އިންޑިޔާގެ ބެންގަލޫރާއި މައިސޫރް އާއި ދެމެދު ގުޅުވައިދޭ އެކްސްޕްރެސްވޭ ހުޅުވިތާ ހަފްތާއެއް ނުވަނިސް ހަލާކުވެއްޖެއެވެ.

އިންޑިޔާގެ ބޮޑުވަޒީރު ނަރެންދްރަ މޮދީ މާރޗް 12 ވަނަ ދުވަހު ހުޅުވައިދިން މި މަގު ހަލާކުވެ ގެއްލުންތަކެއް ލިބިފައިވަނީ ވާރޭވެހުމުގެ ސަބަބުންނެވެ.

ބެންގަލޫރާއި މައިސޫރް ގުޅުވައިދޭ މި މަގު، ވާރޭވެހުމުގެ ސަބަބުން ފެންނުހިނދި، ވެހިކަލްތަކަށް ކުރިއަށް ދުއްވެން ނެތުގެން މަގުމަތީގައި ޓްރެފިކް ވަނީ ބޮޑުވެފައެވެ.

Advertisement

"މަގުހެދުމުގައި ފެންހިނދުމަށް ޖާގަ ދޫކޮށްފައިވާނެ، ނަމަވެސް އެ އަވަށުގެ ބައެއްމީހުން ޗަކަވެލި އަޅައި އެތަން ބައްދާލައިފައިއޮތީ، އެހެންވެ ފެންބޮޑުމިވީ، އަހަރެމެން މިހާރު މިދަނީ އެތަން ސާފުކުރަމުން، ސާފު ކުރެވުނީމަ އެތަނުން ފެންހިނދި މަގު ހުޅުވާލެވެނޭ، އޭރުން ވެހިކަލްތަކަށް ދެވޭނީ" އިންޑިޔާގެ ނޭޝަނަލް ހައިވޭ އޮތޯރިޓީގެ ޕްރޮޖެކްޓް ޑިރެކްޓަރ ބީޓީ ސިރްދާރް އިންޑިއަން އެކްސްޕްރެސް އަށް ބުނެފައިވެއެވެ.

މި ސަރަހައްދަކީ މިދިޔަ އޮގަސްޓު މަހުވެސް ވާރޭ ވެހުމުގެ ސަބަބުން ފެންބޮޑުވި ސަރަހައްދެކެވެ. އިންޑިޔާގެ ރޯޑް ޓްރާންސްޕޯޓް އެންޑް ހައިވޭ ނިތިން ގަޑްކާރީ ބުނެފައިވަނީ މިކަންތައް ތަކުރާރު ވިޔަނުދިނުމަށް ކުރެވެން ހުރި ކަންކަން ކުރާނެ ކަމަށާއި، ޓެކްނިކަލް ޓީމަކުން ރޯޑް ސޭފްޓީ އޮޑިޓެއް މިހާރު ކުރަމުންދާކަމަށެވެ.

މިހާ ކުރުމުއްދަތެއްގެ ތެރޭގައި އެ މަގު ހަލާކުވުމުން އިދިކޮޅު ފަރާތްތަކުން ދަނީ ވެރިކަން ކުރާ ބީޖޭޕީ އަށާއި މޯދީ އަށް ވަރަށް ބޮޑަށް ފާޑު ކިޔަމުންނެވެ.

އަދި މިކަމާއި ގުޅިގެން ބީޖޭޕީގެ ސަރުކާރުގެ ކޮރަޕްޝަން ބޮޑުވެފައިވާ މިންވަރާއި މެދު އިދިކޮޅު ފަރާތްތަކުން އަންނަނީ ވާހަކަ ދައްކަމުންނެވެ.