އިންޓަނޭޝަނަލް އެއިޑް ކެންޕެއިން (އައިއޭސީ) އިން ކުރިއަށް ގެންދާ ލޯތްބާއިއެކު ކެންޕެއިންގެ ތެރެއިން ޣައްޒާގެ 3800 އަށްވުރެ ގިނަ ޢާއިލާ އަކަށް ބާސްމަތީ ހަނޑޫ ބަހައިފިއެވެ. 

އައިއޭސީގެ ލޯތްބާއިއެކު ކެންޕެއިން އަކީ ރަމަޟާން މަހުގައި ދުނިޔޭގެ އެކި ކަންކޮޅުތަކުގައި ހާލުގައި އުޅޭ މުސްލިމް އަޚުންނާއި އުޚްތުންނަށް ސަދަޤާތްތަށް ފޯރުކޮށް ދިނުމަށް ބޭނުންވާ ފަރާތްތަކަށް އެކަންކުރުމުގެ މަގުފަހިކޮށްދެއްވުމުގެ މަގުސަދުގައި ހިންގާ ކެންޕެއިނެކެވެ.

މި ކެންޕެއިނަށް ދިވެހިންގެ އެހީ ފޯރުކޮށްދިނުމަށް މިއަހަރުވެސް ފުރުސަތު ހުޅުވާލާފައިވާއިރު އެ އެހީއިން ލިބުނު ފައިސާއިން، ކާބޯތަކެތި، އަންނައުނު، ހިފާގެންގުޅޭ ސާމާނު އަދި އެ ޤައުމަކަށް އެންމެ ބޭނުން ޖެހިފައިވާ ކަމަކަށް އެހީފޯރުކޮށްދެވިގެންދާނެކަމަށް ވެސް އައިއޭސީން މައުލުމާތު ދީފައިވެއެވެ.

އެގޮތުން، އެހީގެ ގޮތުގައި ލިބުނު ފައިސާއިން ޣައްޒާ ގައި ޖުމުލަ 20 ޓަނުގެ، 4000 ބާސްމަތީ ހަނޑޫ ބަސްތާ ބަހާފައިވާ ކަމަށް އައިއޭސީން ބުނެފައިވެއެވެ. އަދި އެ އެހީ 3800 އަށްވުރެ ގިނަ އާއިލާއަށް ފޯރުކޮށްދެވިފައިވާއިރު އޭގެ ސަބަބުން 28000 އަށްވުރެ ގިނަ މީހުންނަށް ފައިދާ ކުރާނެ ކަމަށް އެ ޖަމިއްޔާ އިން ބުނެއެވެ. 

ލޯތްބާއިއެކު ކެމްޕޭންގެ ތެރެއިން ޣައްޒާ ހިމެނޭ ގޮތަށް 25 ގައުމެއްގައި އެހީ ބެހިގެންދާނެކަންވެސް އައިއޭސީން މައުލޫމާތު ދެއެވެ. 

ލޯތްބާއެކު ކެމްޕެއިނަށް އެހީތެރިކަން ފޯރުކޮށްދިނުމަށް ބޭނުންވާ ފަރާތްތަކަށް އަދިވެސް އެ ފުރުސަތު ވަނީ ހުޅުވާލައިފައެވެ.

ބީއެމްއެލް އިސްލާމިކްއެކައުންޓް ނަމްބަރު: 7770000062740

އެކައުންޓް ނަން: International Aid Campaign

އެކައުންޓް ލޭބަލް: seasonal projects