މިދިޔަ 4 އަހަރަކީ ސަރުކާރަށް މަޖިލިހުގެ ބޮޑު މެޖޯރިޓީއެއް އޮތުމުގެ ސަބަބުން ދައުލަތުގެ ހުރިހައި މުއައްސަސާއެއް ވާވެފައި އޮތް 4 އަހަރު ކަމަށް އެމްޑީޕީގެ ފުރަތަމަ ރައީސް އިބްރާހީމް އިސްމާޢީލު(އިބުރާ) ވިދާޅުވެއްޖެއެވެ.

ނިމިގެން މިދާ 5 އަހަރަކީ ދައުލަތުގެ މުއައްސަސާތައް ހަމައިސްކޮޅަށް ތެދުވެ، ނިޒާމުގަ ހުރި އެންމެ އަސާސީ މައްސަލަތައް ދެނެގަނެ އެކަންކަން ޙައްލު ކުރުމަށް ފުރުސަތު ދެވިގެންދިޔަ 5 އަހަރު ކަމަށް އަދާލަތު ޕާޓީގެ ރަޖިސްޓްރާ ޝާފިއު އަލީ ވިދާޅުވުމާއި ގުޅިގެން އެކަމަށް ރައްދު ދެއްވައި ކުރެއްވި ޓްވީޓެއްގައި އިބުރާ ވިދާޅުވީ އެވާހަކަ އަކީ ކަނޑައެޅިގެން ރަނގަޅުނޫން ވާހަކައެއް ކަމަށެވެ.

އެގޮތުން، އިބުރާ ވިދާޅުވީ މިދިޔަ 4 އަހަރަކީ ސަރުކާރަށް މަޖިލީހުގެ ބޮޑު މެޖޯރިޓީއެއް އޮތުމުގެ ސަބަބުން ދައުލަތުގެ ހުރިހައި މުއައްސަސާއެއް ވާވެފައި އޮތް 4 އަހަރު ކަމަށެވެ..

އަދި އެއްވެސް ތަނަކުން ސަރުކާރާ ދެކޮޅުނިންމުމެއް ނިމިގެން މިދާދައުރުގައި ނުނިންމޭ ކަމަށް ވެސް ވިދާޅުވެ އިބުރާ ވަނީ ސަރުކާރަށް ފާޑުވިދާޅުވެފައެވެ. 

މީގެ ކުރިންވެސް އިބުރާ ވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރަށް ފާޑުވިދާޅުވެ ވާހަކަ ދައްކަވާފައެވެ. އެގޮތުން އޭނާ ދެއްކެވި ވާހަކަ ތަކަށް އެމްޑީޕީގެ ޗެއާޕާސަން އަދި އިބުރާގެ ކޮއްކޮ ފައްޔާޒު އިސްމާއިލް ރައްދު ދެއްވާފައިވާ އިރު ދެބެއިންގެ ދެމެދުގައި ބަހުގެ ހަމަލާތަކެއް ވެސް ވަނީ ރައްދު ކުރެވިގެން ގޮސްފައެވެ. 

އެކަމާއި ގުޅިގެން ގިނަ ބައެއްގެ ފާޑުކިޔުންތައް އެ ދެބެއިންނަށް އަމާޒުވެގެން ދިޔައެވެ.