އަންހެނުންގެ ދުވަސް ފާހަގަ ކުރުމުގެ ގޮތުން ވިލާ ގްރޫޕްގެ ފަރާތުން ކުލަ ގަދަ ހަފްލާއެއް ބާއްވައިފިއެވެ.

މިހަފްލާ ބާއްވާފައިވަނީ ވިލާ ކޮލެޖުގައެވެ.

މިހަފްލާގައި އަންހެނުންގެ ބާރުވެރިކަމާއި، ދުޅަހެޔޮކަމާއި ގުޅޭ ތަފާތު މައުޟޫތަކަށް ހަފްލާގެ ބައިވެރިން ވާހަކަ ދައްކަވައިފައިވެއެވެ. އެގޮތުން ވިލާ ކޮލެޖްގެ މާސްޓަރ އޮފް ކައުންސެލިން ކޯހުގެ ޕްރޮގްރާމް ކޯޑިނޭޓަރ އަދި އެސިސްޓެންޓް ޕްރޮފެސަރ ޑރ އައިޝަތު ނަޝީދާ ވަނީ އަންހެނުން ބާރުވެރިކުރުވުމާއި ހަމަހަމަކަން ހޯދުމަށް ކުރިމަތިވާ ގޮންޖެހުންތަކާއި ބެހޭ ގޮތުން އޭނޭގެ ވިސްނުންފުޅާއި ތަޖުރިބާ ހިއްސާކުރައްވާފައެވެ.

Advertisement

އަދި ވިލާ ރިސޯޓްސް، އަރާމު ސްޕާގެ ކޯޕަރޭޓް ޑިރެކްޓަރ މެލިސާ ޑޮވެލް ވަނީ ޖެންޑަރ ބަޔާސް އިން އަރައިގަނެ މަސައްކަތުގެ މާހައުލުގައި ކުރިއަރަންކުރެވޭނެ ކަންކަމާއި ބެހޭގޮތުން ވާހަކަ ދައްކާފައި ވެއެވެ.

"ވިލާ ގްރޫޕްގައި އަޅުގަނޑުމެން ވަރަށް ފަޚުރުވެރިވަން، ޖިންސައް ބެލުމެއްނެތި ކޮންމެ ފަރުދަކަށް ހަމަހަމަ ފުރުސަތުތަކާއި ވަސީލަތްތައް ލިބޭނެ މުޖްތަމަޢެއް ހޯދުމަށް ކުރާ މަސައްކަތަށް، ވިލާ ގްރޫޕަކީ ހުރިހާ ފަރާތްތަކެއް ހިމެނޭ، ތަފާތު، އަދި ހަމަހަމަ މަސައްކަތުގެ މާހައުލެއް އުފެއްދުމަށް އަމާޒުކުރާ ކުންފުންޏެއް، ވިލާ ގްރޫޕަކީ މަސައްކަތުގެ މާހައުލުގައި އަންހެނުންނަށް އެހީތެރިވުމަށް ގިނަ ސިޔާސަތުތަކެއް ފަރުމާކޮށްފައިވާ ކުންފުންޏެއް" ވިލާ ގްރޫޕްގެ ޑިރެކްޓަރ އޮފް ހިޔުމަން ރިސޯސަސް، އިބްރާހިމް މޫސާ ވިދާޅުވިއެވެ.

ހަފްލާ ނިންމާލައިފައިވަނީ ވިލާ ރިސޯޓްސް، އަރާމު ސްޕާގެ ލާނިންގ އެންޑް ޑިވަލޮޕްމެންޓް މެނޭޖަރ އެޑްރިއާނާ ލަވޭރާ ކުރިއަށް ގެންދިޔަ ދުޅަހެޔޮކަމާއި ބެހޭ ވޯކްޝޮޕަކުންނެވެ.