ފާއިތުވި 4 އަހަރެކޭވެސް އެއްފަދައިން މިއަހަރުގެ ރަމަޟާންމަހުގައިވެސް، މާރސީގެ އެންމެ މަޤުބޫލު އެއް ޕްރޮގްރާމްކަމުގައިވާ 'ހަދިޔާވަށި' ޕްރޮގްރާމް ރެއިން ފެށިގެން ކުރިއަށްދާނެކަމަށް އެ ޖަމިއްޔާ އިން ބުނެފި އެވެ.

މާރސީގެ ހަދިޔާވަށި ޕްރޮގްރާމަކީ، މަތިވެރި ރަމަޟާން މަހުގައި، މި ކުޑަ މުޖުތަމަޢުގައި ދަތި ޙާލުގައި ދިރިއުޅޭ ފަރާތްތަކާއި، ކިރިޔާވެސް ފުދިގެން އުޅޭ ފަރާތްތަކަށް ޞަދަޤާތްކުރެވޭނެ މަގެއް ހުޅުވައި، މުޖުތަމަޢުން އެއްވެސް ބަޔަކު ބާކީ ނުކޮށް، އެކަކު އަނެކަކަށް އެހީތެރިވެ ހެދުމަކީ އުފަލަކަށް ހެދުމުގެ މަގުސަދު ގައި އެ ޖަމިއްޔާ އިން ކުރިއަށް ގެންދާ ޕްރޮގްރާމެކެވެ. މިއީ މާސީގެ ހަދިޔާ ވަށި ޕްރޮގްރާމް ބާއްވާ ފަސް ވަނަ އަހަރެވެ.

މާރސީ އިން ބުނީ މިއަހަރުގެ ހަދިޔާވަށި ޕްރޮގްރާމުގައިވެސް، އެންމެހާ ފަރާތްތަކުން ފޯރުކޮށްދޭ ދީލަތި އެހީތައް، އެ އެހީ ލިބުން އެންމެ ޙައްޤުވެރި ފަރާތް ހޯދުމުގައި 'ހަދިޔާވަށި ކޮމިޓީ 2023' އިންސާފުވެރިކަމާއިއެކު ކުރިއަށް ގެންދާނެ ކަމުގެ ޔަޤީންކަން އަރުވާ ކަމަށެވެ.

ރެއިން ފެށިގެން ޕްރޮގްރާމް ހުޅުވާލެވިފައިވާއިރު، މާރސީގެ އެދުމަކީ، ހަމައެކަނި ރުފިޔާއިން މި ޕްރޮގްރާމަށް އެހީތެރިވުމުގެ ބަދަލުގައި، ދަތި ޙާލުގައި އުޅޭކަން އެނގޭ އާޢިލާތަކުގެ ނަމުގައި އެ ޖަމިއްޔާ އަށް ފޯރމު ހުށައަޅުއްވައި އެފަދަ ފަރާތްތަކަށް މި ޕްރޮގްރާމުގެ ތެރެއިން އެހީތެރިވެދިނުމުގެ ފުރުސަތު ހޯދައި ދިނުން ކަމަށް އެ ޖަމިއްޔާ އިން ބުނެއެވެ. 

ރުފިޔާ އެކައުންޓް؛ 7770000048136

ޑޮލަރު އެކައުންޓު؛ 7770000048137

ހަދިޔާވަށްޓަށް އެދި ހުށައެޅުއްވުމަށް ތިރީގައި އޮތް ލިންކުގައިވާ ފޯރމު ފުރައި، ތިރީގައިވާ ނަމްބަރުތަކަށް ގުޅުމަށް މާރސީ އިން އެދެއެވެ. 

9158066 | 9194498 | 7377547

http://shorturl.at/doHNQ

މާރސީގެ ހަދިޔާވަށި ހޯދުމަށް އެދި ހުށަހެޅުމުގެ ސުންގަޑިއަކީ 28 މާރިޗު ގެ 00:00 އެވެ. 

މާރސީ އިން ބުނީ މި އަހަރުގެ ރޯދަމަހުގައިވެސް އެ ޖަމިއްޔާގެ އަމާޒަކީ މަދުވެގެން 30 ޢާއިލާއަކަށް 1500 ރުފިޔާގެ ޕެކޭޖެއް ހަދިޔާ ކުރުން ކަމަށެވެ. 

މާރސީއަކީ، 2019 ވަނަ އަހަރުގެ ޖޫން މަހުގެ ތެރޭގައި ޔޫތު މިނިސްޓްރީގައި ރަޖިސްޓްރީކޮށްގެން ހިންގާ އަމިއްލަ ޖަމްޢިއްޔާއެކެވެ. ޖަމްޢިއްޔާއަކަށް ވުމަށްފަހުގައާއި އޭގެ ކުރިންވެސް މާރސީގެ ފަރާތުން ވަނީ އެހީތެރިކަން ބޭނުންވެފައިވާ އެކި ފަރާތްތަކަށް އެހީތެރިކަން ފޯރުކޮށްދީފައެވެ. ޚާއްޞަގޮތެއްގައި އެކިއެކި ފަންޑްރައިޒް އިވެންޓްތަކުން ގިނަ ޢަދަދެއްގެ އެހީތެރިކަން އެކި ފަރާތްތަކަށް ފޯރުކޮށްދީފައިވެއެވެ.