ކުރީގެ ރައީސް އަދި އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ ވަކީލު އާދަމް ޢާޞިފް ހައްޔަރު ކޮށްފައިވަނީ ބިރު ދެއްކުމުގެ ގޮތުން ކަމަށް އިދިކޮޅުން ބުނެފިއެވެ. 

ރައީސް ޔާމީން މިނިވަން ކުރުމަށް ގޮވާލައި ރޭ އިދިކޮޅުން ކުރިއަށް ގެންދިޔަ އިހްތިޖާޖުގެ ތެރެއިން ވަކީލު އާސިފް ހައްޔަރު ކުރުމާއި ގުޅިގެން ޤާނޫނީ ވަކީލުންނަށް ބިރު ދެއްކުން ހުއްޓާލުމަށް ގޮވާލައި އިދިކޮޅުން ނެރުނު ބަޔާނެއްގައި ބުނީ، އެ ކޯލިޝަންގެ ފަރާތުން ސުލްޙަވެރިކަމާއެކު ގެންދެވޭ އިޙުތިޖާޖުގެ ހަރަކާތްތަކުގެ ޤާނޫނީ ކަންކަން ބެލެހެއްޓުމުގައި އެންމެ އިސްކޮށް މަސައްކަތް ކުރައްވާ ޤާނޫނީ ވަކީލުންނަށް ސީދާ ޢަމާޒުކޮށް ސަރުކާރުން ފުލުހުން މެދުވެރިކޮށް ޣައިރު ޤާނޫނީ ޢަމަލުތައް ހިންގަމުންދާ ކަމަށެވެ. އަދި އެކަން ހަރުކަށި އިބާރާތުން ކުށްވެރި ކުރާ ކަމަށްވެސް ބުނެފައިވެއެވެ. 

"ރޭ މާލޭގެ މަގުމަތީ ސުލްޙަވެރިކަމާއެކު ކުރިއަށް ގެންދެވުނު ޙަރަކާތުގައިވެސް ވަނީ އެހަރަކާތުގެ ޤާނޫނީ ކަންކަން ބެލެހެއްޓުމުގައި އެންމެ އިސްކޮށް ޙަރަކާތްތެރިވެ ވަޑައިގެންނެވި ޤާނޫނީ ވަކީލު އަދި ޕީޕީއެމްގެ އިސްތިޢުނާފް ކޮމިޓީގެ ނާއިބު މުޤައްރިރު އަލްއުސްތާޛު އާދަމް ޢާޞިފް ހައްޔަރުކޮށްފައެވެ. އާޞިފަކީ ރައީސް ޔާމީންގެ ޤާނޫނީ ވަކީލުންގެ ޓީމުގެވެސް މެންބަރެކެވެ. މިފަދަ ފިނޑި އަދި ނާތަހުޒީބު ޢަމަލުތަކަކީ ބަލައިގަނެވޭނޭ ޢަމަލުތަކެއް ނޫނެވެ. އަދި މިއީ ބިރު ދެއްކުމުގެ ޢަމަލެކެވެ." އިދިކޮޅުން ބުނެފައިވެއެވެ. 

Advertisement

މީގެ އިތުރުން އިދިކޮޅުން ބުނީ، އިޙުތިޖާޖުގެ ތެރެއިން މީހުން ހައްޔަރު ކުރާއިރު، އިޙުތިޖާޖުގައި ބައިވެރިނުވެ ދުރުގައި ތިބޭ މީހުންވެސް ހައްޔަރު ކުރަމުން ގެންދާތަން މިހާރު ފެންނަމުންދާ ކަމަށެވެ. އަދި ރޭގެ އިޙުތިޖާޖުންވެސް ގިނަ ޢަދަދެއްގެ ދިވެހި ރައްޔިތުން ހައްޔަރުކޮށްފައިވާއިރު ހައްޔަރު ކުރުމުގެ ތެރޭގައި ބައިވެރިންނަށް އެކި ވަރުގެ އަނިޔާތައް ކޮށްފައިވާ ކަމަށްވެސް އިދިކޮޅުން ބުނެއެވެ. 

"އެގޮތުން ޒުވާން ކަނބަލަކު ހައްޔަރުކުރުމުގައި ފުލުހުން ޢަމަލުކުރި ގޮތުން އެ ޒުވާނާ ހޭނެތިފައިވާއިރު، އެ ޒުވާނާގެ ސިއްޙި ހާލަތު ސީރިއަސްވެ މިހާރު ގެންދަނީ ހޮސްޕިޓަލްގައި ފަރުވާ ދެމުންނެވެ. މިފަދަ ލާއިންސާނީ ޢަމަލުތައް ފުލުހުން މެދުވެރިކޮށް ސަރުކާރުން ހިންގަމުން ގެންދާއިރު، މިކަންކަން ބަލާ ފިޔަވަޅު އެޅުމުގެ ޒިންމާ ޤާނޫނުން މަތިކޮށްފައިވާ މުއައްސަސާތައް ނިދާފައި ތިބުމުގެ އިތުރުން ސަރުކާރު ބޭނުންވާ ގޮތަށް ބަޔާންތައް ނެރެމުން ގެންދިޔުމަކީވެސް އެ މުއައްސަސާތަކުގެ މުސްތަޤިއްލުކަން ގެއްލިފައިވާ މިންވަރު ހާމަކޮށްދޭ ކަންކަމެވެ." އިދިކޮޅުން ބުނެފައިވެއެވެ.

މިއާއެކު އިދިކޮޅުން ވަނީ ދިވެހި ރައްޔިތުންނަށް އަނިޔާވެރިވެ، އެއްވެސް ކަމަކާއި ނުލާއި ރައްޔިތުން ހައްޔަރުކޮށް އަދި ޙާލަތާއި ނުބައްދަލު ބާރުގެ ބޭނުން ފުލުހުން ކުރަމުން ގެންދާއިރު، އެކަންކަން ބެލުމުގެ ޒިންމާ ޙަވާލުވެފައިވާ މިނިވަން މުސްތަޤިއްލު މުއައްސަސާތައް ގަދަ ނިދިން ހޭލާ އެ ކަންކަން ބަލާ ފިޔަވަޅު އެޅުމަށް ގޮވާލާފައެވެ.