ރޯދަ މަހުގެ ފުރަތަމަ ދުވަހަކީ ގޭގައި ތިބޭ ވަރަށް ތުއްތު ކުދިންވެސް ރޯދަ ހިފާ ދުވަހެކެވެ. އެފަދަ ގިނަ ކުދިންގެ އެދުމަކަށް ވަނީވެސް ރީދަ ވީއްލުމަށް ޕިއްޒާ ހެދުމަށެވެ. އެހެންކަމުން މިއަދު ވޮއިސް ގެ ބަދިގެއިން މި ގެނެސްދެނީ ވަރަށް މީރުކޮށް ޗިކަން ޕިއްޒާ ތައްޔާރު ކުރާނެގޮތެވެ. 

1 ޕިއްޒާ ފުށްގަނޑު 

1 1/2 ޖޯޑު ބޯންލެސް ޗިކަން (ކުދިކޮށް ކޮށާފަ)

1/3 ޖޯޑު ފްރައިޑް ޗިކަން ސޯސް

1/2 ސައި ސަމުސާާ މުގުރި އަސޭމިރުސް

1/2 ޖޯޑު ޕީލްޑް ޓޮމާޓޯ

1 ކުޑަ ފިޔާ (ހިމުން ކޮށާފަ)

2 ލޮނުމެދު (ގާނާފަ)

1/3 ޖޯޑު މޮޒޮރެއްލާ ޗީޒް (ގާނާފަ)

1/2 ޖޯޑު ޗެޑާ ޗީޒް

1/4 ބެލް ޕެޕަރ (ކަރުނަގާ ދިގަށްވާ ގޮތަށް ފޮތި ކޮށްފައި)

5 އޮލިވް (ވަށްކޮށް ކޮށާފައި)

 ލޮނު

 ބަޓަރ

ބޭނުމިއްޔާ ކުޑަ ގިތެޔޮ މިރުސް ކޮޅެއް

1/3 ސައި ސަމުސަލުގެ އޮރެގާނޯ ޕައުޑަރު 

1) ތަވައަކަށް ކުޑަ ތެޔޮ ފޮދެއް އެޅުމަށްފަހު ތެޔޮ ހޫނު ވުމުން  ފިޔާ އަދި ލޮނުމެދު އަޅައި ފިޔާ މޯޅިވަންދެން ކައްކާލާށެވެ.

2) އެއަށްފަހު ކުކުޅު ކޮޅުވެސް އެއަށް އަޅާލުމަށްފަހު ރަހަލާ ވަރަށް ލޮނު ލުމަށްފަހު ކުކުޅު ރޯ ފިލަންދެން މަޑުގިނީގައި ފްރައި ކޮށްލާށެވެ. 

3) ދެން އޭގެތެރެއަށް އަސޭމިރުސް، ޕީލްޑް ޓޮމާޓޯ، އޮރެގާނޯ އަދި ފްރައިޑް ޗިކަން ސޯސް، އަޅާފައި މަސްގަނޑު ރަނގަޅަށް ކައްކާލާށެވެ. ރަހަ ބަލާލުމަށްފަހު ލޮނު ހެޔޮ ވަރު ކޮށްލުމަށްފަހު އުނދުން މަތިން ބާލާށެވެ.

4) ޕިއްޒާ ފިހާނެ ޓްރޭގެ މައްޗަށް ½ ސައިސަމުސަލެއްހާ ކޯން ފްލާ ބުރުއްސާލާށެވެ. ކޯން ފްލާ ނެތިއްޔާ މިހެން ނުހެދިޔަސް ރަނގަޅުވާނެއެވެ. ކޯން ފްލާ އަޅަނީ ޕިއްޒާގެ ފޫ ކުޑަކޮށް މުރަނަ ކޮށްލަން ވެގެންނެވެ.

5) ޓްރޭގައި ފުށްގަނޑު ބޭއްްވުމަށްފަހު ފުށްގަނޑު މަތީގައި ބަޓަރު ކޮޅެއް ރަނގަޅަށް ހާކާލާށެވެ. ހާކާފައި އޭގެ މައްޗަށް މޮޒޮރެއްލާ ޗީޒް ކޮޅު އަޅާލާށެވެ. 

6) ދެން މަސްގަނޑު ފަތުރާލުމަށްފަހު މަސްގަނޑު މަތީގައި ބެލްޕެޕާރ އާއި އޮލިވްސް (ބޭނުން ނަމަ ގިތެޔޮ މިރުސް ކޮޅު) އަތުރާލާފައި އޭގެ މައްޗަށް ޗެޑާ ޗީޒް ވެސް އަޅާލާށެވެ.

7) ދެން އަވަނަށް ލުމަށްފަހު 230 ޑިގްރީސް ސެލްސިއަސްގައި 15 މިނިޓު ނޫނީ ޗީޒް އާއި ފުށްގަނޑަށް ރަންކުލަ އަރާލަންދެން ފިހާށެވެ. (އަވަނަށް ޕިއްޒާ ލުމުގެ ކުރިން 230 ޑިގްރީސް ގައި 10 މިނެޓް ވަންދެން އަވަން ހޫނު ކޮށްލަން ވާނެ އެވެ. ޕިއްޒާ ތައްޔާރު ކުރާ ގަޑީގައި އަވަން ޕްރީ ހީޓަށް ޖެއްސުމުން ފިހަން ވާއިރަށް ހުންނާނީ ޕްރީ ހީޓް ވެފައެވެ.)