ކުށްކުރުމުގައި ބައިވެރިވާ އެތައް ފުލުހުންނެއް ވަޒީފާއިން ވަކިކޮށްފައި ވާނެ ކަމަށް ހޯމް މިނިސްޓަރު އިމްރާން އަބްދުالله ވިދާޅުވެއްޖެއެވެ.
ރައްޔިތުން މަޖިލީހުގެ މިއަދުގެ ޖަލްސާގައި ކުޑަހުވަދޫ ދާއިރާގެ މެންބަރު އާމިރު ވަނީ އެކި ކުށްތަކަށް ސިޔާސީ މީހުންނާއި ވިޔަފާރިވެރިންނާއި އާއްމު ފަރާތްތަކުގެ އިތުރުން ފުލުހުންވެސް އަރައިގަންނަމުންދާ ކަމަށް މައުލޫމާތު ލިބިފައިވާ ކަމަށް ވިދާޅުވެފައެވެ. އަދި ފުލުހުން ކުށްތަކަށް އަރައިގަންނަ ކަމަށްވާނަމަ އެކަން މިނިސްޓަރެއްގެ ހައިސިއްޔަތުން ދެނެގަނެވިފައިވާ މިންވަރާއި އެކަމާއި މެދު ފިޔަވަޅު އެޅިފައިވާ މިންވަރު އަންގައި ދިނުމަށް އާމިރު ވަނީ މިނިސްޓަރު އިމްރާން ގެ އަރިހުން އެދިލައްވާފައެވެ.
ޢާމިރުގެ ސުވާލަށް ޖަވާބު ދެއްވަމުން އިމްރާން ވިދާޅުވީ ކުށްކުށަށް އަރައިގަތުމުގައި ބައެއް ފުލުހުންގެ ބައިވެރިވުން އޮންނަކަން އެނގިވަޑައިގަންނަވާ ކަމަށެވެ. އަދި އެމަނިކުފާނު ސޮއި ކުރެއްވުމަށްފަހު އެފަދަ އެތައް ފުލުހުންނެއް ވަޒީފާއިން ވަކިކޮށްފައިވާނެ ކަމަށާ، އެފަދަ މައްސަލަތަކުގައި ވަޒީފާއިން ވަކިކޮށްފައިވާ ފުލުހުންގެ އަދަދު، ހާމަކުރަން ޖެހިއްޖެނަމަ އެކަންވެސް ކުރަށްވާނެ ކަމަށެވެ.
"މިދަންނަވާ ބައިގެ ތެރޭގައި ފުލުހުންގެ ތެރެއިން ބައެއް ފަރުދުން ހިމެނޭ. އަޅުގަނޑުމެންނަށް އެކަން އިނގޭ. އެކަމަށްޓަކައި އަޅުގަނޑުގެ އަތުން ސޮއިކޮށް އެތައް ފުލުހުންނެއް ވާނީ ކަނޑާލާފަ. އަދަދު އަޅުގަނޑު ހާމަކުރަންޖެހޭ ހިސާބަށް ދިޔައިމަ ގެނެސްވެސް ފާނަން. އެތައް ފުލުހުންނެއް އަޅުގަނޑު ވާނީ ސީދާ ފިޔަވަޅު އަޅައި ކަނޑާލާފަ. އަދި އޭގެ ތެރެއިން ބައެއް ފަރާތްތައް އިންވޯލްވާ މިންވަރާއި ދޭތެރޭ ޝައްކު އުފެދުނީމާ އެމީހުން ވާނީ ޑީމޯޓް ކޮށްފައި. އަދި ބައެއް ފަރާތްތައް ވާނީ އެފަދަ ކަމެއް ނުހިންގޭ ފަދަ ޔުނިޓްތަކަށް ބަދަލުކޮށްފައި. އެހެންވީމާ އެކަމާއި ދޭތެރޭ ފިޔަވަޅު ނާޅައެއް ނުހުންނަން."
މިނިސްޓަރު ޢިމްރާން އަބްދުالله
އިމްރާން އިތުރަށް ވިދާޅުވީ، ފުލުހުން ކުށްތަކަށް އަރައިގަންނަ މައްސަލަ ތަކަކީ އެންމެ ސީރިއަސްކޮށް ބައްލަވާ މައްސަލަތައް ކަމަށާ، އޭނާ ރަށްރަށުގެ ކައުންސިލްތަކާއި ބައްދަލުކުރާއިރު ވެސް ކުށަށް އަރައިގަތުމުގައި ފުލުހުންގެ ބައިވެރިވުން ހިމެނޭކަން އެނގިއްޖެ ނަމަ ސީދާ އޭނާއަށް އެންގުމަށް އެދިފައިވާނެ ކަމަށެވެ.
"އެންމެ ސީރިއަސް ކޮށް އަޅުގަނޑުމެން ބަލާ އެއްކަންތައް އެއީ. ފުލުހުންގެ ތެރޭގައި އެފަދަ ކަމަކަށް އަރައިގަންނަ އެއްވެސް މީހަކު ހުރިތޯ ބެލުން. އެކަމެއް އެނގިއްޖެނަމަ އަޅުގަނޑު ފިޔަވަޅު އަޅާނަން. އެކަން ކުރާނަން. އަޅުގަނޑު ވަރަށް ގިނަ ފަހަރަށް ކައުންސިލްތަކާއި ބައްދަލުވާއިރު ވެސް ދަންނަ ވަން ތިބޭފުޅުންނަށް ވަކި ފުލުހަކު މީގެ ކަމެއްގައި ޝާމިލްވާކަން އެނގޭ ނަމަ އެހެންފަރާތަކަށް ނާންގާ ސީދާ އަޅުގަނޑަށް އަންގާށޭ. އަޅުގަނޑު އަމިއްލަ އަށް ބަލާފަ އެކަމަށް ފިޔަވަޅު އަޅާނަމޭ."
މިނިސްޓަރު ޢިމްރާން އަބްދުالله
އެހެން ކަމުން އެއްވެސް މެންބަރަކަށް ނަމަވެސް، އެފަދަ މައްސަލައެއް އެނގިވަޑައިގަންނަވާ ނަމަ، އޭނާއަށް އެންގުމަށް އިމްރާން ވަނީ އެދިލައްވާފައެވެ. އަދި އޭގެ ކަމެއް އެއްވެސް ފުލުހެއްގެ މައްޗަށް ސާބިތުވެއްޖެ ނަމަ އެ ފުލުހަކީ އެޒިންމާ އަދާކުރަން ހުރުން އެކަށީގެން ނުވާ މީހެއް ކަމަށާ އޭނަގެ މައްޗަށް އަޅަންޖެހޭ ފިޔަވަޅު އަޅާނެ ކަމަށްވެސް އިމްރާން ވިދާޅުވި އެވެ.
މީގެ އިތުރުން، ކުށަށް އަރައިގަތުމުގައި ސިޔާސީ ބައެއް ފަރާތްތަކުގެ ބައިވެރިވުން ވެސް ހިމެނޭކަން ފާހަގަކުރަށްވައި އިމްރާން ވިދާޅުވީ އެމަޢުލޫމާތު ހާމަކުރަންޖެހޭ ހިސާބަށް ދިއުމުން އެކަން މަޖިލީހުގެ 241 ކޮމެޓީއާ ހިއްސާ ކުރައްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
