ރޯޑް ޑިވެލޮޕް ކޯޕަރޭޝަން (އާރުޑީސީ) އާއި ހަވާލުކޮށްގެން ޒަމާނީ ފެންވަރަކަށް ތަރައްގީ ކުރަމުންދާ އަމީނީ މަގުގެ ފެން ހިންދާ ނިޒާމު ވަނީ އަޕްގްރޭޑް ކުރެވިފައިކަމަށް އެ ކުންފުނިން ބުނެފި އެވެ. 

1.7 ކިލޯ މީޓަރު ތާރު އަޅައިގެން 84 މިލިއަން ރުފިޔާގެ އެ މަޝްރޫއުގެ ފުރަތަމަ ސެގްމަންޓުގައި ތާރު އަޅާ އާންމުންނަށް ހުޅުވާލާފައިވާއިރު މިފަހުން މާލެއަށް ކުރި ވިއްސާރައިގައި އެމަގުގައި ފެންބޮޑުވުމާއި ގުޅިގެން އާންމުންގެ ފާޑުކިޔުން ވަނީ އަމާޒުވެގެން ގޮސްފައެވެ. 

އެކަމާ ގުޅޭގޮތުން އާރުޑީސީން ބުނީ ވާރޭ ވެހޭއިރު އަމީނީ މަގުގައި ފެންބޮޑުވި ނަމަވެސް ވާރޭ ހުއްޓާލާތާ ކުޑަ އިރުކޮޅެއްގެ ތެރޭގައި މަގުން ފެން ހިނދިގެން ދާނެ ކަމަށެވެ. 

Advertisement

އާރުޑީސީން ތަރައްގީކުރާ އަމީނީ މަގުގައި ފެންހިންދާ ނިޒާމު ވަނީ އަޕްގްރޭޑް ކުރެވިފައި ކަމަށާއި، މުޅި މަގު ނިމޭއިރު ފެންބޮޑުވާ މައްސަލައަށް ދާއިމީ ޙައްލެއް ލިބިގެންދާނެކަމަށް އެ ކުންފުނިން ވަނީ ބުނެފައެވެ. 

ޕްލޭނިން މިނިސްޓްރީ މެދުވެރިވެގެން އަމީނީ މަގު ތަރައްގީ ކުރުމުގެ މަސައްކަތް އާރުޑީސީއާއި ހަވާލުކޮށްފައިވަނީ 10 މަސްތެރޭ މަގުގެ މަސައްކަތް ނިންމުމަށެވެ. 

އަމީނީ މަގުގެ މަސައްކަތް ކުރިއަށް ދާ ސްޕީޑަށް ގިނަ ފާޑުކިޔުންތަކެއް އަމާޒުވެފައިވާއިރު، މިހާރު އޮތް އެއްބަސްވުމާއި އެއްގޮތަށް އެ މަސައްކަތް ނުނިންމޭނެތީ ޕްލޭނިން މިނިސްޓްރީން ވަނީ އާރުޑީސީއަށް މުއްދަތު ވެސް އިތުރުކޮށްދީފަ އެވެ. 

އެންމެ ފަހުން މާލޭގައި ހެދި އަމީނީ މަނުގެ ފުރަތަމަ ސެގްމަންޓުގައި ފެންބޮޑުވުމާއި ގުޅިގެން އާންމުން ފާޑުކިޔަން ފަށާފައިވާއިރު، މަގުގައި ގާ އަތުރަމުންދާތީ ވެސް ބޮޑެތި ފާޑުކިޔުންތަކެއް ވަނީ އާރުޑީސީއަށް އަމާޒުވެފަ އެވެ.