ޖުޑިޝަލް ސާވިސް ކޮމިޝަން(ޖޭއެސްސީ) ގައި ސިޔާސީ މީހުންނަށް ނުތިބެވޭގޮތަށް ކޮމްޕޮސިޝަން ބަދަލުކޮށް ޖޭއެސްސީ އިސްލާހުކުރުން ސަރުކާރުން ފަސްކުރަނީ ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމުގެ މައްސަލަތަކަށް ނުފޫޒު ފޯރުވުމަށްކަމަށް ވާދަވެރި ސިޔާސީ ޕާޓީން ބުނެފި އެވެ. 

ވ. އާރަށުގެ މުއާމަލާތާއި ގުޅުވާ ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ކްރިމިނަލް ކޯޓުން އިއްވި ހުކުން ހައިކޯޓުގައި އިސްތިއުނާފުކޮށްފައި ވާއިރު، އެ މައްސަލަ ބަލައިގަތުމާމެދު ގޮތެއް ނިންމުން ދިގުލައިގެންދާތީ އިދިކޮޅުގެ ކޯލިޝަންގެ ލީޑަޝިޕުން މިއަދުވެސް ވަނީ ހައިކޯޓަށް ވަޑައިގެންފަ އެވެ. 

ހައިކޯޓުގެ ރަޖިސްޓްރާއާއި ބައްދަލުކުރުމަށް ގިނަ ވަގުތުތަކެއް ވަންދެން ކޯޓުގައި ހޭދަކުރެއްވުމަށްފަހު ނިކުމެވަޑައިގެން ނޫސްވެރިންނާއި ބައްދަލުކުރައްވާ ވާހަކަދައްކަވަމުން އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވީ މިއަދުވެސް އިދިކޮޅުގެ ލީޑަޝިޕާއި ބައްދަލުކުރެއްވުމަށް ހައިކޯޓުގެ ރަޖިސްޓްރާ ދެކޮޅު ހައްދަވާފައިވާ ކަމަށެވެ. 

Advertisement

ރައީސް ޔާމީންގެ އިސްތިއުނާފު މައްސަލައިގައި އެ ކޯޓުން ޖަާބުދާރީ ވާނީ ރައީސް ޔާމީންގެ ގާނޫނީ ޓީމަށްކަމަށް ހައިކޯޓުން ބުނެފައިވާކަމަށް އަބްދުއްރަހީމް ވިދާޅުވި އެވެ. 

އެއާއެކު އަބްދުއްރަހީމް ވިދާޅުވީ ހައިކޯޓުގެ ރަޖިސްޓްރާ އިދިކޮޅުގެ ލީޑަޝިޕާއި ބައްދަލުނުކުރެއްވީ ޖޭއެސްސީން އަންގައިގެން ކަމަށެވެ. ހައިކޯޓާއި، އެ ކޯޓުގެ ރަޖިސްޓްރާގެ މައްޗަށް ޖޭއެސްސީން އިންތިހާއަށް ނުފޫޒު ފޯރުވަމުން ދާކަމަށް އަބްދުއްރަހީމް ތުހުމަތު ކުރެއްވި އެވެ. 

އިދިކޮޅު ލީޑަޝިޕްގެ ފަރާތުން އަބްދުއްރަހީމް މީޑިއާއަށް އިންޓަވިއު ދެއްވަނީ/ ފޮޓޯ: ވޮއިސް 

އަބްދުއްރަހީމް އިތުރަށް ވިދާޅުވީ ޖޭއެސްސީ އެތުރިފައިވާ ގޮތް ބަދަލުކޮށް އެ ކޮމިޝަނަކީ ސިޔާސީ ނުފޫޒުތަކުން އެއްކިބާވެފައިވާ ތަނަކަށް ހެދުމަށް ސަރުކާރުން ވީ ވައުދުވެސް ނުފުއްދާ ފަސް ކުރަމުންދަނީ ރައީސް ޔާމީންގެ މައްސަލައަށް ނުފޫޒު ފޯރުވުމުގެ މަގްސަދުގައި ކަމަށެވެ. 

ސަރުކާރުގެ ވައިދު ފުއްދަން މަޖިލީހުގެ މަޖިބަދޫ ދާއިރާގެ މެމްބަރު އަހުމަދު ތާރިގު 3 ފަހަރުމަތިން މަޖިލީހަށް ހުށައެޅުމުން އެ މައްސަލަ ބޭރުކޮށްލާފައިވާއިރު، މި ސަރުކާރުން ޖޭއެސްސީ އިސްލާހު ކުރާނެކަމަށް ގަބޫލު ނުކުރެވޭކަމަށް އަބްދުއްރަހީމް ވިދާޅުވި އެވެ. 

އިދިކޮޅުން ބުނީ ރައީސް ޔާމީންގެ މައްސަލައިގެ އިސްތިއުނާފު ލަސް ކުރުމަކީ އެމަނިކުފާނުގެ އިންތިޚާބީ ހައްގަށް ހުރަސްއެޅިގެންދާނެ ކަމެއް ކަމަށެވެ. އަދި އެއީ އެކޯލިޝަނުން އިންތިހާއަށް ކަންބޮޑުވާ ކަމެއް ކަމަށެވެ. 

އެކަން ފާހަގަކުރައްވާ އިދިކޮޅު ޕީއެންސީގެ ރައީސް އަބްދުއްރަހީމް ވިދާޅުވީ ރައީސް ޔާމީންގެ ފަރާތްޕުޅުން ހުށައަޅާފައިވާ އިސްތިއުނާފު ބަލައިގަތުމާމެދު ގޮތެއް ކަނޑައަޅާ އެމައްސަލަ ފަށައިގަންނަންދެން އިދިކޮޅު ލީޑަޝިޕުން ކޯޓަށް ވަޑައިގެން އެވާހަކަ ހުށައަޅުއްވާނެ ކަމަށެވެ. އަދި އެ މައްސަލަ އަވަސްކުރުމަށް އެދި ކޯޓުގައި ދަންނަވަމުން ގެންދާނެ ކަމަށެވެ.