ރޯޑް ޑިވެލޮޕްމަންޓު ކޯޕަރޭޝަން (އާރު.ޑީ.ސީ) އާއި ހަވާލުކޮށްގެން ޒަމާނީ ފެންވަރަށް ތަރައްގީކުރަމުންދާ އަމީނީ މަގުގައި ދިވެހި ރުއް ޖެހުމުގެ ވިސްނުމެއް ނުގެންގުޅޭކަމަށް އެ ކުންފުނިން ބުނެފި އެވެ. 

ޕްލޭނިން މިނިސްޓްރީ މެދުވެރިވެގެން އަމީނީ މަގު ޒަމާނީ ފެންވަރަށް ހެދުމުގެ މަސައްކަތް އާރުޑީސީއާއި ހަވާލުކޮށްފައިވަނީ މި ދިޔަ ޖުލައި މަހުގައެވެ. 

10 މަސް ތެރޭ ނިންމުމަށް އެއްބަސްވެވުނު އެ މަސައްކަތަކީ 84 މިލިއަން ރުފިޔާގެ މަޝްރޫއެކެވެ. 

Advertisement

1.7 ކިލޯ މީޓަރުގައި ތާރުއަޅައިގެން ހަދާ އެމަގުގެ މަސައްކަތް ނިމޭއިރު، ފެން ބޮޑުވުމުގެ މައްސަލައަށް ދާއިމީ ހައްލެއް ލިބި މަގުބައްތި ޖެހިފައި ހުންނާނެކަމަށް އާރުޑީސީގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) ވަނީ ވިދާޅުވެފަ އެވެ. އަދި އެއީ މާލެއިން ނުފެންނާނެވަރުގެ ރީތި މަގަކަށް ވެގެންދާނެ ކަމަށްވެސް މޫކޭ ވިދާޅުވެފައި ވެއެވެ. 

މިފަހުން ތަރައްގީ ކުރާ މަގުތަކުގެ ފަޅުކަން ފިލުވާ، މަގުހިނގާ މީހުންގެ ހިތްހަމަ ޖައްސައިދިނުމަށް މަގުތަކުގައި ގަސް އިންދުމަކީ ކުރަމުން އަންނަ ކަމެކެވެ. އެއާއެކު މާލޭ ސިޓީ ކައުންސިލުން އިސް ނަގައިގެން މާލޭގެ ވަށާ އޮންނަ ރިންގު ރޯޑުގައި ކަދުރު ރުއްތައް ޖެހުމާއި ގުޅިގެން އެއީ ދިވެހި ސަޤާފަތާއި ގުޅުމެއް ނެތް އެއްޗެހި ކަމަށް ބުނެ ސަރުކާރުގެ އިސް ބޭފުޅުންގެ ފާޑުކިޔުން ވެސް އަމާޒުވެފައިވާކަން ފާހަގަކޮށްލެވެއެވެ. 

އެހެންކަމުން، އަމީނީ މަގު ތަރައްގީ ކުރުމަށްޓަކައި، އެމަގުގައި ހުރި ދުވަސްވީ ގަސްތަކެއް ކަނޑާ އުކާލާފައިވާއިރު، މަގު ނިމިގެން އަންނައިރު، އެ ގަސްތަކުގެ ބަދަލުގައި ދިވެހި ސަޤާފަތާއި ވެސް ގުޅުން ހުރި ރީތި ގަސްތަކެއް ފެނިދާނެކަމަށް އާންމުން އުންމީދު ކުރެއެވެ. 

އަމީނީ މަގު ތަރައްގީވެ އާންމުންނަށް ބޭނުންކުރަން ހުޅުވާލާއިރު، އެ މަގުގައި ދިވެހި ރުއްތައް ޖެހުމުގެ ވިސްނުން އާރުޑީސީން ގެންގުޅޭތޯ "ވޮއިސް" އިން ވާނީ އަހާފައެވެ. 

އެ ސުވާލަށް ޖަވާބު ދެއްވަމުން އާރުޑީސީގެ މީޑިއާ ކޯޑިނޭޓަރު ވިދާޅުވީ ޒަމާނީ އަމީނީ މަގުގައި ދިވެހި ރުއް ޖެހުމުގެ ވިސްނުމެއް އާރުޑީސީން ނުގެންގުޅޭ ކަމަށެވެ. ދިވެހި ރުކުގެ ބަދަލުގައި އެހެން ބާވަތެއްގެ ގަސް ޖަހާ، މަގުމަތީގެ ފަޅުކަން ފިލުވާދިނުމުގެ ވިސްނުމެއް ގެންގުޅުއްވާ ކަމަކަށްވެސް ވިދާޅެއް ނުވެއެވެ. 

އެހެންކަމުން، އަމީނީ މަގު ތަރައްގީވެ އާންމުންނަށް ބޭނުން ކުރެވޭގޮތަށް ހުޅުވާލާއިރު، "ކޮންކުރިޓު ސާލެއް" ނޫން އެހެން މަންޒަރެއް ފެންނާނެހެނެއް ހިޔެއް ނުވެއެވެ. ޔަގީނުންވެސް މަގުމަތީގައި ދިވެހި ސަޤާފަތާއި ގުޅޭ ދިވެހި ރުއްތަކެއް ނުހުންނާނެކަން އާރުޑީސީން ވަނީ ބުނެފައެވެ.