމަރެވެ. 

އާދަމް ޝަރީފު ހުށައެޅި މައްސަލައިގައި ބުނެފައިވަނީ މީގެ ކުރިން ކްރިމިނަލް ކޯޓުން ރައީސް ޔާމިނަށް ހުކުމް ކުރި އެ ކޯޓުގެ ފަނޑިޔާރު އަލީ ރަޝީދު، ހުކުމަށްފަހު ސުޕްރިމް ކޯޓަށް ޕްރޮމީޓުކޮށްފައި ވަނިކޮށް، އެފަހުން ރައީސް ޔާމީނުގެ މައްޗަށް 11 އަހަރުގެ ޖަލުހުކުމެއް ކުރި ކްރިމިނަލް ކޯޓުގެ ފަނޑިޔާރު އަހުމަދު ޝަކީލު ހައިކޯޓަށް އައްޔަންކޮށްފައި ވާކަމަށެވެ. 

ޕީއެންސީގެ ޕީޖީ ލީޑަރު އާދަމް ޝަރީފް އުމަރު މަޖިލީހުގެ ރައީސް މުހައްމަދު ނަޝީދަށް ފޮނުއްވި ސިޓީގައި ފާހަގަކުރި ގޮތުގައި ޝަކީލް ހައިކޯޓަށް އައްޔަންކުރަން ނިންމި އިރު، މީގެ ކުރިން ކްރިމިނަލް ކޯޓުގެ ކުރީގެ އިސް ގާޒީ އަލީ ރަޝީދު ރައީސް ޔާމީންގެ މައްޗަށް ކުރި ހުކުމާ ވިދިގެން އޭނާވެސް ވަނީ ސުޕްރީމް ކޯޓުގެ ފަނޑިޔާރަކަށް އައްޔަންކޮށްފަ އެވެ.

ސަރުކާރުގެ އިސްވެރިންގެ އަގުލަބިއްޔަތު އޮންނަ ޖޭއެސްސީއާ ގުޅިގެން ސަރުކާރުން ރައީސް ޔާމީނަށް ހުކުމްކުރި ފަނޑިޔާރުންނަށް ޝަރުއީ ދާއިރާގެ އެންމެ މަތީ ކޯޓުތަކުން އިސް މަގާމުތައް ދިނުމަކީ ރައީސް ޔާމީންގެ މައްޗަށް އަނިޔާވެރިވުމަށް ސަރުކާރުން ހިތްވަރުދެމުންދާކަން ވަރަށް ސާފުކޮށް އެނގޭ ކަމެއް ކަމަށް އާދަމް ޝަރީފް ވިދާޅުވި އެވެ.

އެކަމަކީ ރާއްޖޭގެ ޝަރުއީ ނިޒާމަށް ރައްޔިތުން ކުރަންޖެހޭ އިތުބާރަށް ބުރޫއަރައި، ރާއްޖޭގެ ރޫލް އޮފް ލޯ ނެގެހެއްޓުމަށް ބޮޑެތި ގޮންޖެހުންތައް ކުރިމަތިވެދާނެ އަދި ގައުމުގެ ސުލްހަމަސްލަހަތު ގެއްލި، މުޅި ގައުމު ޖަރާބުގެ މަގަށް ފުރޮޅިގެން ހިނގައިދާނެ ކަމެއް ކަމަށްވެސް ވިދާޅުވި އެވެ.

އާދަމް ޝަރީފް ވިދާޅުވި ގޮތުގައި، ޔާމީންގެ ހުކުމް ހައިކޯޓުގައި އިސްތިއުނާފުކޮށްފައި ވަނިކޮށް، ކްރިމިނަލް ކޯޓުން އެ ހުކުމްކުރި ގާޒީ ޝަކީލް ހައިކޯޓުގެ މަގާމަކަށް ކުރިއެރުން ދިނުމަކީ ހައިކޯޓުގައި އިސްތިއުނާފަށް ހުށަހަޅާފައިވާ މައްސަލައަށް އިންސާފު ލިބުމަށް ހުރަސް އަޅައި، މައްސަލައަށް ސަރުކާރުގެ ނުފޫޒު ފޯރުވައި ބޭނުން ގޮތަކަށް ހުކުމް ކުރުމަށް ހިންގާފައިވާ ކަމެކެވެ.

އެހެންކަމުން އެ ކަމަކީ ކޮރަޕްޝަން ހިމެނޭ ކަމެއްކަމަށް ވާތީ، އެ މައްސަލަ ސީރިއެސް މައްސަލައެއްގެ ގޮތުގައި ބެލުމަށް މަޖިލީހުގެ ޖުޑިޝަރީ ކޮމެޓީއަށް އާދަމް ޝަރީފު ވަނީ އެދިލައްވާފަ އެވެ.