ހުޅުމާލޭ 2 ވަނަ ފިޔަވަހީގައި ފަހި ދިރިއުޅުން ކޯޕަރޭޝަނުން އިންޑިއާގެ ޖޭއެމްސީއާ ހަވާލުކޮށްގެން ހިންގާ ހައުސިން މަޝްރޫޢުގެ މަސައްކަތްކުރާ މަސައްކަތްތެރިންނަށް ބޯން ހުންނަނީ ދަބަރުފެންކަމަށް އެމީހުން ބުނެފިއެވެ. 

އިންޑިއާގެ ޖޭއެމްސީގެ މަސައްކަތްތެރިންނަށް މުސާރަ ނުދޭތާ ގިނަ ދުވަސްތަކެއް ވުމާއި ގުޅިގެން އެމީހުން ވަނީ މަސައްކަތް ހުއްޓާލާ ހަޅުތާލުކުރަން ފަށައިފައެވެ. 

މުސާރަ ނުދޭތީ 3 ދުވަސް ވަންދެން ހަޅުތާލުކުރިއިރުވެސް ކުންފުނިން މަސައްކަތްތެރިންގެ ޑިމާންޑުތައް ފުއްދާދީފައި ނުވާތީ އެ މައްސަލަތައް ޙައްލުކޮށްދިނުމަށް އިންޑިއާ އެމްބަސީގެ އެހީތެރިކަން ހޯދުމަށްވެސް އެމީހުން ވަނީ މަސައްކަތްކޮށްފަ އެވެ. 

އެހެން ނަމަވެސް މުސާރަނުދީގެން ދިޔަ ޖޭއެމްސީގެ މުވައްޒަފުންނާއި އެމްބަސެޑަރު ބައްދަލުކުރައްވާފައި ނުވާއިރު، މަސައްކަތްތެރިން އިއްޔެ ވަނީ އިންޑިއާ އެމްބަސީ ކުރިމަތީވެސް މުޒާހަރާކޮށްފަ އެވެ. 

އެފަހުން ޖޭއެމްސީގެ މަސައްކަތެރިން އުޅެމުން އަންނަ ނިކަމެތި ޙާލު އެމީހުން ވަނީ "ވޮއިސް" ޓީމާއި ހިއްސާކޮށްފަ އެވެ. 

އެގޮތުން ޖޭއެމްސީގެ މުވަޒަފުން ފެންބުއިމަށް ބޭނުންކުރާ ތާނގީތައް ދައްކާލާފައިވެއެވެ. ފެން އިންތިހާއަށް ނުތާހިރުވެފައިވާއިރު، ފެނުގައި ދަބަރުގެ އަސަރު ހުއްޓެވެ. 

މިފެން ބުއިމާއި، ހަލާކުވެފަވެ ކުނިވެފައިވާ މަހާއި ތަރުކާރީން ކެއުމުގެ ސަބަބުން ގިނަ މުވަޒަފުންތަކެއް ކާނާ ވިހަވާކަމަށް މުވަޒަފުން ވޮއިސްއަށް ކިޔާދީފައިވެއެވެ.

އެގޮތުން ވޮއިސްގެ ޓީމު ޒިޔާރަތްކުރި ވަގުތުވެސް ބަލި ބޮޑުވެފައިވާ މުވަޒަފުން ފެނިފައިވެއެވެ. 

ބަލިވުމުން ޑޮކްޓަރަށް ދެއްކުމުން މަހުރޫމުކުރުމުގެ އިތުރުން ބޭސްފަރުވާގެ ކަންކަން މުސާރަ ނުދޭތީ ނުކުރެވޭކަމަށް މުވަޒަފުން ކިޔާދީފައިވެއެވެ.

ދުވާހަލު 8 ގަޑިއިރާއި 10 ގަޑިއިރާއި ދޭތެރޭ މަސައްކަތް ކުރުވާ ކަމަށާއި، ރޯދަމަހުވެސް އެމީހުންގެ މަސައްކަތަށް ލުއި ދީފައި ނުވާއިރު، ފައިދާ ހުރި އެއްޗެއް ކާން ނުލިބޭތާ އަނގަޔަށް ލާން ކެރޭ އެއްޗެއްވެސް ކާން ނުލިބޭކަމަށް އެ މަސައްކަތްތެރިން ވަނީ ކިޔައިދީފައެވެ. 

އަދި ތަކުރާރުކޮށް ކުންފުނީގެ މެނޭޖުމަންޓުގެ ކައިރީގައި އެކަން ބަދަލުކޮށް މަސައްކަތްތެރިންނަށް ރަނގަޅަށް ކާންދޭން ބުނުމުން އަޅާލާފައި ނުވާކަމަށް މަސައްކަތްތެރިން ވަނީ ބުނެފައެވެ.