ރައްޔިތުންގެ މަޖިލީހުގެ ކ. ގުރައިދާ ދާއިރާ އަށް ތިން ޕާޓީއަކުން ވާދަކުރާ ކަމަށާ، އެ ދާއިރާގެ ގޮނޑިއަށް ވާދަކުރާ މެމްބަރުންގެ ކެންޑިޑޭޓު ނަންބަރު ތަރުތީބު ކުރުމަށް ގުރު ނެގުން މާދަމާ އޮންނާނެ ކަމަށާ އިލެކްޝަންސް ކޮމިޝަން (އީސީ) އިން ބުނެފި އެވެ.

އީސީ އިން ކުރި އިއުލާނެއްގައި ބުނީ އޭޕްރީލް މަހުގެ 15 ވަނަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަނަށް ކުރިމަތިލާފައިވާ ކެންޑިޑޭޓުންގެ ގުރުއަތު ނެގުމާއި ނަން ތަރުތީބު ކުރުން މާދަމާ މެންދުރު 14:00 ގައި އޮންނާނެ ކަމަށެވެ.

އަދި އިންތިހާބުގައި ވާދަކުރާ ކެންޑިޑޭޓުން ކަނޑައެޅިފައިވާ ގަޑިއަށް ގުރުއަތު ނަގާ ތަނަށް ހާޒިރު ވުމަށާ، ކެންޑިޑޭޓަށް ހާޒިރުވެވެން ނެތްނަމަ، ކެންޑިޑޭޓުގެ ފަރާތުން ބަދަލުގައި ހާޒިރުވާނެ ބޭފުޅެއް ބަޔާންކޮށް، ކެންޑިޑޭޓުގެ ސިޓީއަކާއެކު އައުމަށް ވެސް އިއުލާނުގައި ބުނެފައި ވެއެވެ.

އެގޮތުގެ މަތިން އެއްވެސް ބޭފުޅަކު ހާޒިރު ނުވާނަމަ، ކެންޑިޑޭޓުގެ ބަދަލުގައި ގުރުއަތު ނަގާނީ އީސީގެ ފަރާތުން ކަމަށްވެސް ބުނެފައިވެއެވެ.

ގުރައިދޫ ދާއިރާ އަށް ވާދަކުރުމުގެ މުއްދަތު ހަމަވެފައިވާއިރު، އެ ދާއިރާއަށް ވެރިކަން ކުރާ މައި ޕާޓީ، އެމްޑީޕީންނާއި، އިދިކޮޅު ޕީޕީއެމްގެ އިތުރުން އެމްއެންޕީން ވެސް ވާދަކުރެއެވެ. 

އެމްޑީޕީ - އިބްރާހީމް ޝާޒް

ޕީޕީއެމް - ހުސައިން ރިޒާ

އެމްއެންޕީ - އަލީ އާރިފް

ގުރައިދޫ ދާއިރާގެ ގޮނޑި ހުސްވެފައިވަނީ ކުރިން އެ މަގާމު ފުރުއްވަމުންދިޔަ ޕީޕީއެމްގެ މެންބަރު އިބްރާހީމް ރިޒާ އަވަހާރާވުމާއި ގުޅިގެންނެވެ.

މެންބަރު ރިޒާ އަވަހާރަވީ ކެންސަރުގެ އާލާސްކަންފުޅަކަށް ފަރުވާ ހޯއްދަވަމުން ގެންދަވަނިކޮށް ފެބްރުއަރީ 22 ވަނަ ދުވަހުގެ ރޭ މެލޭޝިއާގައެވެ.

އިދިކޮޅު ޕީޕީއެމްގެ މެމްބަރެއްގެ ގޮތުގައި މަޖިލިސް ތަމްސީލުކުރައްވަމުން ގެންދެވި ރިޒާއަކީ މަޖިލީހުގައި އެންމެ ގިނަ ދުވަސްވީ އެއް މެންބަރެވެ. ރިޒާ ވަނީ، ނިމުނު 3 ދައުރުގައިވެސް މެންބަރުކަން ކުރައްވާފައެވެ.

އެދާއިރާއަށް ޕީޕީއެމްގެ ފަރާތުން ވާދަކުރައްވާ ހުސައިން ރިޒާ އަކީ އިބްރާހިމް ރިޒާގެ ކޮއްކޮ އެކެވެ.