ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހު ދަތުރުކުރައްވަމުން ދިޔަ މޮޓޯކޭޑަށް ހުރަސްއެޅިކަމުގެ ތުހުމަތުގައި އަނެއްކާވެސް އިތުރުމީހަކު ހައްޔަރުކޮށް އޭނާގެ ބަންދަށް 5 ދުވަސް ޖަހައިފި އެވެ.
އެމައްސަލައާއި ގުޅިގެން އެރޭ ފުލުހުން ވަނީ ހަތަރު މީހަކު ހައްޔަރު ކޮށްފައެވެ. އޭގެ ތެރެއިން ދެ މީހެއްގެ ބަންދަށް 15 ދުވަސް، އަނެއް ދެމީހުންގެ ބަންދަށް ފަސް ދުވަސް މިމަހުގެ 21 ވަނަ ދުވަހު ވަނީ ޖަހާފައެވެ.
އެފަހުން ފުލުހުން ވަނީ އެ މައްސަލައާއި ގުޅިގެން އިތުރު މީހަކު ހައްޔަރުކޮށްފަ އެވެ. ރައީސްގެ މޮޓޯކޭޑަށް ހުރަސް އެޅި ކަމަށް ބުނެ ޕީޕީއެމް އެކްޓިވިސްޓެއް ކަމަށްވާ މުހައްމަދު އައްބާސް ހައްޔަރުކޮށް އޭނާގެ ބަންދަށް 5 ދުވަސް ޖަހާފައިވާކަމަށް އިދިކޮޅު ކޯލިޝަންގެ ތަރުޖަމާނު ހީނާ ވަލީދު ވަނީ ވިދާޅުވެފަ އެވެ.
ބައިނަލްއަޤްވާމީ އަންހެނުންގެ ދުވަސް ފާހަގަކުރުމަށް ހުޅުމާލޭގައި ހުންނަ ޢުމަރު ޒާހިރު އޮފީސް އިމާރާތުގައި ބޭއްވެވި ޖަލްސާގައި ބައިވެރިވެ ވަޑައިގެންނެވުމަށްފަހު ރައީސުލްޖުމްހޫރިއްޔާ ގެކޮޅަށް ވަޑައިގެންނެވި މަގުމަތިން އިދިކޮޅު މުޒާހަރާގެ ބައިވެރިން ވަނީ ޕީޕީއެމް އޮފީސް ސަރަހައްދުން ރައީސްގެ މޮޓޯކޭޑަށް ހުރަސް އަޅާފައެވެ.
އިދިކޮޅު ސަޕޯޓަރުން މޮޓޯކޭޑަށް ހުރަސްއަޅާފައިވަނީ ފުލުހުންނާއި ސިފައިންގެ ހާޒިރުގައެވެ.
އެ މައްސަލައާއި ގުޅިގެން އިދިކޮޅުން ބުނީ ޕީޕީއެމްގެ ސަޕޯޓަރުން ހައްޔަރުކުރަނީ ރައީސުލްޖުމްހޫރިއްޔާއަށް ސެކިއރުޓީ ދިނުމަށް ސަލާމަތީ ބާރުތައް ފެއިލްވުމުން އެކަމުގެ އިލްޒާމު ޕީޕީއެމް ބޮލުގައި އެޅުވުމަށްކަމަށެވެ. އަދި އެ މައްސަލައާއި ގުޅިގެން ހައްޔަރުކޮށްފައިވާ ފަރާތްތައް ދޫކޮށްލުމަށްވެސް އިދިކޮޅުން ވަނީ ގޮވާލާފަ އެވެ.
ރައީސުލްޖުމްހޫރިއްޔާގެ ސެކިއުރިޓީ ފެއިލްވިގޮތް ބެލުމަށް 241 ކޮމެޓީއިންވެސް ވަނީ މަސައްކަތް ފަށައިފައެވެ. އަދި ރައީސުލްޖުމްހޫރިއްޔާގެ ސެކިއުރިޓީ ކަންކަން ބެލެހެއްޓުމުގައި އިސްކޮށް ހުންނެވި ކާނަލް އަބްދުﷲ އިބްރާހިމް ވަނީ މަގާމުން ސަސްޕެންޑުކޮށްފަ އެވެ.
Advertisement
This content is created and paid for by advertisers and does not involve Voice Journalists
