އިނގިރޭސި ޕްރިންސް ވިލިއަމްގެ އަނބިކަނބަލުން ކޭޓް މިޑްލްޓަން އާއި އެކު އަތާއި އަތް ޖޯޑުކޮށް ސަލާމް ކުރަން އިންކާރުކޮށް އިހްތިރާމް އަދާކުރި ގޮތުން ގިނަ ބައެއްގެ ތައުރީފު އިނގިރޭސި ވިލާތުގެ މިސްކިތެއްގެ އިމާމަކަށް އަމާޒުވެއްޖެ އެވެ. 

ނިމުނު ހަފްތާ ތެރޭގައި އިނގިރޭސި ޕްރިންސް ވިލިއަމް އާއި އޭނާގެ އަންހެނުން ކޭޓް ވަނީ، ތުރުކިޔޭ އަދި ސީރިޔާ ގެ ބިންހެލުމާއި ގުޅިގެން ހާލުގައި ޖެހިފައިވާ މީހުންނަށް އެހީވުމަށް، އިނގިރޭސި ވިލާތުގައި ހުންނަ ހެއިސް މުސްލިމް ސެންޓަރުން ކުރިއަށް ގެންދާ ފަންޑް ރެއިޒިންގެ ކަންކަން ކުރިއަށްދާ ގޮތް ބެލުމަށްޓަކައި އެތަނަށް ޒިޔާރަތް ކޮށްފައެވެ. 

ޕްރިންސް ވިލިއަމް އާއި ކޭޓް އަށް މަރުހަބާ ކިޔުމަށް އެ ސެންޓަރުގެ ބައެއް އިސް ފަރާތްތަށް ސެންޓަރުގެ ދޮރު ކައިރީގައި ތިބި އިރު، ޕްރިންސް ވިލިއަމްއާއި އެ އެންމެންވެސް ވަނީ ސަލާމްކޮށްފައެވެ. 

އެއަށްފަހު، ކޭޓް ވެސް އެތަނުގައި އެމީހުންގެ އިސްތިގުބާލުގައި ތިބި މީހުންނަމާއި ސަލާމްކޮށްފައިވާއިރު, އެތަނުގައި ހުރި އިމާމެއް ކަމަށްވާ، ސުފްޔާން އިގްބާލް ވަނީ ކޭޓް އޭނާ އާއި ސަލާމް ކުރުމަށް ދިއްކުރި އަތުގައި ނުހިފައި، މޭގައި އަތް ބާއްވައި އިހްތިރާމް އަދާކޮށްފައެވެ. ސުފްޔާން އެފަދައިން ކަން ކުރުމުން ކޭޓް ވެސް އަދި ވިލިއަމް ވެސް ވަނީ ހިނިތުން ވުމާއިއެކު އެކަން ބަލައިގަނެފައެވެ.  

އިމާމް ސުފްޔާންގެ މި ޢަމަލާއި ގުޅިގެން ގިނަ ބަޔަކު އަންނަނީ އޭނާ އަށް ތައުރީފް ކުރަމުންނެވެ. އެގޮތުން، 100 އިންސައްތަ މުސްލިމް ނޫން ގައުމެއްގައި ދިރިއުޅެމުންދާ މުސްލިމެއްގެ ކިބައިގައި އެފަދަ ކަމެއް ކުރުމުގެ ހިތްވަރު ހުރި ކަމަށާ، ހިލޭ އަންހެނަކާއި އަތާއި އަތް ޖޯޑުކޮށް ސަލާމް ކުރުމަށް އިންކާރުކޮށް އިހްތިރާމް އަދާކުރި ގޮތުންވެސް ގިނަ ބަޔަކު ވަނީ އެކަމަށް ތައުރީފް ކޮށްފައެވެ. 

އަދި މީގެ އިތުރުން، އިމާމް ސުފްޔާން އެގޮތަށް ކަން ކުރުމުން އެކާއި ނުރުހުން ފާޅުނުކޮށް، ކޭޓް އެކަން ބަލައިގަތުމުން ކޭޓް އަށްވެސް މީހުންވަނީ ތައުރީފް ކޮށްފައެވެ.