ފަލަސްޠީނުގެ ބިމަށް ގަދަކަމުން ވެރިވެގަތުމަށް މަސަކަތް ކުރަމުންދާ އިޒްރާއިލްގެ ޔަހޫދީންގެ ޢާންމުންގެ ބަޔަކު ފަލަސްޠީނުގެ ހުވާރާ އަވަށުގެ އެއް އާއިލާއެއްގެ ފަސް މީހަކަށް އަނިޔާކޮށް ޒަހަމް ކޮށް ލުމަށް ފަހު އުފާފާޅު ކުރުމަށް ނެށުމުން އިޒްރާއިލް ސިފައިން އެމީހުންނާއި ބައިވެރިވެ ނަށާމަންޒަރު ދައްކުވައިދޭ ވީޑިއޯއެއް އަލްޖަޒީރާއިން ވަނީ ޢާންމުކޮށްފައެވެ.

އިޒްރާއިލުގެ ޔަހޫދީންގެ އަނިޔާތަކުގައި ޒަހަމްވި މީހުންގެ ތެރޭގައި އުމުރުން ދުވަސްވީ މީހަކާއި ތުއްތުކުއްޖަކު ހިމެނެއެވެ. ހުވާރާ އަވަށަށް ވަދެ އިޒްރާއިލުގެ ޔަހޫދީން ވަނީ އެއަވަށުގެ ރައްޔިތުންނަށާއި ވެހިކަލްތަކާއި ފިހާރަތަކަށް ގެއްލުންދީފައެވެ. ޔަހޫދީން ވަނީ ބަޑީގެ ހަމަލާތަކާއި، ކޯރާޑި، ހިލަ އަދި ޕެޕަރސްޕްރޭއިން ހުވާރާގެ ރައްޔިތުންނަށް އަނިޔާތަކެއް ދީފައެވެ.

ހަމަލާތަކުގައި އަނިޔާވި އިދްރިސްގެ އާއިލާ އަށް ހަމަލާދީފައި ވަނީ ސުޕަރމާކެޓެއް ކައިރީގައި އެމީހުންގެ ކާރު ޕާކުކޮށްގެން އޭގެ ތެރޭގައި ތިއްބައެވެ. އިޒްރާއިލްގެ ތިން ޔަހޫދީއަކު އިދްރިސްގެ އާއިލާއަށް ނުވެސް އެނގި ތިއްބައި ހަމަލާދޭތަން އެސަރަހައްދުގެ ސީސީޓީވީ ތަކުން ފެންނަ ކަމަށް އަލްޖަޒީރާގައި ބުނެފައިވެއެވެ.

Advertisement

"ކާރުގެ ބިއްލޫރި ގަނޑު ތަޅާލައި، އޭގެތެރެއިން އެކަކު އަހަންނަށް ހަމަލާދިނީ ކޯރާޑިއަކުން، އަހަރެމެން އެންމެން ގަޔަށް ޕެޕަރސްޕްރޭ ޖެހުމުން ލޯ ނުހުޅުވިފަ އަހަރެމެންތިބީ، ކާރުން ފޭބުނުފަހުން އަހަންނަށް ފެނުނު ކާރުގެ ބިއްލޫރި ގަނޑުގަ ވަޒަން އަރާފަހުރި ތަންތަންވެސް، ލޮލުން ދިލަނަގާތީ މާބޮޑަކަށް ފެންނަ ގޮތެއް ނުވި" ޢޮމަރް އިދްރިސް ފަލަސްޠީނުގެ މީޑިއާ އަކަށް ކިޔައިދީފައިވެއެވެ.

ޢޮމަރް އިދްރިސް އިތުރަށް ބުނެފައިވަނީ ޔަހޫދީން ދިން އަނިޔާތަކުގައި ހިލައިން ތެޅުމުގެ ސަބަބުން އޭނާގެ ބައްޕަގެ ބޯ ވަރަށް ބޮޑަށް ފަޅައިގެން ގޮސްފައިވާ ކަމަށެވެ.

އިޒްރާއިލްގެ އިންސާނީ ހައްޤުތަކާއި ބެހޭ ގްރޫޕް ޔެޝް ދިން އިން ބުނެފައިވަނީ ހާދިސާ ހިނގިއިރު އިޒްރާއިލް ސިފައިން އެތާ ތިބި ކަމަށާއި، ނަމަވެސް އެމީހުން އެކަން ހުއްޓުވާފައި ނުވާ ކަމަށެވެ. އިޒްރާއިލްގެ މިލިޓަރީ އިން ބުނެފައިވަނީ އެމީހުން އެވަގުތު މަސައްކަތް ކުރީ ހަމަލާދިން މީހުންއެތަނުން ފައްސާލެވޭތޯ ކަމަށެވެ.

ނަމަވެސް ޢާންމު ވެފައިވާ ވީޑިއޯ ތަކުންފެންނަނީ އެއާއި ޚިލާފު މަންޒަރުތަކެކެވެ.

ހޮސްޕިޓަލަށް ފަރުވާއަށް ގެންދިޔަ ޢޮމަރް އިދްރިސްގެ ބައްޕަގެ ބޮލުން ލޭ އޮހޮރޭ މަންޒަރާއި ޢޮމަރްގެ ދެއަހަރާއި ބައިގެ ދަރިފުޅު ބިރުން ރޯމަންޒަރު ވަނީ ޢާންމުވެފައެވެ.

ފަލަސްޠީނުގެ ރެޑް ކްރޮސެންޓުން ބުނެފައިވަނީ ޕެޕަރސްޕްރޭގެ އަސަރު ކޮށްގެން އިތުރު 25 މީހަކަށް ފަރުވާ ދެވުނުކަމަށެވެ.

"ހުވާރާ އަށް ވަދެގަތް ޔަހޫދީ ޓެރަރިސްޓުންގެ ހަމަލާއިން އެ އާއިލާ ސަލާމަތް ވެއްޖެ، އެ އާއިލާ ތިބި ކާރަށް ބަޑީގެ ހަމަލާތައް ދިނީ އެންމެންގެ ލޯމަތީގައި، ހަމަލާތަކުގެ އަޑު އެންމެންނަށް އިވޭ ހިސާބުގައި، އިޒްރާއިލް ސިފައިންގެ ހާޒިރުގަ، އެމީހުން ހުއްޓުވާނެ ބަޔަކު ނެތް، އެހެންވީމަ އެމީހުން އަދިވެސް އެޢަމަލުތައް އެގޮތަށް ހިންގާނެ" ފަލަސްޠީނުގެ ސަރުކާރުގެ ސްޕޯކްސް ޕާސަން އިބްރާހިމް މެލްހަމް ވިދާޅުވިއެވެ.

ހަމަލާތަކުގައި ޒަހަމްވި ފަސްމީހުން ފަރުވާ އަށް ހޮސްޕިޓަލުގައި އެޑްމިޓް ކުރެވިފައިވާއިރު ދާދިފަހަކުންވެސް އިޒްރާއިލްގެ ޔަހޫދީން ވަނީ ހުވާރާ އަށް ވަދެ ހަމަނުޖެހުން ތަކެއް ހިންގައިފައެވެ.