މާދަމާ ރޭ ބޭއްވުމަށް ނިންމާފައިވާ މޯލްޑިވްސް ސްޕޯޓްސް އެވޯޑްސް 2023, ގާލާ ނައިޓް ފަސްކޮށްފިއެވެ.

ޔޫތު މިނިސްޓްރީން ބުނީ، މޫސުމް ގޯސްވުމުގެ ސަބަބުން މާދަމާރޭ ބޭއްވުމަށް ހަމަޖެހިފައިވާ ސްޕޯޓްސް އެވޯޑްސް، ހުކުރު ދުވަހުގެ ރެއަށް ފަސް ކުރެވިފައިވާ ކަމަށެވެ.

ސްޕޯޓްސް އެވޯޑްސްގެ ގާލާ ނައިޓް ފަސްކުރެވުނު ނަމަވެސް އެ އިވެންޓުގައި ބައިވެރިވުމަށް ބޭރުގެ ބައެއް މަޝްހޫރު ތަރިން މިހާރުވަނީ ރާއްޖެ އައިސްފައެވެ.

Advertisement

ރާއްޖޭގައި ކުޅިވަރު ކުޅޭ ކުޅުންތެރިންގެ އަގު ވަޒަންކުރުމުގެ ގޮތުން ބޭއްވޭ މި އެވޯޑް ހަފްލާ ގައި ކުޅުންތެރިންނާއި ކޯޗުންނާއި ކުޅިވަރުގެ އޮފިޝަލުންގެ އިތުރުން ކުޅިވަރުން ރަން ވަނަތައް ހޯދާ ކުޅުންތެރިންނަށް ވެސް އެވޯޑް ދޭނެއެވެ.

އެގޮތުން އެންމެ މޮޅު ބޮޑީބިލްޑިންގ އެތްލީޓްގެ މަގާމާއި، ބާސްކެޓްބޯޅައިގެ އެންމެ މޮޅު އަންހެން އަދި ފިރިހެން ކުޅުންތެރިޔާގެ މަގާމް، އެންމެ މޮޅު ފިރިހެން ހޭންޑްބޯލް ކުޅުންތެރިޔާގެ މަގާމް، ކެރަމްގެ އެންމެ މޮޅު އަންހެން އަދި ފިރިހެން ކުޅުންތެރިޔާގެ މަގާމް، ޓެނިިސްގެ އެންމެ މޮޅު ފިރިހެން ކުޅުންތެރިޔާގެ މަގާމް، އަދި ޕޯލް ބިލިއާރޑްގެ އެންމެ މޮޅޫ އަންހެން ކުޅޫންތެރިޔާގެ މަގާމްގެ ނޮމިނޭޝަން މިހާރު ވަނީ އިއުލާން ކޮށްފައެވެ.

މި އިވެންޓްގައި ދުނިޔޭގެ ނަން މަޝްހޫރު ގިނަ ކުޅިވަރު ޝަހުސިއްޔަތުތަކެއް ބައިވެރިވާނެ ކަމަށް ޔޫތު މިނިސްޓްރީން ވަނީ ބުނެފައެވެ.

އެގޮތުން މިއަހަރުގެ ހަފްލާގައި އިނގިރޭސި ގައުމީ ޓީމުގެ ކުރީގެ ގޯލްކީޕަރު ޑޭވިޑް ޖޭމްސް އާއި ކްރިކެޓްގެ ތާރީހީ ރެކޯޑްތަކެއް ހޯލްޑް ކުރާ ބެޓްސްމަން، ބްރަޔާން ލާރާގެ އިތުރުން ސްޕެޝަލް އެތުލީޓް، މާލޫ ވެން ރައިން ބައިވެރިވާނެ ކަމަށް ޔޫތު މިނިސްޓްރީއިން ވަނީ އިއުލާންކޮށްފައެވެ.