އިޒްރާއިލް ސިފައިން ފަލަސްޠީނުގެ ޖެނީންގައި ދިން ބަޑީގެ ހަމަލާތަކެއްގައި ފަލަސްޠީނުގެ ތިން މީހަކު ޝަހީދުކޮށްލައިފިއެވެ.

މިތިން މީހުން ޝަހީދުކޮށްލުމުގެ 48 ގަޑިއިރު ކުރިންވެސް އިޒްރާއިލް ސިފައިން ހިންގި މިލިޓަރީ ރެއިޑެއްގައި ޖެނީން ސިޓީ އިން 6 މީހަކު ޝަހީދު ކޮށްލައިފައިވެއެވެ.

ފަލަސްޠީނުގެ ހެލްތް މިނިސްޓްރީ އިން ބުނެފައިވަނީ ޝަހީދު ވެފައިވަނީ 22 އަހަރާއި 26 އަހަރާއި ދެމެދުގެ ތިން ޒުވާން ފިރިހެނުން ކަމަށެވެ.

މިތިން ޒުވާނުންގެ ގަޔަށް ބަޑިޖަހައި ޝަހީދު ކޮށްލައިފައި ވަނީ ޖަބާ ޕްރޮވިންސްގެ މަގުމަތީގައި ކާރެއްގެ ތެރޭގައި ތިއްބައެވެ. އިޒްރާއިލްގެ ސްޕެޝަލް ފޯހުން، އަންޑަރކަވަރ ޕޮލިހުން ހިމެނޭގޮތަށް ކުލަހެދުމުގައި ތިބެ ވަނީ ޖަބާ އަށް ވަދެ ރެއިޑެއް ހިންގައިފައެވެ.

އިޒްރާއިލްގެ އޮތޯރިޓީ ތަކުން ބުނެފައިވަނީ ބޯޑަރ ޕޮލިހުން ހިމެނޭގޮތަށް މިހިންގުނު އޮޕަރޭޝަނަކީ އިޒްރާއިލްގެ ފޯސްތަކަށް ހަމަލާދިނުމަށް ތައްޔާރުވަމުންދިޔަ ބަޔަކު ހައްޔަރުކުރުމަށް ހިންގި އޮޕަރޭޝަނެއް ކަމަށެވެ.

އަލްޖަޒީރާގެ ޖާރުއްސަލަމް ބިޔުރޯގެ ޗީފް ވާލިދް އަލް އޮމަރީ ބުނެފައިވަނީ މިއަދުގެ ހަމަލާގައި ޝަހީދުވެފައިވަނީ ޖަބާ ބްރިގޭޑްސްގެ 3 މުޖާހިދުން ކަމަށެވެ. ހަމަލާތަކުގައި ޝަހީދުވި ތިން މީހުން ތިބި ކާރަށް ވަނީ ވަރަށް ބޮޑެތި ގެއްލުންތަކެއް ލިބިފައެވެ.