ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ޖަލަށް ލުމަށް ކުރި ހުކުމުގެ އިސްތިއުނާފް ބަލައިގަތުމާއިމެދު ހައިކޯޓުން ގޮތެއް ނުނިންމާތީ އިދިކޮޅު ޕީޕީއެމް/ޕީއެންސީގެ ލީޑާޝިޕުގެ ބޭފުޅުން މިއަދުވެސް ހައިކޯޓަށް ވަޑައިގެންފި އެވެ.
ރައީސް ޔާމީންގެ މައްޗަށް ކްރިމިނަލް ކޯޓުން އިއްވި ޖަލު ހުކުމުގެ އިސްތިއުނާފު ހައިކޯޓަށް ހުށަހެޅުމުން އެކޯޓުން އެމައްސަލަ ބަލައި ގަތުމާއިމެދު އަދިވެސް ގޮތެއް ނިންމާފައި ނުވާތީ ޕީޕީއެމްގެ ލީޑާޝިޕްގެ ބޭފުޅުން ވަނީ އިއްޔެވެސް ވަނީ ހައިކޯޓަށް ވަޑައިގެންފައެވެ. އެހެންނަމަވެސް ހައިކޯޓުގެ ރެޖިސްޓްރާރ ވަނީ އެ ބޭފުޅުންނާއި ބައްދަލު ކުރެއްވުމަށް ދެކޮޅު ހައްދަވާފައެވެ.
އަދި މިއަދުވެސް ހައިކޯޓަށް ވަޑައިގަތުމުން، އިދިކޮޅުގެ ލީޑާޝިޕާއި ބައްދަލު ކުރައްވަން ރެޖިސްޓްރާރ ދެކޮޅު ހައްދަވާފައިވާކަމަށް އިދިކޮޅު ކޯލިޝަން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله (އަދުރޭ) ވިދާޅުވިއެެވެ.
އެކަމާއި ނުރުހުން ފާޅުކުރައްވައި އަދުރޭ ވިދާޅުވީ، ހައިކޯޓުގެ ރެޖިސްޓްރާރ ގެ މަގާމުގައި ހުންނަ ފަރާތަކީ ރައްޔިތުންގެ ފައިސާއިން މުސާރަ ނަންގަވައިގެން ހުންނަވާ ބޭފުޅެއް ކަމަށާ އެފަދައިން ބައްދަލުކުރަން ދެކޮޅު ނުހެއްދެވޭނެ ކަމަށެވެ.
އަދި ރައީސް ޔާމީންގެ މައްސަލައިގައި ކަންކަން ވަމުން އަންނަނީ ސަރުކާރުގެ ނުފޫޒު އޭގެ ތެރެއަށް ފޯރައިގެން ކަމަށާ، އެއީ ސީދާ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަންގަވައިގެން ހިންގޭ ކަންކަން ކަމަށްވެސް އަދުރޭ ތުހުމަތު ކުރެއްވިއެވެ.
މިއާއެކު އަދުރޭ ވަނީ، ރައީސް ޔާމީން ގެ މައްސަލަ އަކީ ހަމައެކަނި އެމަނިކުފާނާއި ގުޅުން ހުރި ކަމެއް ނޫން ކަމަށާ އަދި އެއީ ދިވެހި ރައްޔިތުންނާއިވެސް ގުޅުން ހުރި ކަމެއް ކަން ފާހަގަ ކުރައްވައި، އެ މަނިކުފާނުގެ މައްސަލައިގެ އިސްތިއުނާފާއި މެދު ގޮތެއް ނިންމަންދެން ހައިކޯޓަށް ވަޑައިގަންނަވާނެ ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
