މިއަދު 'ވޮއިސް' ގެ ބަދިގެއިން މި ގެނެސްދެނީ ގްރިލްޑް ޗިކަން ތައްޔާރު ކުރާނެ ގޮތެވެ. މިއީ ތައްޔާރު ކޮށްލަން ވެސް ފަސޭހަ ޑިޝްއެކެވެ. މި ޑިޝް ޗިކަން ޑިޕިންގ އާއި އެކު ނުވަތަ ފަރާޓާ ނޫނީ ބަތާއި އެކު ކާލަންވެސް ވަރަށް މީރު ވާނެއެވެ. 

1ކިލޯ ކުކުޅު (ހަން ނޮޅައި، މެދުން ފަޅާލާފައި)

1 ބޮޑު ފިޔާ

3 ލޮނު މެދު

ހިކަނދިފަތް

1/2 އިންޗި އިނގުރު

ގިތެޔޮ މިރުސް (ބޭނުން ނަމަ)

3 މޭޒުމަތީ ސަމުސާ މުގުރި މިރުސް

1 ސައި ސަމުސާ މުގުރި އަސޭމިރުސް

1/2 ސައިސަމުސާ ދިރި

3 ކާށި ފޮތި (ފިހެފައި)

ނޫޑްލްސް ސޫޕް ޕެކެޓެއް

1 1/2 ލުނބޯ

1 މޭޒުމަތީ ސަމުސާ ސޯޔާ ސޯސް

1 ސައި ސަމުސާ އޮއިސްޓާ ސޯސް 

1 ސައިސަމުސާ ލޮނު

1/2 ލުނބޯ (ފޮތި ކޮށްފައި)

1 އަލުވި (ކިޔުބް ކޮށް ކޮށާފައި)

1/2 ފިޔާ (ބޮޑެތިކޮށް ވަށްކޮށް ކޮށާފައި)

1) ފިޔާ، ލޮނުމެދު، ހިކަނދިފަތް، އިނގުރު، ގިތެޔޮ މިރުސް، މުގުރި މިރުސް، އަސޭމިރުސް، ދިރި، ކާށި އަދި ނޫޑްލްސް ސޫޕް ޕެކެޓް އެއްކޮށް މިކްސަރުން ހިމުންކޮށް މުގުރާލާއި ލޮނު މިރުސް ގަނޑެއް ތައްޔާރު ކޮށްލާށެވެ. 

2) ދެން ތައްޓަކަށް ލޮނު މިރުސް ގަނޑު އަޅާލުމަށްފަހު އޭގެ ތެރެއަށް ސޯޔާ ސޯސް، އޮއިސްޓާ ސޯސް އަދި ލޮނު އަޅާލުމަށްފަހު، ހުތްވެސް ޖަހާލުމަށްފަހު ރަނގަޅަށް އެކުލަވާލާށެވެ. 

3) އެއަށްފަހު އެ މިރުސް ގަނޑު ކުކުޅުގައި ރަނގަޅަށް އުނގުޅާލުމަށްފަހު 1 ގަޑި އިރު ވަންދެން ފްރިޖުގައި ނުވަތަ ފްރިޖުން ބޭރުގައި ނަމަވެސް މެރިނޭޓް ކުރަން ބަހައްޓާށެވެ. 

4) ދެން 200 ޑިގްރީސް ސެލްސިއަސްއަށް 10 މިނެޓް ވަންދެން އަވަން ޕްރީ ހީޓް ކުރާށެވެ. 

5) އެއަށްފަހު ޓްރޭގައި ރަނގަޅަ ތެޔޮ އުނގުޅުމަށްފަހު ކުކުޅު ޓްރޭއަށް ލުމަށްފަހު، ކުކުޅު މަތީގަޔާއި އެތެރޭގައި، އަލުވި، ލުނބޯ ފޮތި އަދި ފިޔާވެސް އަތުރާލާށެވެ. ދެން ޓްރޭ އަވަނަށް ލައި ކުކުޅު ފިހެލާށެވެ. 

6) ގާތް ގަނޑަކަށް 30 މިނެޓް ފިހެވުމުން ކުކުޅު މެރިނޭޓް ކުރި ތަށީގައި އިތުރުވެފައި ހުރި ޕެސްޓް ކޮޅު ކުކުޅު މަތީގައި އުނގުޅާލުމަށްފަހު ރޯ ފިލަންދެން އަނެއްކާވެސް ފިހެލާށެވެ.