ގަވާއިދާ ޚިލާފަށް ކާބޯތަކެތީގެ ޚިދުމަތް ދެމުންދާ ތަންތަނުގެ މައުލޫމާތު އާންމު ކުރާނެކަމަށް ހެލެތް ޕްރޮޓެކްޝަން އޭޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން މިފަދައިން ބުނެފައި ވަނީ އެ އިދާރާއިން ނެރުނު ބަޔާނެއްގައެވެ.
އެޗްޕީއޭގެ އެ ބަޔާނުގައި ބުނީ "ކާބޯތަކެތީގެ ޚިދުމަތް ދިނުމުގައި ހުންނަން ޖެހޭ ސާފުތާހިރުކަމުގެ މިންގަނޑުތައް ބަޔާންކުރާ ގަވާއިދު" ގެ 4 ވަނަ މާއްދާގެ (ހ) ގައި ބަޔާންކޮށްފައިވާ ފަދައިން ކާބޯތަކެތީގެ ޚިދުމަތް ދޭންވާނީ އެ އެޖެންސީން ނުވަތަ އެޖެންސީން ކަނޑައަޅާ ފަރާތަކުން ހުއްދަ އާއެކު ކަމަށް ވީ ނަމަވެސް މި ގަވާއިދާ ޚިލާފަށް ބައެއް ފަރާތްތަކުން ޚިދުމަތްދެމުންދާ ކަމަށެވެ.
އެހެންކަމުން ޚިދުމަތް ދޭއިރު "ކާބޯތަކެތީގެ ޚިދުމަތް ދިނުމުގައި ހުންނަންޖެހޭ ސާފުތާހިރުކަމުގެ މިންގަޑުތައް ބަޔާންކުރާ ޤަވާއިދަށް" ޚާއްސަ ސަމާލުކަމެއް ދިނުމަށް އަންގައި އެޗްޕީއޭ އިން ބުނީ ގަވާއިދާ ޚިލާފަށް ޚިދުމަތްދޭ ތަންތަނުގެ މައުލޫމާތު އެ ގަވާއިދުގެ 25 ވަނަ މާއްދާގެ (ހ) ގައި ބަޔާންކޮށްފައިވާ ގޮތުގެ މަތީން އާއްމުކުރަމުން ގެންދާނެ ކަމަށެވެ.
ކާބޯތަކެތީގެ ޚިދުމަތް ދިނުމުގައި ހުންނަންޖެހޭ ސާފުތާހިރުކަމުގެ މިންގަޑުތަކަށް ނުފެތޭ ތަންތަން ބަލައި އެތަންތަން ޖޫރިމަނާ ކުރުމުގެ މަސައްކަތް ވެސް އެޗްޕީއޭ އިން ކުރަމުންދެއެވެ.
Advertisement
This content is created and paid for by advertisers and does not involve Voice Journalists
