ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހުގެ މޮޓޯކޭޑަށް ހުރަސްއެޅުމަށް އިދިކޮޅުގެ މުޒާހަރާގެ ބައިވެރިންނަށް ހުރަސްއެޅުމުގެ ފުރުސަތު ލިބިގެން ދިޔައީ ފުލުހުންނާއި ސިފައިންގެ އިހުމާލުންކަމަށް ނުވަތަ އެ ފަރާތްތަކުގެ ފަރުވާކުޑަކަމުން ކަމަށް އިދިކޮޅު އިއްތިހާދުން ބުނެފި އެވެ. 

ބައިނަލްޢަޤްވާމީ އަންހެނުންގެ ދުވަހުގެ ރަސްމީ ޖަލްސާގައި ބައިވެރިވެވަޑައިގަތުމަށް ފަހު އަނބުރާ ވަޑައިގެންނެވި މަގުމަތީގައި އިދިކޮޅުގެ މުޒާހަރާގެ ބައިވެރިންވަނީ އެމަނިކުފާނުގެ މޮޓޯކޭޑަށް ހުރަސްއަޅާފަ އެވެ. 

ރޭގެ އެ ހާދިސާއާއި ގުޅިގެން މަޖިލީހުގެ ނައިފަރުދާއިރާގެ މެމްބަރު އަހުމަދު ޝިޔާމު ވަނީ ހައްޔަރުކޮށްފަ އެވެ. އަދި ޝިޔާމުގެ އިތުރުން 4 މީހަކު އެ މައްސަލައިގައި ހައްޔަރުކުރިއެވެ. 

Advertisement

އެކަން ކުށްވެރިކޮށް އިދިކޮޅުން ނެރުނު ނޫސްބަޔާނެއްގައި ވިދާޅުވެފައިވަނީ ޕީޕީއެމް ގެ ނާއިބު ރައީސް އަޙްމަދު ޝިޔާމް ހައްޔަރު ކުރުން ބަލައެއް ނުގަނެވޭކަމަށެވެ. އަދި އެ ހަޑިމުޑުދާރު އަމަލު ހަރުކަށި އިބާރާތުން ކުށްވެރިކުރާ ކަމަށެވެ. 

ސުލްޙަވެރި އިޙުތިޖާޖުގެ ބައިވެރިންގެ ތެރެއަށް މޮޓޯކޭޑް ވަދެގެން ދިޔަ ވަގުތަކީ ނާއިބު ރައީސް ޝިޔާމް އެސަރަހައްދުގައިވެސް ނެތް ވަގުތަކަށްވާއިރު، އޭނާގެ މައްޗަށް ޖިނާއީ ތުހުމަތުކޮށް އޭނާ ހައްޔަރުކުރުމަކީ ރައީސުލްޖުމްހޫރިއްޔާގެ ސެކިޔުރިޓީ ފެއިލްވުމުން އެކަމުގެ ޒިންމާއިން ރެކެން ދެއްކި ބަހަނާއެއްކަމަށް އިދިކޮޅުން ވަނީ ބުނެފައެވެ. 

ރޭ ކުރިއަށް ގެންދިޔަ ސުލްޙަވެރި އިޙުތިޖާޖު ނިންމާލުމަށްޓަކައި އިޙުތިޖާޖުގެ ބައިވެރިން ޕާޓީ އޮފީސް ކުރިމައްޗަށް އެއްވެ ތިބި ވަގުތެއްގައި ކުއްލިއަކަށް ރައީސުލްޖުމްހޫރިއްޔާގެ މޮޓޯކޭޑް އެމަނިކުފާނުގެ ކާރުކޮޅާއެކު ބައިވެރިންގެ ތެރެއަށް ވަދެގަތުމަކީ ނޭނގި ހިނގާނޭ ކަމެއް ކަމަށް ޤަބޫލެއް ނުކުރެވޭ ކަމަށާއި، އެއީ ވަރަށް ބޮޑަށް ރޭވިގެން ހިންގި ޢަމަލެއްގެ ގޮތުގައި އިދިކޮޅުން ވަނީ ތުހުމަތުކޮށްފަ އެވެ.

އަދި އެ ބަޔާނުގައި ބުނެފައިވަނީ އެހެން ނޫންކަމަށްވާނަމަ އެއީ ދިވެހި ފުލުހުންނާއި ސިފައިންގެ ދެ މުއައްސަސާގެ އިހުމާލެއް ނުވަތަ ފަރުވާކުޑަކުރުމުގެ ޢަމަލެކެވެ. ނުވަތަ އެ 2 މުއައްސަސާ އެންމެ މަތިން ފެށިގެން ފެއިލް ވެފައިވާ ކަމުގެ ޢަލާމާތެކެވެ.

އެކަން ފާހަގަކޮށް އިދިކޮޅުން ބުނީ އެ މައްސަލަ މިނިވަން މުސްތަޤިއްލު ފަރާތަކުން މިހާރުން މިހާރަށް ލަސްނުކޮށް ތަޙުޤީޤުކޮށް އެ 2 މުއައްސަސާ އިސްލާޙު ކުރުމުގެ ގޮތުން އަޅަންޖެހޭ ފިޔަވަޅުތައް އެޅުމަށް ގޮވާލާކަމަށެވެ.

ދައުލަތުގެ ހުއްދައެއް ކުރިން ހޯދުމަކާނުލައި ސުލްޙަވެރިކަމާއެކު އެއްވެ އުޅުމުގެ ޙައްޤަކީ ޤާނޫނުއަސާސީގެ 32 ވަނަ މާއްދާއިން ދިވެހި ކޮންމެ ރައްޔިތަކަށް މުޠަލަޤަށް ކަށަވަރުކޮށްދީފައިވާ ޙައްޤެއް ކަމަށާއި، 32 ވަނަ މާއްދާއިން ކޮންމެ މީހަކަށްވެސް ލިބިދީފައިވާ ޙައްޤެއްގެ ބޭނުން ކުރުން އެއީ ޖިނާޢީ ކުށެއްކަމަށް ކަނޑައެޅުމުގެ ބާރަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީން އެއްވެސް ފަރާތަކަށް ދީފައިވާ ޙައްޤެއް ނޫންކަމަށް އިދިކޮޅުން ވަނީ ބުނެފައެވެ.