އެންވަޔަރަމެންޓް މިނިސްޓްރީގެ އެގްޒެކްޓިވް ޑިރެކްޓަރަކު މަގާމުގައި ހުންނެވި ލަގީބް މުހައްމަދު މާހިދު އެ މަގާމުން ވަކިކޮށްފި އެވެ.
ރައީސް އޮފީހުގެ ޗީފް އޮފް ސްޓާފް އަލީ ޒާހިރު ސޮއި ކުރައްވައި ފޮނުއްވާފައިވާ ސިޓީއެއްގައި ބުނެފައިވަނީ ދިވެހިރާއްޖޭގެ ގާނޫނު އަސާސީގެ 115 ވަނަ މާއްދާގެ (ޅ) އިން ރައީސުލްޖުމްހޫރިއްޔާއަށް ލިބިގެންވާ ބާރުގެދަށުން، މިނިސްޓްރީ އޮފް އެންވަޔަރަމަންޓް، ކްލައިމެޓް ޗޭންޖް އެންޑް ޓެކްނޮލޮޖީގެ އެގްޒެކެޓިވް ޑިރެކްޓަރގެ މަގާމުން ލަގީބް މުހައްމަދު މާހިދު މިއަދު ވަކި ކުރައްވާފައިވާ ކަމަށެވެ.
އަދި އެ ސިޓީގައި ވަނީ ކްލައިމެޓް ޗޭންޖް އެންޑް ޓެކްނޮލޮޖީގެ އެގްޒެކެޓިވް ޑިރެކްޓަރގެ މަގާމުގައި ހުންނަވައިގެން ލަގީބް މުހައްމަދު މާހިދު ކުރެއްވި ޚިދުމަތަށް ޝުކުރު އަދާކޮށްފައެވެ.
މި ފަހަކަށް އައިސް ސަރުކާރާއި ސަރުކާރު ހިއްސާވާ ކުންފުނި ތަކުގައި ހިމެނޭ ބޭފުޅުންގެ ތެރެއިން، ރައީސް އިބްރާހިމް މުހައްމަދު ޞާލިހަށް ތާއީދު ނުކުރައްވާ ބޭފުޅުންތައް އެ މަގާމުތަމުން އަންނަނީ ވަކި ކުރަމުންނެވެ.
އެގޮތުން އެސްޓީއޯގެ މެނޭޖިން ޑިރެކްޓަރު ހުސައިން އަމްރު އެ މަގާމުން ވަކިކޮށްފައިވާއިރު، އެމްޑީޕީގެ ނައިބު ރައީސް، މުޙައްމަދު ޝިފާޒު ވެސް ވަނީ ރައީސް އޮފީހުގެ މިނިސްޓަރު ކަމުގެ މަގާމުން ވަކި ކުރައްވައިފައެވެ.
މީގެ އިތުރުން އެގްރޯނެޓް ގެ މެނޭޖިން ޑިރެކްޓަރުގެ މަގާމުގައި ހުންނެވި ހާރޫން ރަޝީދާއި، ގއ. ކޮލަމާފުށި ޔޫތު ސެންޓަރުގެ، ޔޫތު އެސޯސިއޭޓްގެ މަގާމުގައި ހުރި އެރަށު ބޮންތި، ސައްފަތުالله ޖަމީލް ވެސް ވަނީ މަގާމުން ވަކިކޮށްފައެވެ.
އެ ފަރާތްތައް މަގާމުން ވަކިކޮށްފައި މިވަނީ ސަރުކާރާއި ސަރުކާރު ހިއްސާވާ ކުންފުނިތަކުގެ މަގާމު ތަކުގައި ތިބި ބޭފުޅުންގެ ތެރެއިން، އަންނަ ރިޔާސީ އިންތިހާބުގައި ރައީސް ޞާލިހަށް ތާއިދު ނުކުރާ މެންބަރުން މަގާމުތަކުން ވަކި ކުރުމަށް ސަރުކާރަށް ތާއީދު ކުރައްވާ އެމްޑީޕީ މެންބަރުން ގޮވަމުންދާ ދަނޑިވަޅެއްގައެވެ.
Advertisement
This content is created and paid for by advertisers and does not involve Voice Journalists
