ރާއްޖޭގައި އޮންލައިންކޮށް ކުރިއަށްގެންދާ ނާރސިންގ ޕްރޮގްރާމްތައް، މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)އިން ބަލައިނުގަންނާނެކަމަށް އެ އޮތޯރިޓީން އަންގައިފިއެވެ.

އެމްކިޔުއޭ އިން ނެރުނު އިޢުލާނެއްގައި ބުނީ، ކޮވިޑް-19 ވަބާގެ ތެރޭގައި ފައްޓާފައިވާ ނުވަތަ އީ-ލަރނިންގ ޑެލިވަރީ މޮޑަލިޓީން ހިންގުމުގެ ހުއްދަ ލިބިގެން ހިންގަމުން އަންނަ ޕްރޮގްރާމްތަކުގެ ތެރެއިން އެ އޮތޯރިޓީ ގެ "ގައިޑްލައިންސް ފޯރ އީ-ލަރނިންގ" ގައިޑްލައިންގެ ޑެލިވަރީ މޮޑަލިޓީން ކުރިއަށް ނުގެންދެވޭނެ ކަމަށް ކަނޑައަޅާފައިވާ ދާއިރާތަކުގެ ބައެއް ކޯސްތައް ކުރިއަށް ނުގެންދެވޭނެ ކަން ކުރިންވެސް އެ އޮތޯރިޓީން އަންގާފައިވާނެ ކަމަށެވެ.

އަދި ނާރސިންގ ދާއިރާ ގެ ޕްރޮގްރާމްތައް ދިގު މުއްދަތަކަށް އީ-ލަރނިންގ ޑެލިވަރީ މޮޑަލިޓީ ގެ ދަށުން ކުރިޔަށް ގެންދިއުމަކީ އެ ދާއިރާ ގެ ލައިސެންސިންގ އިދާރާ ކަމުގައި ވާ މޯލްޑިވްސް ނާރސިންގ އެންޑް މިޑްވައިފްރީ ކައުންސިލުން ހުއްދަ ދީފައިވާ ގޮތް ނޫންކަމަށް އެ ކައުންސިލުން އެ އޮތޯރިޓީ އަށް އަންގާފައިވާ ކަމަށް އިއުލާނުގައި ވެއެވެ. 

Advertisement

އިއުލާނުގައި އިތުރަށް ބުނީ، ކޮވިޑް-19 ގެ ވަބާ ގެ ތެރޭގައި ދިވެހިރާއްޖޭގެ ހުރިހާ މަތީ ތަޢުލީމު ދޭ މަރުކަޒުތަކަށް އީ-ލަރނިންގ ޑެލިވަރީ މޮޑަލިޓީ ގައި ހިންގުމުގެ ޢާއްމު ހުއްދައެއް ދީފައިވީ ނަމަވެސް، މިހާރު އެ ޙާލަތު އުވާލާފައި ވުމާއި، ނާރސިންގ ކައުންސިލް ގެ އެދުމާއިއެކު ނާރސިންގ ކޯސްތައް އީ-ލަރނިންގ ޑެލިވަރީ މޮޑަލިޓީގައި ކުރިޔަށް ގެންދިއުމުގެ ހުއްދަ ދެވެން ނެތް ކަމަށެވެ.

ވުމާއެކު، ނާރސިންގ ޕްރޮގްރާމްތައް އީ-ލަރނިންގ ޑެލިވަރީ މޮޑަލިޓީގައި ހިންގުމާ ގުޅޭ ގޮތުން އެ އޮތޯރިޓީގެ އެޑްވައިޒަރީ ބޯޑު ގެ 2022 ވަނަ އަހަރު ގެ 26 ވަނަ ބައްދަލުވުމުގައި މަޝްވަރާ ކުރެވި ނިންމާފައި ވާ ގޮތަށް، ނަރސިންގ ކައުންސިލުން ހުށަހަޅާފައިވާ ގޮތަށް މަތީ ތައުލީމުދޭ މަރުކަޒުތަކުން މިހާރު ހިނގަމުންދާ ސެމިސްޓަރ ގެ ނިޔަލަށް އީ-ލަރނިންގ ޑެލިވަރީ މޮޑަލިޓީގައި ނާރސިންގ ދާއިރާ ގެ ކޯސްތައް ހިންގުން ހުއްޓާލުމަށް އެ އޮތޯރިޓީން ވަނީ އަންގާފައެވެ.

އަދި އެ އެންގުމާ ޚިލާފަށް ހިންގަމުން އަންނަ ނާރސިންގ ޕްރޮގްރާމްތައް، އެ ދާއިރާގެ ލައިސެންސިންގ އިދާރާ ކަމުގައި ވާ ނާރސިންގ ކައުންސިލް ގެ  ލަފަޔާ އެއްގޮތަށް އެމް.ކިއު.އޭ އިން ބަލައިނުގަންނާނެ ކަމަށްވެސް އެމްކިޔުއޭ އިން ވަނީ ބުނެފައެވެ.