ޒައިނުލް ޢަބިދީން އަކީ ސަލަފުންގެ ބޭކަލުންގެ ތެރެއިން ވަރަށް މަޝްހޫރު ބޭކަލެކެވެ. އެއީ ރަސޫލާ ޞައްލައްالله ޢަލައިހި ވަސައްލަމްގެ މުނިކާފަ ދަރިކަލެކެވެ. އެކަލޭގެފާނަކީ އިޚްލާޞްތެރި ކަމާއި އެކު ހޭދަކުރުމުގެ ރިވެތި ނަމޫނާއެކެވެ.   

ކޮންމެ ރެއަކުވެސް، އެންމެހައި މީސްތަކުން ނިދައި، ހަމަހިމޭންކަން ވެރި ވުމުން ޒައިނުލް ޢާބިދީން އެކަލޭގެފާނުގެ ގެކޮޅުން ނިކުންނަވައެވެ. އަދި އެ ރަށުގައި ތިބި ފަޤީރުންނާއި މަސްކީނުންނާއި ހުވަފަތް ވެފައި ތިބި މީހުންގެ ގެތަކަށް ކާބޯތަކެތި ގެންގޮސްދެއްވުމުގެ މަސައްކަތް ފައްޓަވައެވެ. 

ފަތިހު އެ އެންމެހައި ގެ ތަކުގެ މީހުން ހޭލައިގެން ނުކުންނަ އިރު ގޭގެ ދޮރު މަތީގައި ކާބޯތަކެތި ހުރެއެވެ. އެތަކެތި ފޯރުކޮށްދެނީ ކާކު ކަމެއް އެކަކަށްވެސް ނޭނގެއެވެ. 

މިފަދައިން ދުވަސްތައް މަސްތަކަށްވެ، މަސްތައް އަހަރުތަކަށްވެގެން ދިޔައެވެ. ޒައިނުލް ޢާބިދީން އެކަލޭގެފާނުގެ އެ މަސައްކަތް ހުއްޓުމެއްނެތި ދިޔައީ ކުރައްވަމުންނެވެ. އެކަލޭގެފާނު އަވަހާރަވަންދެނެވެ. އަވަހާރަވީއިރުވެސް އެފަދައިން ޞަދަޤާތް ކުރައްވަމުންދިޔައީ އެކަލޭގެފާނުކަމެއް އެއްވެސް މީހަކަށް ނޭނގެއެވެ. 

އަވަހާރަވުމުން ކަފުން ކުރެއްްވުމަށް ޒައިނުލް ޢާބިދީން ގެ ހަށިގަނޑު ގެންދެވުނެވެ. އަދި ކަފުން ކުރުމުގެ މަސައްކަތް ކުރެއްވުމަށް ކައިރީގައި އުޅުއްވި ބޭފުޅުންނަށް އެކަލޭގެފާނުގެ ބުރަކަށިފުޅުގައި ބޮޑު ކަޅު ކުލައިގެ ލަފެއް ހުއްޓައި ފެނި ވަޑައިގެންނެވިއެވެ. އެކަލޭގެފާނުގެ ބުރަކަށިފުޅުގައި ހުރި އެ ބޮޑު ލަފަކީ، ކޮނޑު ފުޅުމަތީގައި ކާބޯތަކެތި އުފުލަމުން، އެ ތަކެތި ގޭގެއަށް ފޯރުކޮށްދިނުމުގައި އުޅުމުގެ ސަބަބުން ޖަހާފައިވާ ލަފެވެ. 

އެ ލަފާއި، އަދި އެކަލޭގެފާނު އަވަހާރަވެޑައިގެންނެވުމާއި އެކު ފަގީރުންނަށް ލިބެމުންދިޔަ ކާތަކެތި ހުއްޓުމުން، އެތަކެތި ފޯރުކޮށްދެއްވަމުންދިޔައީ ޒައިނުލް ޢާބިދީން ކަން މީސްތަކުންނަށް އެނގިގެން ދިޔައެވެ. އޭގެ ކުރިން އެކަލޭގެފާނު ދުނިޔޭގައި ހުންނެވިހާ ދުވަހު އެކަން ކުރައްވަމުން ދިޔަ އިރުވެސް، އެ ޞަދަޤާތް ދެއްވަމުންދިޔައީ އެކަލޭގެފާނުކަން އެ ރަށުގެ އެކަކަށްވެސް އެނގުނަ ނުދެއްވިއެވެ.