އިންޑިއާގެ ބޮޑު ވަޒީރު ނަރެންދުރަ މޯދީގެ އަބުރަށް އަރައިގަނެފައިވާ ކަމަށް ނިންމައި އެ ގައުމުގެ އިދިކޮޅު ލީޑަރު ރާހުލް ގާންދީ 2 އަހަރަށް ޖަލަށްލުމަށް ހުކުމް ކުރި ފަނޑިޔާރަށް ޕްރޮމޯޝަން ދީފިއެވެ.
އެގޮތުން މި ހުކުމް ކުރި ގުޖުރާތު ސްޓޭޓުގެ ސޫރަތު ކޯޓުގެ ޗީފް ޖުޑިޝަލް މެޖިސްޓްރޭޓް ހަރިޝްކުމާރު ހަސްމުކްބާއީ ވަރްމާ ޕްރޮމޯޓް ކުރި ކަމަށް ނިންމާ އިންޑީއާގެ ޖުޑިޝަރީއިން އިއްޔެ ވަނީ އިއުލާނެއް އާންމު ކޮށްފައެވެ.
އިންޑިއާގެ ޖުޑިޝަރީ ރޭވިފައިވާ ގޮތުން ޑިސްޓްރިކްޓް ކޯޓުތަކަށްފަހު ދެން ހުންނަނީ ހައިކޯޓުތަކެވެ. އެއަށްފަހު ސުޕްރީމްކޯޓެވެ. މީގެ ތެރެއިން ވަރްމާ ޕްރޮމޯޓް ކޮށްފައިވަނީ ޑިސްޓްރިކްޓް ކޯޓްގެ ފަނޑިޔާރަކަށެވެ.
މި ނިންމުމުގެ ސަބަބުން ގިނަ ބަޔަކު އަންނަނީ މިއީ އިއްތިފާގެއްތޯ ސުވާލުކޮށް ފާޑުކިޔަމުންނެވެ.
ރާހުލް 2 އަހަރަށް ޖަލަށްލުމަށް ކުރި ހުކުމާއިއެކު އިންޑީއާގެ ބަރުލަމާނުން އޭނާގެ ގޮނޑިވެސް ވަނީ ގެއްލިފައެވެ.
މިއާއެކު މި ހުކުމް ކޮށްފައިވަނީ ވެރިކަން ކުރާ ބީޖޭޕީއިން ނުފޫޒު ފޯރުވައިގެން ކަމަށް ރާހިލް ނިސްބަތްވާ ކޮންގްރެސްޕާޓީއިން އަންނަނީ ތުހުމަތު ކުރަމުންނެވެ.
Advertisement
This content is created and paid for by advertisers and does not involve Voice Journalists
