އިޒްރާއިލުން ފަލަސްޠީނުގެ ހުޅަނގު އައްސޭރީގައި ފަލަސްޠީނުގެ ތިން ޒުވާނަކު ޝަހީދުކޮށްލައިފިއެވެ.

އިޒްރާއިލު ސިފައިން ބުނެފައިވަނީ އެމީހުން ޝަހީދު ކޮށްލި ތިން މީހުންނަކީ ހަތިޔާރު އެޅި ތިން ހަނގުރާމަ ވެރިން ކަމަށެވެ. އަދި އިޒްރާއިލުން ވަނީ ފުރަތަމަ ހަމަލާދޭންފެށީ އެތިން މީހުން ކަމަށް ބުނެފައެވެ.

ފަލަސްޠީނުގެ ހެލްތް މިނިސްޓްރީ އިން ބުނެފައިވަނީ ފަލަސްޠީނުގެ ތިން ޒުވާނަކު ނާބުލުސް ސިޓީ ކައިރީގައި އިޒްރާއިލުން ދިން ހަމަލާތަކެއްގައި ޝަހީދުވެފައި ވާކަމަށެވެ.

އިޒްރާއިލްގެ ސިފައިން ބުނެފައިވަނީ އެތިން މީހުން ޝަހީދުވެފައިވަނީ ދެފަރާތުގެ މެދުގައި ބަދަލު ކުރެވުނު ބަޑީގެ ހަމަލާތަކެއްގެ ސަބަބުން ކަމަށެވެ. ނަމަވެސް އިޒްރާއިލްގެ އެއްވެސް މީހަކަށް އަނިޔާއެއް ވެގެން ފަރުވާ ހޯދައިފައެއް ނުވެއެވެ.

މިފަހަކަށް އައިސް އިޒްރާއިލް ސިފައިންގެ އިތުރުން އިޒްރާއިލްގެ ޔަހޫދީން ނުކުމެވެސް ފަލަސްޠީނުގެ ނިކަމެތި ރައްޔިތުންނަށް އަނިޔަތައް އަންނަނީ ދެމުންނެވެ.

މި ފާއިތުވި އަހަރެއްހާ ދުވަސް ތެރޭގައި ފަލަސްޠީނުގެ ބިމަށް ގަދަކަމުން ވެރިވެގަތުނަށް މަސައްކަތް ކުރަމުން އަންނަ އިޒްރާއިލްގެ ޔަހޫދީންނާއި ފަލަސްޠީނުގެ ރައްޔިތުންނާއި ދެމެދު ހަމަނުޖެހުންތައް ވަނީ ވަރަށް ބޮޑުވެފައެވެ.

މި ފާއިތުވި އަހަރެއްހާ ދުވަސް ތެރެގައި އިޒްރާއިލްގެ ސިފައިން ފަލަސްޠީނުގެ ހުޅަނގު އައްސޭރިން ހާހެއްހާ މީހުން ހައްޔަރުކޮށްފައިވެއެވެ. އަދި 200 އެއްހާ މީހަކު ޝަހީދު ކޮށްލައިފައިވެއެވެ. މީގެ ތެރޭގައި ޢާންމުންނާއި ހަނގުރާމަ ވެރިންވެސް ހިމެނެއެވެ. ފަލަސްޠީނުގެ ދިފާޢުގައި ހަނގުރާމަ ކުރާ ހަނގުރާމަ ވެރި ޖަމާޢަތްތަކުގެ ހަމަލާތަކުގައި އިޒްރާއިލްގެ 40  މީހަކު މަރުވެފައި ވެއެވެ. މީގެ ތެރޭގައި އިޒްރާއިލާއި އެކު މަސައްކަތް ކުރާ އެހެން ޤައުމުތަކުގެ މީހުންވެސް ހިމެނެއެވެ.