ހުޅުމާލޭ 2 ވަނަ ފިޔަވަހީގައި ފަހި ދިރިއުޅުން ކޯޕަރޭޝަނުން އިންޑިއާގެ ޖޭއެމްސީއާ ހަވާލުކޮށްގެން ހިންގާ ހައުސިން މަޝްރޫޢުގެ މަސައްކަތްކުރާ މަސައްކަތްތެރިންނަށް އެ ކުންފުނިން މުސާރަ ނުދޭ މައްސަލައިގައި ރާއްޖެއަށް ކަނޑައަޅުއްވާފައި ހުންނަވާ އިންޑިއާގެ ސަފީރާއި ބައްދަލުކުރަން ދިއުމުން މުވައްޒަފުންނާއި ބައްދަލުނުކޮށް އަނބުރާ ފޮނުވާލައިފި އެވެ.
ޖޭއެމްސީގެ މަސައްކަތްތެރިންނަށް މުސާރަ ނުދޭ މައްސަލައިގައި އެ މަސައްކަތްތެރިން 3 ދުވަހު ހަޅުތާލުކުރުމަށްފަހު، މިއަދު ވަނީ އިންޑިއާ އެމްބަސީ ކައިރިއަށް އެއްވެފައެވެ.
އެ މަސައްކަތްތެރިން ބުނެފައިވަނީ ޖޭއެމްސީ ކުންފުނިން މަސައްކަތްތެރިންނަށް އިހުމާލުވާ މައްސަލައިގައި އެމްބެސެޑަރާއި ބައްދަލުކުރަން ބޭނުންވާ ކަމަށެވެ. އަދި އެ މައްސަލައަށް ޙައްލު ހޯދާއިދިނުމަށް އެމްބަސީގެ އެހީތެރިކަމަށް ބޭނުންވާ ކަމަށެވެ.
ގިނަ އަދަދެއްގެ މަސައްކަތްތެރިންވަނީ މިއަދު އިންޑިއާ އެމްބަސީ ސަރަހައްދަށް އެއްވެ މުޒާހަރާވެސްކޮށްފަ އެވެ.
އިންޑިއާގެ މަސައްކަތްތެރިންނާއި އިންޑިއާ އެމްބެސެޑަރު ބައްދަލުކުރައްވާފައި ނުވާއިރު، އެމްބަސީއަށް ވަނުމަށް ފުލުހުން ވަނީ މަސައްކަތްތެރިންނަށް ހުރަސްއަޅާފަ އެވެ.
އެކަމާއި ގުޅިގެން އިންޑިއާ އެމްބަސީ ސަރަހައްދުގައި ޖޭއެމްސީގެ މަސައްކަތްތެރިންވަނީ އެމީހުންގެ ހައްގުތައް ކަށަވަރުކޮށްދިނުމަށް ގޮވާލާ އަޑުއުފުލާފައެވެ. ޖޭއެމްސީގެ މަސައްކަތްތެރިންގެ މުޒާހަރާއަށް ފުލުހުން ވަނީ ހުރަސްއަޅާފައެވެ. އަދި މުޒާހަރާ ފެށިތާ ކުޑަ ވަގުތުކޮޅެއްގެ ތެރޭގައި ފުލުހުން ވަނީ އެ މުޒާހަރާ ރޫޅާލާ އިންޑިއާ މަސައްކަތްތެރިން އެ ސަރަހައްދުން ފޮނުވާލާފަ އެވެ.
އޭގެ އިތުރުން އެ ސަރަހައްދުގެ މަންޒަރުތައް ކަވަރުކުރަމުން ދިޔަ "ވޮއިސް" ގެ ނޫސްވެރިޔާއަށްވެސް ފުލުހުން ވަނީ ހުރަސްއަޅާފައެވެ. އަދި އެ ސަރަހައްދުގެ މަންޒަރުތައް ރިކޯޑު ނުކުރުމަށް އިންޒާރުދީ ނޫސްވެރިޔާ ފަހަތައް ޖައްސާފަ އެވެ.
ޖޭއެމްސީގެ މުވައްޒަފުން މަސައްކަތް ހުއްޓާލާ މުޒާހަރާކުރަން ފަށާފައިވަނީ އެ ކުންފުނިން މަސައްކަތްތެރިންނަށް މުސާރަ ނުދޭތާ ގިނަ ދުވަސްތަކެއް ނުވާއި ގުޅިގެން އުފެދުނު ނުތަނަވަސްކަމުގައެވެ. މިއަދުގެ މުޒާހަރާގައި ބައިވެރިވި އެ ކުންފުނީގެ މުވައްޒަފަކު ވޮއިސްއަށް ކިޔައިދިން ގޮތިގައި ޖޭއެމްސީއިން މަސައްކަތްތެރިންނަށް މުސާރަ ނުދޭތާ އެތައް މަހެއް ވެއްޖެއެވެ.
މުވައްޒަފުންނަށް ބޭނުންވާ ކާއެއްޗެހީގެ އިތުރުން ބޭސްފަރުވާ ފޯރުކޮށްދިނުން ފަދަ އަސާސީ ޚިދުމަތްތައްވެސް ކުންފުނިން ފޯރުކޮށްނުދޭކަމަށް އޭނާ ކިޔައިދިނެވެ.
Advertisement
This content is created and paid for by advertisers and does not involve Voice Journalists
