އާދައިގެ ކުށްތަކުގައި ވާނުވާ ޖަހާ ބަންދުކޮށްފައި އެއްވެސް މީހަކު ނުހުންނާނެކަމަށް ހޯމް މިނިސްޓަރު އިމްރާނު އަބްދުالله ވިދާޅުވެއްޖެ އެވެ. 

ރައްޔިތުންގެ މަޖިލީހުގެ މިއަދުގެ ޖަލްސާގައި، މަޖިލީހުގެ ކާށިދޫ ދާއިރާގެ މެމްބަރު އަބްދުالله ޖާބިރު ވަނީ ވާނުވާ ބަންދުގައި މީހުން ބޭތިއްބުން ނިމުމަކަށް ގެންނާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވީ ވައުދުފުޅު ކިހާ ވަރަކަށް ފުއްދިއްޖެތޯ އައްސަވާފަ އެވެ. އަދި ވާނުވާ ޖަހާ ބަންދުކޮށްފައި ޖަލުގައި ކިތަށް މީހުން ތިބިތޯ ޖާބިރު މިނިސްޓަރު އިމްރާނު އަރިހުން އެއްސެވި އެވެ. 

ޖާބިރުގެ އެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ މިހާރު ވާނުވާ ބަންދުގައި ތިބޭނީ ހަމައެކަނި ބޮޑެތި ކުށްތަކުގެ ތުހުމަތު ކުރެވޭ ފަރާތްތައް އެކަނި ކަމަށެވެ. އޭގެ ތެރޭގައި ހިމެނެނީ މަސްތުވާތަކެއްޗާއި، މާރާމާރީ ނުވަރަ ގަތުލުގެ އިތުރުން ޖިންސީ ގޯނާ ކުރިކަމަށް ތުހުމަތުކުރެވޭ މީހުންކަން މިނިސްޓަރު ފާހަގަކުރެއްވި އެވެ. 

Advertisement

އެއާއެކު މިނިސްޓަރު ވިދާޅުވީ އާދައިގެ ކުދި ކުދި ކުށްތައްކަމަށް ގަބޫލުކުރެވޭ ކަންކަމުގައި ވާނުވާ ޖަހާ ބަންދުކޮށްފައި މިހާރު މީހުން ނުތިބޭނެ ކަމަށެވެ. 

ހޯމް މިނިސްޓަރު ވިދާޅުވީ ހޯމް މިނިސްޓްރީން މަދުވެގެން މަހަކު އެއްފަހަރު ޕްރޮސެކިއުޓާ ޖެނެރަލާއި ބައްދަލުކޮށް ޝަރީއަތް ނިމެންދެން ބަންދުކޮށްފައި ތިބޭ މީހުން ބެލުމަށްފަހު އޭގެ ތެރެއިން ދޫކޮށްލެވެން ތިބި މީހުން ދޫކުރަމުން ދާ ކަމަށެވެ. 

ބޮޑެތި ކުށްތަކަށް އަރައިގަނެގެން ހައްޔަރުކޮށްފައިވާ ގިނަ ބައެއްގެ ޝަރީއަތް ނުނިމި ދިގުލައިގެން ދާތީ، ޖަލުގައި ބައިތިއްބަން ޖެހުމަކީ ކުރިމަތިވެފައިވާ ވަރަށް ބޮޑު ގޮންޖެހުމެއްކަމަށް މިނިސްޓަރު އިމްރާނު ވިދާޅުވި އެވެ.

އެފަދަ ފަރާތްތައް މުޖުތަމައަށް ދޫކޮށްލައިގެންވެސް ނުވާނެކަމަށާއި، އެކަންކަމަށް އޮތް ހައްލަކީ ޝަރީއަތް އަވަސް ކުރުންކަން މިނިސްޓަރުގެ ޖަވާބުގައި ފާހަގަކުރެއްވި އެވެ.