ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ރިޔާސީ ކެންޑިޑޭޓާމެދު ސުވާލު އުފެއްދުމުގެ ޖާގަ އެހެން އެއްވެސް ސިޔާސީ ޕާޓީއަކަށް ނެތްކަމަށް މިވަގުތު އިދިކޮޅު އިއްތިހާދު ހިންގެވުމާއި ހަވާލުވެހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ. 

އަބްދުއްރަހީމް މިފަދައިން ވިދާޅުވެފައިވަނީ ރައީސް ޔާމީން މިނިވަންކުރުމަށް ގޮވާލާ މާލޭގައި ކުރިއަށް ގެންދިޔަ އިހުތިޖާޖުގެ ބައިވެރިންނާއި މުޚާތަބުކުރައްވާ ވާހަކަދައްކަވަމުން ނެވެ. 

އެގޮތުން އަބްދުއްރަހީމް ވަނީ ޕީޕީއެމްގެ ރިޔާސީ ކެންޑިޑޭޓަކީ ޕާޓީގެ ރައީސް އަބްދުﷲ ޔާމީން އަބްދުލްގައްޔޫމުކަމަށް ތަކުރާރުކޮށް ވިދާޅުވެފަ އެވެ. އަދި އެ ނޫން ގޮތަކަށް އެކަން އޮތްކަމަށް ބުނެ، ރިޔާސީ ކެންޑިޑޭޓާއި މެދު ސުވާލު އުފައްދަން އެހެން އެއްވެސް ފަރާތަކުން މަސައްކަތް ނުކުރުމަށް އަބްދުއްރަހީމް ގޮވާލެއްވި އެވެ. 

Advertisement

އަބްދުއްރަހީމް ވިދާޅުވީ ރައީސް ޔާމީން އަނބުރާ ވެރިކަމަށް ގެންނަން އިދިކޮޅު އިއްތިހާދުން މަސައްކަތް ކުރަނީ ޒުވާނުންގެ އުންމީދުތައް ފުރިހަމަކޮށްދިނުމަށް ކަމަށެވެ. 

ދިވެހި ރައްޔިތުން މި ޤައުމާއި ދޭތެރޭގައި ދެކެމުންދާ ހުވަފެންތަކެއް ހުރިކަމަށާއި، އެ ހުވަފެންތައް ހަޤީގަތަށް ހަދާދެވޭނެ ހަމައެކަނި ލީޑަރަކީ ރައީސް ޔާމީންކަން ރައްޔިތުން ޤަބޫލުކުރާ ކަމަށާއި، އެމަނިކުފާނު ވެރިކަމަށް އަނބުރާ ގެނައުމަށް ރައްޔިތުން މަސައްކަތް ކުރަނީ އެ ސަބަބާހުރެކަމަށް އަބްދުއްރަހީމް ވިދާޅުވި އެވެ. 

ނުހައްޤު ހުކުމެއް މިވަގުތު ތަންފީޒު ކުރައްވަމުން ގެންދެވި ނަމަވެސް އެއީ ވަގުތީކަމެއް ކަމަށާއި، ދާދި އަވަހަށް އެމަނިކުފާނު އެ ހުކުމުން ސަލާމަތްވެ އިދިކޮޅުގެ ގައުމީ މަސައްކަތާއި ހަވާލުވެވަޑައިގަންނަވާނެ ކަމަށާއި، ރައީސް ޔާމިން ރިޔާސީ ރޭހުގައި ވާދަނުކުރައްވާނެކަމަށް އެހެން ސިޔާސީ ޕާޓީތަކުން ދައްކަމުންދާ ވާހަކަތަކާއި ގުޅިގެން އެއްވެސް ސަޕޯޓަރަކު މާޔޫސް ނުވުމަށް އަބްދުއްރަހީމް ވަނީ އެދިވަޑައިގަންނަވާފަ އެވެ.