އިންޑިޔާގެ އިދިކޮޅުގެ އެންމެ އިސް ލީޑަރު ރާހުލް ގާންދީގެ މައްޗަށް ގުޖުރާތު ކޯޓުން އިއްވި ދެ އަހަރުގެ ޖަލު ހުކުމާއި އެއްކޮށް ޤާނޫނު ހަދާ މަޖިލީހުން އިން އޭނާއަށް ލިބިފައިވާ ގޮނޑި ގެއްލިއްޖެއެވެ.

ޤާނޫނު ހަދާ މަޖިލީހުން ރާހުލް ގާންދީ އަށް ފޮނުވައިފައިވާ އެންގުމުގައި ބުނެފައިވަނީ ކޯޓުން އޭނާ އާއި މެދު އިއްވި ޙުކުމާއި އެކު އެ "ލޯގްސަބާ" އިން  އޭނާއަށް ލިބިފައިވާ ގޮނޑި ގެއްލިފައިވާ ކަމަށެވެ.

ރާހުލް ގާންދީ ކޮށްފައިވާ ޓްވީޓެއްގައި ބުނެފައިވަނީ އޭނާ މަސައްކަތް ކުރަމުންދަނީ އިންޑިއާ އަށް ޓަކައި ކަމަށާއި އެކަމަށް ޓަކައި ކޮންމެފަދަ ޤުރުބާނީއެއްވެސް ވެދާނެ ކަމަށެވެ.

Advertisement

އުމުރުން 52 އަހަރުގެ ރާހުލް ގާންދީގެ މައްޗަށް ދެއަހަރުގެ ޖަލު ހުކުމެއް އިއްވާފައިވަނީ އަބުރާއި ބެހުނު ކަމުގެ މައްސަލައެއްގައެވެ. އެމައްސަލައަކީ 2019 ވަނަ އަހަރު ބޭއްވުނު އިންތިޚާބުގެ ކެމްޕޭނު ޖަލްސާއެއްގައި ވާހަކަ ދައްކަމުން ވަގުންގެ ސަރނޭމް އަކަށް މޮދީ އަންނަނީ ކީއްވެތޯ ކުރި ސުވާލަކާއި ގުޅިގެނެވެ.

ރާހުލް ގާންދީ އަކީ އިންޑިޔާގައި ފާހަގަ ކޮށްލެވޭ އާއިލާ އެއް ކަމަށްވާ ނެހެރޫ ގާންދީ އާއިލާގެ މެމްބަރެކެވެ. އަދި އޭނާއަކީ އިންޑިއާގެ ކޮންގްރެސް ޕާޓީގެ ރައީސް ކަންވެސް ކޮށްފައިވާ މީހެކެވެ.

ރާހުލް ގާންދީގެ ފަރާތުން އެމައްސަލަ ހައިކޯޓުގައި އިސްތިއުނާފް ކުރާނެ ކަމަށް ވަނީ ބުނެފައެވެ.