ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމު މިނިވަންކުރުމަށް ގޮވާލާ އިދިކޮޅުން ސިލްސިލާގޮތެއްގައި ކުރިއަށްގެންދާ އިހުތިޖާޖު ރޯދަމަހަށް މެދުކަނޑާނުލާ ކުރިއަށް ގެންދިއުމަށް ނިންމައިފި އެވެ. 

ވ. އާރަށުގެ މުޢާމަލާތާއި ގުޅުވާ ރައީސް ޔާމީންގެ މައްޗަށް 11 އަހަރުގެ ޖަލުހުކުމެއް ކުރުމާއި ގުޅިގެން އިދިކޮޅުން ދަނީ އެ ހުކުމް ބާތިލުކުރުމަށް ގޮވާލާ މުޒާހަރާ ކުރަމުންނެވެ. އެއީ އެ މައްސަލަ ބެއްލެވި ފަނޑިޔާރަށް ނުފޫޒު ފޯރުވައިގެން ރިޝްވަތުދީގެން އިއްވި "ހަރާން ހުކުމެއް" ކަމަށް އިދިކޮޅުން ދަނީ ބުނަމުންނެވެ. 

ޕީޕީއެމްގެ ސިޔާސީ ހަރަކާތްތައް ރޯދަމަަހަށް ކޮންމެ އަހަރަކުވެސް މެދުކަނޑާލާ ނަމަވެސް މިއަހަރު މަގުމަތީ ހަރަކާތްތައް ރޯދަމަހުވެސް ކުރިއަށް ގެންދާނެކަމަށް އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއާ މުޙައްމަދު އިސްމާއިލް ވަނީ ވިދާޅުވެފަ އެވެ. 

Advertisement

އިދިކޮޅުން އެފަދައިން ނިންމާފައިވަނީ އެއްވެސް ރޯދަމަހެއްގައި ސަރުކާރުން އިދިކޮޅު ލީޑަރަށް ލުޔެއް ނުދޭތީކަން މުޙައްމަދު އިސްމާއިލް ފާހަގަކުރެއްވިއެވެ. އެގޮތުން މި ސަރުކާރުގައި އައި ކޮންމެ ރޯދަ މަހެއްގައި ރައީސް ޔާމީންއަށް ހުންނަވަން ޖެހިވަޑައިގަތީ ކޮންމެވެސް ބަންދެއްގައި ކަމަށާއި، ގިނަ ދުވަސް އެމަނިކުފާނު ހޭދަކުރެއްވީ ޖަލުގައިކަން މުޙައްމަދު އިސްމާއިލް ފާހަގަކުރެއްވިއެވެ. 

މުޙައްމަދު އިސްމާއިލް ވިދާޅުވީ އިދިކޮޅުގެ މަގުމަތީ ހަރަކާތް ރޯދަމަހު އޮންނާނީ ރޭގަނޑު 9:30 އިން 11:30 އަށް ކަމަށެވެ. އަދި އިދިކޮޅުގެ މި ހަރަކާތްތަކުގައި ވީހާވެސް ގިނަ ބަޔަކު ބައިވެރިވުމަށް މުޙައްމަދު އިސްމާއިލް ވަނީ ގޮވާލައްވާފަ އެވެ.