ރައީސުލްޖުމްޙޫރިއްޔާ އިބްރާޙިމް މުޙައްމަދު ޞާލިހުގެ މޮޓޯކޭޓަށް އިދިކޮޅު މުޒާހަރާގެ ބައިވެރިން ހުރަސްއަޅައިފި އެވެ. 

އިދިކޮޅު އިއްތިހާދުން މިރޭވެސް ދަނީ ޕީޕީއެމްގެ ރައީސް އަދި އެ ޕާޓީގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމު މިނިވަންކުރުމަށް ގޮވާލާ ފުރަމާލޭގައި އަޑުއުފުލާފައެވެ.  

ރައީސް ޞާލިހުގެ މޮޓޯކޭޓަށް އިދިކޮޅު މުޒާހަރާގެ ބައިވެރިން ހުރަސްއަޅާފައިވަނީ ބައިނަލްޢަޤްވާމީ އަންހެނުންގެ ދުވަހުގެ ރަސްމީ ޖަލްސާގައި ބައިވެރިވެވަޑައިގަތުަށް ފަހު އަނބުރާ ވަޑައިގެންނެވި މަގުމަތީގައެވެ. 

އިދިކޮޅު މުޒާހަރާގެ ބައިވެރިންވަނީ ރައީސް ޞާލިހުގެ ކާރުކޮޅު ކުރިމައްޗަށް އަރާ ރައީސް ޔާމީން މިނިވަންކުރުމަށް ގޮވާލާ އަޑުއުފުލާފަ އެވެ.

އެމަނިކުފާނުގެ މައްޗަށް ކްރިމިނަލް ކޯޓުން ހުރީ "ހަރާން" ހުކުމެއް ކަމަށާއި، އެ ހުކުމް ކުރީ ރައީސް ޞާލިހު އަޑީގައި ހުންނަވާ ނުފޫޒު ފޯރުވައިގެންކަމަށް މުޒާހަރާގެ ބައިވެރިން ވަނީ ގޮވާލާފައެވެ. ތަކުރާރުކޮށް ރައީސް ޔާމީން ދޫކޮށްލުމަށް ބައިވެރިން ގޮވާލާފައި ވެއެވެ. 

މޮޓޯކޭޓަށް ހުރަސްއެޅުމާއި ގުޅިގެން މުޒާހަރާއިން 4 މީހުން ހައްޔަރުކޮށްފައިވާކަމަށް އިދިކޮޅުގެ ހަރަކާތު ކޮމެޓީގެ ޗެއާ މުޙައްމަދު އިސްމާއިލް ވަނީ "ވޮއިސް" އަށް ވިދާޅުވެފައެވެ. އޭގެ އިތުރުން މިރޭގެ މުޒާހަރާއިން އެމީހުންނާއެކު ޖުމްލަ 16 މީހުން ހައްޔަރުކޮށްފައިވާކަމަށް މުޙައްމަދު އިސްމާއިލް ވިދާޅުވިއެވެ. 

އިދިކޮޅުގެ މުޒާހަރާގެ ބައިވެރިން ރައީސް ޞާލިހުގެ ކާރުކޮޅު ކުރިމައްޗަށް އަރާ އަޑުއުފުލާފައިވަނީ އެމަނިކުފާނުގެ ސެކިއުރިޓީންގެ ހާޒިރުގައެވެ. 

ސެކުއުރިޓީންގެ ހާޒިރުގައި އިދިކޮޅުގެ މުޒާހަރާގެ ބައިވެރިންނަށް ރައީސް ޞާލިހުގެ މޮޓޯކޭޓަށް ހުރަސްއެޅުނީ ކީއްވެތޯ ސިފައިންނާއި ކުރި ސުވާލަށް އަދި އެ އިދާރާއިން ޖަވާބުދީފައެއް ނުވެއެވެ. އެހެން ނަމަވެސް، އެއީ ސެކިއުރިޓީ ފެއިލާއެއްކަމަށް ބެލުމުގެ ޖާގަ އެބައޮތެވެ.