ރާއްޖޭގައި އޮންނަނީ ހަމައެކަނި ދޮންވެލި ބީޗްއެއްކަމަށް ވިދާޅުވެ ފޫހި މަންޒިލެއްގެ ގޮތުގައި ރާއްޖެ ސިފަ ކޮށް ލަންކާގެ ޓުއަރިޒަމް މިނިސްޓަރ ހަރިން ފެނާންޑޯ ދެއްކެވި ވާހަކަތަކަށް ރާއްޖޭގެ ޓުއަރިޒަމް މިނިސްޓަރ ޑރ. އަބްދުالله މައުސޫމް ރައްދު ދެއްވާފިއެވެ.

ބާލިންގައި އޮތް އައިޓީބީ ފެއާގައި ވާހަކަދައްކަވަމުން ފެނާންޑޯ ވިދާޅުވެފައިވަނީ ސްރީ ލަންކާ އަކީ ފަތުރުވެރިން ގިނަ ކަންތައްތަކެއް ކޮށް އެކި ކަހަލަ ކަންކަން ތަޖުރިބާ ކޮށްލުމުގެ ފުރުސަތު ލިބިގެންދާ ގައުމެއްކަމަށެވެ.

އެގޮތުން އެންމެ 2 ގަޑިއިރު ތެރޭގައި ސްރީލަންކާގެ ހަތަރު މޫސުމާއި، އެ ގައުމުގެ ފިނި މޫސުން ތަޖުރިބާ ކޮށްލެވޭނެ ކަމަށް ވަނީ ވިދާޅުވިއެވެ.

އަދި އެ ގައުމުގެ ބީޗްތަކާއި، އެ ތަނުގައި ރާޅާއެޅުމާއި، މާވަހަރު ބެލުން އަދި މިއާއިއެކު ފަރުބަދަ ތަކަށް އެރުމާއި ހައިކް ކުރުމުގެ ފުރުސަތު ލިބިގެންދާ ކަމަށް ވެސް ވަނީ ވިދާޅުވެފައެވެ.

ނަމަވެސް މިއާ ޚިލާފަށް ރާއްޖޭގައި އޮންނީ ހަމަ އެކަނި ދޮންވެލި ބީޗްއެއް ކަމަށާއި 5 ދުވަހަށް ފަހު އެތަނުގެ މަތިން ފޫހިވާނެ ކަމަށާއި ތިބެންޖެހޭނީ ތިބޭ އެއްތާކު ކަމަށް ވިދާޅުވެ ރާއްޖެއަށް ވަނީ ފާޑުކިޔާފައެވެ.

މިކަމާއި ގުޅޭ ގޮތުން ރާއްޖޭގެ ޓުއަރިޒަމް މިނިސްޓަރ ޑރ. އަބްދުالله މައުސޫމް ކުރެއްވި ޓްވީޓެއްގައި ވަނީ ދިވެހިރާއްޖެއަކީ 2020، 2021 އަދި 2022 ވަނަ އަހަރުވެސް ވޯލްޑް ޓްރެވަލް އެވާޑްސްގެ ވޯލްޑްސް ލީޑިންގް ޑެސްޓިނޭޝަން އެވާޑް ހޯދި ގައުމެއް ކަމަށް ފާހަގަ ކުރައްވާފައެވެ.

މިއާއިއެކު މިނިސްޓަރ ވަނީ ރާއްޖެއަކީ ދުނިޔޭގެ ފަތުރުވެރިކަމުގެ ބެންޗްމާކް ކަމަށް ވިދާޅުވެ ރާއްޖެއަކީ އެންމެ މޮޅު އަދި އެންމެ ދާހިއްވާ މަންޒިލްކަމުގައި ހެދުމަށް ޑިވެލޮޕަރުންނާއި ޚިދުމަތްތައް ފޯރުކޮށްދޭ ފަރާތްތަކަށް ޝުކުރު ދަންނަވާފައެވެ.

"ހަސަދަވެރިވެ ޝައްކުވެރިވެރިވާނަމަ ތަކުރާރުކޮށް ލޯގަނޑާއި ސުވާލު ކުރައްވާ." މިނިސްޓަރ ވިދާޅުވެފައިވެއެވެ.