ވަޒީފާއަށް ނެގުމުގެ ކުރިން ފުލުހުންގެ ބެކްރައުންޑް ޗެކް ހެދުން ދޫކޮށްލުމުން ފުލުހުންނަށް އޮތް އިތުބާރު ގެއްލޭނެ ކަމަށް ކެންދޫ ދާއިރާގެ މެމްބަރު ޢަލީ ހުސެއިން ވިދާޅުވެއްޖެއެވެ.

 ބެކްގްރައުންޑު ޗެކް ކުރުމަކީ އިހުތިޔާރީ ކަމަކަށް ހަދައި، ފުލުހުންގެ ޤާނޫނަށް އިސްލާޙު ގެނައުމުގެ ބިލު ރައްޔިތުންގެ މަޖިލީހަށް މިހާރު އޮތީ ހުށަހަޅާފަ އެވެ. ސަރުކާރުގެ ފަރާތުން ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ހުށަހެޅުއްވި އެ އިސްލާޙާއި ގުޅިގެން ގިނަ މެންބަރުން ވަނީ ކަންބޮޑުވުން ފާޅުކޮށްފަ އެވެ.

އަދި ސިޔާސީ ދާއިރާގެ ގިނަ ބަޔަކުވެސް އެކަމާއި މެދު ވަނީ ހިޔާލު ފާޅުކޮށްފައެވެ.

Advertisement

މި ކަމައި ގުޅިގެން ކެންދޫ ދާއިރާގެ މެމްބަރ ޢަލީ ހުސެއިން ކުރައްވާފައިވާ ޓްވީޓެއްގައި ވިދާޅުވެފައިވަނީ އެކަން އިޚްތިޔާރީ ކަމަކަށް ހެދުމުގެ ނަތީޖާއަކަށް ވެގެންދާނީ ފުލުހުންގެ ޚިދްމަތާއި މެދު ރައްޔިތުންގެ އިތުބާރު އިތުރަށް ގެއްލުން ކަމަށެވެ. އަދި އިސްލާޙު ކުރުމުގެ ކުޑަވެސް ނިޔަތެއް އަދި ހިތްވަރެއް ނެތީ ތޯ ޢަލީ ސުވާލު ކުރައްވާފައިވެއެވެ.

ފުލުހުންގެ ޚިދްމަތާއި އަލަށް ގުޅޭ ފަރާތްތަކަކީ ވަޒީފާ އާއި އެކަށީގެންވާ މީހެއްތޯ ބެލުން ފުލުހުންގެ ޤާނޫނުގެ 17 ވަނަ މާއްދާއިން މަޖުބުރޫ ކުރެއެވެ. ނަމަވެސް އަސްލަމް މިހާރު ހުށައަޅުއްވާފައިވާ އިސްލާޙާއި އެކު މިކަމަށް ބަދަލު އަންނާނެއެވެ.