Advertisement
ސަރުކާރުން އިންތިޚާބުތައް ނަގަން ބަޖެޓުން ބޭރުން ޚަރަދުކުރުން ހުއްޓުވަން ޖެހޭ: އަލީ ހުސެއިން
ސަރުކާރުން ނުފޫޒު ފޯރުވައިގެން އިންތިޚާބުތައް ކާމިޔާބުކުރުމަށް ބަޖެޓުން ބޭރުން ޚަރަދުކުރުން ހުއްޓުވަން ޖެހޭކަމަށް މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިން ވިދާޅުވެއްޖެ އެވެ.
އަލީ ހުސެއިން މިފަދައިން ވިދާޅުވެފައިވަނީ ލޯކަލް ކައުންސިލް އިންތިޚާބުގެ ގާނޫނަށް ސަރުކާރުގެ ފަރާތުން ހުށައެޅުއްވި އިސްލާހަށް ފާޑުވިދާޅުވެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ނެވެ.
އަލީ ހުސެއިން ވިދާޅުވީ ގަވައިދު އިސްލާހު ކުރާގޮތަށް ޤާނޫނުތަކަށް އިސްލާހު ގެންނަ ނަމަ، އެ ގާނޫނެއްގެ ސިފަ ގެއްލިގެން ދާނެ ކަމަށެވެ. ލޯކަލް ކައުންސިލް އިންތިޚާބުގެ ގާނޫނަށް އެތައް ފަހަރެއްގެ މަތިން އިސްލާހުތައް ގެނެސްފައިވާއިރު، އެއީ ކުޅޭ ކުޅިވަރަކަށް ހަދާފައިވާކަމަށް އަލީ ހުސެއިން ވިދާޅުވި އެވެ.
Advertisement
އޭނާ ވިދާޅުވީ އެ އިސްލާހަށްވުރެ ރައްޔިތުންގެ މަޖިލީސް އިންތިޚާބުގެ ގާނޫނު ނުވަތަ އާންމު އިންތިޚާބުތަކާއި ބެހޭ ގާނޫނަށް އިސްލާހު ގެނައުން މާ ރަނގަޅު ކަމަށެވެ.
އެގޮތުން އިންތިޚާބުތައް ކާމިޔާބު ކުރުމަށް ސަރުކާރުން ނުފޫޒު ފޯރުވަމުންދާ މިންވަރު އެންމެ ފަހުން ބޭއްވި މަޖިލީހުގެ ކޮމަންޑޫ ދާއިރާގެ ބައި-އިލެކްޝަނުންވެސް ފެނިގެން ދިޔަކަމަށް އަލީ ހުސެއިން ވިދާޅުވި އެވެ. އެ އިންތިޚާބަށް އެކަނި ސަރުކާރުން 400 މިލިއަނަށްވުރެ ގިނަ ރުފިޔާ ޚަރަދުކޮށްފައިވާއިރު، އެއީ ބަޖެޓުގައި ހިމަނައިގެން ކޮށްފައިވާ ޚަރަދުތައް ނޫންކަން އޭނާ ފާހަގަކުރެއްވި އެވެ.
ކުރިމަތީގައި މަޖިލީހުގެ ގުރައިދޫ ދާއިރާގެ ބައި-އިލެކްޝަން އޮތްއިރު، އެ އިންތިޚާބަށްވެސް ސަރުކާރުން ނުފޫޒު ފޯރުވާނެކަމަށް ބެލެވޭކަމަށް އަލީ ހުސެއިން ވިދާޅުވި އެވެ.
"ކޮމަންޑޫ ދާއިރާގެ އިންތިޚާބުގައި ދައުލަތުގެ މުޅި ބަޖެޓު އެތަނަށް އޮއްސާލައިގެން ގާތްގަނޑަކަށް 400 މިލިއަނަށްވުރެ ގިނަ ފައިސާ/ ރުފިޔާ އެތަނަށް ޚަރަދުކޮށްގެން ގޮނޑިއެއް ނެގިތަން އަޅުގަނޑުމެންނަށް ފެނުނު. އެއީތޯ ކަންކުރާ ގޮތަކީ؟ ބަޖެޓުގައި އޮތްތޯ ނެތްތޯ ބަލާލާ މީހަކު، ކަންބޮޑުވާ އިންސާނަކު ހުރިހެނެއް އަޅުގަނޑުމެންނަކަށް ނޭނގޭ. މިހާރު އަނެއްކާވެސް މި އޮތީ ރައްޔިތުންގެ މަޖިލީހުގެ ބައި އިލެކްޝަނެއް މި އޮތީ ހަގީގަތުގައި ބޯމަތުވެފައި. އަޅުގަނޑުމެންނަކަށް ނޭނގޭ އޮއްސާލާނީ ކިހާ ވަރެއްކަމެއްވެސް"
ކެންދޫ ދާއިރާގެ މެމްބަރު އަލީ ހުސެއިން
އަލީ ހުސެއިން ވިދާޅުވީ ސަރުކާރުން އެފަދައިން އަމަލުކުރުމުގެ ސަބަބުން ބަޖެޓަށް ބޮޑު ބުރައެއް އުފުލަން ޖެހޭ ކަމަށެވެ. އަދި އެއީ ހުއްޓުމަކަށް ގެންނަން ޖެހޭ ކަމެއްކަން އޭނާ ފާހަގަކުރެއްވި އެވެ.
"ކޮންމެ ގޮތެއް ހަދާފަ ނަމަވެސް، ވީދާފަ ނަމަވެސް، ކޮށާފަ ނަމަވެސް، އަނބުޖަހައިގެން ނަމަވެސް، އިންތިޚާބުތައް ނަގަން ސަރުކާރުން ދިމާކުރީމާ، އަދި ވަކިން ޚާއްސަކޮށް ސަރުކާރުގައި އޮންނަ ފަރާތްތަކުން ދިމާކުރީމާ މިވާގިތަކީ ދައުލަތުގެ ބަޖެޓު އިންތިހާއަށް ހަގީގަތުގައި ބޮޑުވެގެން މިދަނީ. އެ ދާއިރާއެއްގެ ބަޔަކު ހަމަބުނާ ކޮންމެ ކަމެއް ކުރަނީ. ބެޖެޓުގައި ހެޔޮ ޖަހާފަ އޮތަސް ނެތަސް. މީ އަޅުގަނޑުމެން ފުންކޮށް ވިސްނާލަން ޖެހޭ ކަމެއް"
ކެންދޫ ދާއިރާގެ މެމްބަރު އަލީ ހުސެއިން
އަލީ ހުސެއިން މިފަދައިން ވިދާޅުވެފައިވާއިރު، މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވެސް ވަނީ ސަރުކާރުން އިންތިޚާބުތަކަށް ނުފޫޒު ފޯރުވުން ގާނޫނެއްގެ ތެރެއިން ހުއްޓުވަން ޖެހޭކަމަށް ވިދާޅުވެފަ އެވެ.
ސަރުކާރުގެ ފަރާތުން ކެލާ ދާއިރާގެ މެމްބަރު އިބްރާހިމް ޝަރީފު ހުށައެޅުއްވި ޤާނޫނު ނަންބަރު 12/2008 (ރިޔާސީ އިންތިޚާބުގެ ޤާނޫނަށް) އިސްލާހު ގެނައުމުގެ ބިލަށް ބަހުސްކުރައްވަމުން އިންތި ވިދާޅުވީ އެ އިސްލާހަށްވުރެ މުހިންމީ އިންތިޚާބުތަކާއި ދިމާކޮށް ރައީސުލްޖުމްހޫރިއްޔާ ކުރައްވާ ރަސްމީ އަދި ނުރަސްމީ ދަތުރުތައް ވަކިކުރެވޭނެ ބިލެއް ކަމަށެވެ.
އޭގެ އިތުރުން ސަރުކާރުން އިންތިޚާބުތަކަށް ނުފޫޒު ފޯރުވުން ގާނޫނެއްގެ ތެރެއިން ހުއްޓުވުން މުހިންމުކަން އިންތިގެ ވާހަކައިގައިވެސް ފާހަގަކުރެއްވި އެވެ.
Advertisement
Advertisement
Advertisement
This content is created and paid for by advertisers and does not involve Voice Journalists
Advertisement
