ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ މޮޓޯކޭޑަށް އިދިކޮޅު މުޒާހަރާގެ ބައިވެރިން ހުރަސް އެޅި މައްސަލައިގައި ސަލާމަތީ ބާރުތަކުން އަމަލުކުރި ގޮތާއިގުޅޭ ތަފްސީލީ މައުލޫމާތު ހޯދުމަށް، ސަލާމަތީ ބާރުތައް 241 ކޮމެޓީއަށް ހާޒިރުކުރަން ނިންމައިފިއެވެ.

ބައިނަލްއަޤްވާމީ އަންހެނުންގެ ދުވަސް ފާހަގަކުރުމަށް ރޭ ހުޅުމާލޭގައި ހުންނަ ޢުމަރު ޒާހިރު އޮފީސް އިމާރާތުގައި ބޭއްވެވި ޖަލްސާ ނިންމާލުމަށް ރައީސުލްޖުމްހޫރިއްޔާ މުލިއާގެއަށް ވަޑައިގެންނެވުމަށް ދަތުރުކުރައްވަމުން ދަނިކޮށް އިދިކޮޅު މުޒާހަރާގެ ބައިވެރިން ވަނީ ބޮޑު ތަކުރުފާނުމަގު ޕީޕީއެމް އޮފީސް ސަރަހައްދުން ރައީސްގެ މޮޓޯކޭޑަށް ހުރަސް އަޅާފަ އެވެ.

މިކަން ހިނގަދިޔަ ގޮތް ބެލުމަށް 241 ކޮމެޓީއަށް ހުށަހެޅުމާއި ގުޅިގެން މިއަދު ބޭއްވި ކޮމެޓީ ބައްދަލުވުމުގައި ކޮމެޓީގެ މެމްބަރުންގެ އިއްތިފާގުން ވަނީ މިމައްސަލަ ބަލައި އަޅަންޖެހޭ ފިޔަވަޅު އެޅުމަށް ކޮމިޓީން ކުރަންޖެހޭ މަސައްކަތް ކުރުމަށް ނިންމާފައެވެ.

Advertisement

އެކޮމިޓީގައި ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު ޢަބްދުލްޣަފޫރު މޫސާ ވަނީ މިކަމުގައި ސަލާމަތީ ބާރުތަކުން އަމަލުކޮށްފައިވާ ގޮތާއި، ފުލުހުންނާއި، ސިފައިންގެ ކޯޑިނޭޝަން އޮތް މިންވަރު ބެލުމަށް ހުށަހަޅާފައެވެ.

ކޮމެޓީގައި އެހެން މެމްބަރުން ހުށަހެޅި ހުށަހެޅުންތަކަށް ބަލާއިރު ހުޅުމާލޭ ދާއިރާގެ މެމްބަރު އަލީ ނިޔާޒު ވަނީ ރައީސްގެ މޮޓޯކޭޑު މަދު އަދަދެއްގެ ބަޔަކު ކުރި މުޒާހަރާއެއްގެ މެދުގައި އެހާ ގިނަ އިރު އޮންނަންޖެހި، ފަހުން ރޫޓު ބަދަލުކޮށްގެން ދާންޖެހުން ސަބަބު ބަލަންޖެހޭކަމަށެވެ.

މިބައްދަލުވުމުގައި މަޑުއްވަރީ ދާއިރާގެ މެމްބަރު އާދަމް ޝަރީފް ވަނީ ޕޮލިސް އަދި ސިފައިންގެ އިންސިޑެންޓް ރިޕޯޓެއް ހޯދައި، ސިފައިންނާއި ފުލުހުން ކޮމެޓީއަށް ހާޒިރުކޮށް ސުވާލު ކުރުމަށް ހުށަހަޅާފައެވެ.

މިބައްދަލުވުމުގައި މެމްބަރުންގެ ހުށަހެޅުންތަކަށްފަހު ކޮމެޓީގެ މުޤައްރިރު ނިންމީ މެމްބަރުން ހުށަހެޅުއްވި މައުލޫމާތުތައް ސަލާމަތީ ބާރުތަކުން ހޯދުމަށްފަހު ކޮމެޓީގެ ބައްދަލުވުމެއް ވީހާވެސް އަވަހަށް ބާއްވާ އެ ހާދިސާގައި ސަލާމަތީ ބާރުތަކުން އަމަލުކޮށްފައިވާ ގޮތް ލިޔުމުން ހޯދުމަށެވެ. އަދި އެ ދުމައްސަސާއާއި ކޮމެޓީއިން ވަކިވަކިން ބައްދަލުކުރުމަށެވެ. 

ރައީސް އިބްރާހިމް މުހައްމަދު ސޯލިހުގެ މޮޓޯކޭޑަށް އިދިކޮޅު ޕީޕީއެމް ސަޕޯޓަރުން ހުރަސް އެޅުމަކީ ސެކިއުރިޓީ ފެއިލްވުމެއް ކަމަށް ބަލައި އެމަނިކުފާނުގެ ސެކިއުރިޓީ ކަންތައްތަކުގައި އެންމެ އިސްކޮށް އުޅުއްވާ އެމްއެންޑީއެފްގެ ކޮމާންޑިން އޮފިސަރު ކާނަލް އަބްދުﷲ މުހައްމަދު ވަނީ ސަސްޕެންޑުކޮށްފަ އެވެ. 

އެހެން ނަމަވެސް ރައީސް ޞާލިހަށް ސެކިއުރިޓީ ދިނުމަކީ ދިފާއީ ބާރުގެ ޒިންމާއަކަށް ވާއިރު، ޗެކިއުރިޓީ ފޯރުކޮށްދިނުމަށް ދިފާއީ ބާރުގެ ފެއިލުވި މައްސަލައާއި ގުޅިގެން ޑިފެންސް މިނިސްޓަރު މާރިޔާ ދީދީ މަޤާމުން ވަކިކުރުމަށް ހުށައެޅި ކުއްލި މައްސަލަ އެމްޑީޕީގެ ސުޕަމެޖޯރިޓީ އޮންނަ ރައްޔިތުންގެ މަޖިލީހުން ބަލައިގެންފައެއް ނުވާކަން ފާހަގަކޮށްލެވެ އެވެ.